Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Semeton senamian dengan-dengan Galatia! Side pade tetu-tetu bodo! Sang side pade sampun kene siq pengaruh dengan? Padahal ninggalne Almasih lẽq kayuq salib sampun tiang jelasang lẽq side sejelas-jelasne!

² Cobaq badaq tiang saq sopoq niki doang: Napi side pade sampun nerimaq Roh Allah lantaran ngelaksaneang Hukum Taurat, atao lantaran side pade percaye lẽq pemberitean Kabar Solah lẽman Allah?

³ Kembẽq side pade bodo gati? Side pade sampun mulai idup baru siq Roh Allah, segerah mangkin side pade mẽlẽ nyempurneang diriqde siq kekuatande mẽsaq?

⁴ Percume doang selapuq saq sampun side pade alamin nike? Segerah selapuq nike sie-sie!

⁵ Allah ngicanin Roh-Ne lẽq side dait ngaraqang keajaipan-keajaipan lẽq antare side pade. Napi Allah ngelaksaneang nike lantaran side pade ngelaksaneang Hukum Taurat atao lantaran side pade percaye lẽq pemberitean Kabar Solah lẽman Allah?

⁶ Pade maraq saq tetulis lẽq dalem Kitab Suci mengenai Ibrahim, "Ibrahim percaye lẽq Allah, dait lantaran percayenne nike ie tejariang kenaq lẽq arepan Allah sehingge hubunganne kance Allah jari solah malik."

⁷ Keranaq nike, side pade harus nenaoq bahwe selapuq dengan saq idup lẽman iman, ie pade nike keturunan Ibrahim.

⁸ Kitab Suci, saq sampun juluan wikan bahwe Allah gen miaq dengan-dengan saq ndẽq Yahudi bau tejariang kenaq lẽq arepan-Ne sehingge hubungan ie pade kance Allah jari solah malik langan iman, sampun juluan beriteang kabar solah nike tipaq Ibrahim, "Langan side, selapuq suku-suku bangse gen mauq berkah lẽman Allah."

⁹ Ibrahim beriman, make ie teberkahin. Maraq nike ẽndah selapuq dengan saq beriman, gen teberkahin bareng kance Ibrahim.

¹⁰ Dengan-dengan saq beharep sepenoq angen lẽq Hukum Taurat, selapuqne idup lẽq bawaq kutukan. Sẽngaq lẽq dalem Kitab Suci tetulis, "Dengan saq ndẽq setie ngelaksaneang selapuq saq tetulis dalem Kitab Hukum Taurat tekutuk siq Allah!"

¹¹ Ndẽq araq sopoq dengan juaq saq bau tejariang kenaq lẽq arepan Allah sehingge hubunganne kance Allah jari solah malik lantaran ngelaksaneang Hukum Taurat. Hal nike sampun tenyatayang lẽq dalem Kitab Suci, "Dengan saq tejariang kenaq lẽq arepan Allah sehingge hubunganne kance Allah jari solah malik, ie gen idup siq iman!"

¹² Laguq Hukum Taurat nike ndẽqne tedasarang siq iman. Dalem Kitab Suci tetulis bahwe dengan saq ngelaksaneang Hukum Taurat, gen idup lantaran hukum nike.

¹³ Laguq Almasih sampun nebus ite lẽman kutukan Hukum Taurat. Ie piaq hal nike siq ngalurang diriq-Ne tekutuk lantaran ite. Sẽngaq lẽq dalem Kitab Suci tetulis, "Tekutuk dengan saq ninggal tegantung lẽq kayuq salib."

¹⁴ Almasih ngelaksaneang maraq nike adẽq berkah saq tejanjiqang siq Allah tipaq Ibrahim teicanin ẽndah tipaq dengan bangse-bangse lain. Sehingge langan iman, ite nerimaq Roh saq tejanjiqang siq Allah nike.

¹⁵ Semeton senamian! Tiang bẽng side conto lẽman pengalaman sebilang jelo. Lamun dengan miaq surat wasiat saq sampun tesahang, make ndẽq araq sopoq dengan juaq saq bau batalang atao ngeromboq surat wasiat nike.

¹⁶ Maraq nike ẽndah halne selapuq janji saq sampun teicanin tipaq Ibrahim dait tipaq keturunanne. Lẽq Kitab Suci ndẽqne tetulis "dait tipaq selapuq keturunan side", maraqne tipaq luwẽq dengan, laguq cume tipaq sopoq dengan, "dait tipaq keturunan side", nike Almasih.

¹⁷ Saq mẽlẽ tiang sampẽang lẽq deriki: Janji Allah sampun tepiaq dait tesahang juluan. Hukum Taurat saq teicanin empat ratus telung dase taun sesampun nike ndẽqne bau batalang pengesahanne dait ngapus janji Allah nike.

¹⁸ Sẽngaq lamun napi saq teicanin siq Allah nike teharepang siq dasar Hukum Taurat, make nike ndẽqne malik rahmat saq tejanjiqang. Malahan lantaran Allah sampun bejanji lẽq Ibrahim, make Allah ngicanin hal nike lẽq ie.

¹⁹ Lamun maraq nike, jari napi Hukum Taurat teicanin? Jawabne bahwe hukum nike teromboqang jari nyatayang pelanggaran manusie. Hukum Taurat nike berlaku jangke dateng sopoq dengan keturunan Ibrahim, saq tesebut lẽq dalem janji Allah tipaq Ibrahim. Hukum Taurat nike tesampẽang siq malaẽkat-malaẽkat langan perantarean sopoq manusie.

²⁰ Jari, harus araq due pihak, baruq teperluang sopoq perantare. Laguq Allah nẽnten merluang perantare, sẽngaq Allah mẽsaq saq ngelaksaneang.

²¹ Napi hal nike artine bahwe Hukum Taurat belawanan kance janji Allah? Pasti ndẽqne maraq nike! Sẽngaq lamun Hukum Taurat teicanin jari sopoq hal saq ngidupang, make manusie bau tejariang kenaq lẽq arepan Allah sehingge hubunganne kance Allah jari solah malik langan Hukum Taurat.

²² Laguq lẽq dalem Kitab Suci tetulis bahwe selapuq umat manusie sampun araq lẽq bawaq kuase dose, adẽq janji saq asalne lẽman iman lẽq dalem Deside Isa Almasih bau dateng tipaq dengan-dengan saq percaye.

²³ Sendẽqman iman nike dateng, mule ite araq lẽq bawaq pengawasan Hukum Taurat. Ite maraq tekurung jangke iman nike tenyatayang.

²⁴ Siq care nike, Hukum Taurat nike sampun jari panutan saq jauq ite tipaq Almasih, adẽq ite tejariang kenaq lẽq arepan Allah sehingge hubungante kance Allah jari solah malik lantaran iman.

²⁵ Sesampun iman nike dateng, ite ndẽqne malik araq lẽq bawaq pengawasan Hukum Taurat saq jari panutan nike.

²⁶ Side pade sampun jari bije-bije dowẽn Allah siq iman lẽq dalem Deside Isa Almasih.

²⁷ Side pade selapuqne sampun tebaptis siq pesẽngan Almasih, jari side pade sampun nerimaq lẽq diriq side pade sipat-sipat Almasih.

²⁸ Dalem hal niki ndẽq araq malik bẽdene dengan Yahudi dait dengan Yunani, antare hambe dait dengan bẽbas, antare mame dait nine. Side selapuqne sopoq lẽq dalem Deside Isa Almasih.

²⁹ Lamun side pade dowẽn Almasih, make side pade keturunan Ibrahim. Dait side pade gen nerimaq napi saq tejanjiqang siq Allah.

Galatia

Video Galatia 3

Ikuti Kami:

KONTAK | PARTISIPASI | DONASI