Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Doba sug yeng Galatia yen yecinaga dag Krisdus omom taiba sogo salib naugb meijen sesar dag misenohob, kaba, gareng ei yen meigdoc mes, hang yen meiji emosum naugb yen yemaimo Krisdus deitero gina? Anai dan demecgoneh gin dau yen touwero, doba dan dens dau sug Yesus Krisdus en omom taiba sogo salib gin augwan eb ainyes dou yenohob.
2 Dangga hang, dan deijidougwo yen endag sug Allah esa Mena Gogoufu se yen meigdoc mes sug nosa, kaba, en esa en dou yen ogdoc sug yen yaimo Musa men gomnomna ginei? Era ogdoc sug yen youman Mer Geigouhw eisaugb Krisdus, hanoba yen meigdoc ebdebin an en touei? Era dagiro? Yen yauni ucugb dou danahabi. Naro. Allah esa Mena Gogoufu se yen meigdoc mes ogdoc sug yen meigdoc ebdebin an Krisdus hom dous.
3 Doba sug yen yebiji naugb yen yaimo ucina aud maireseb menau geb huhugb ogdoc Mena Gogoufu men goubesa dag ginohob, kaba, dagiro, naugwe hang, yen youwan yec meijus dau. Hanoba yen yaimo Musa men gomnomna aud gousanara debin gin toua? Yen youdesa endag areg yen yaimo se yen meijaga, kaba, edeinyum naugb ahwan yen se ucina aud maireseb menau gini terimda edebeij sug ouwedoc enggei? Naro. Anai yen yecinaga augwan gini ogdoc Mena Gogoufu men goubesa gin dous. Dangga dagiro yen yeicara yaimo dag gina? Yen meiji osum namcirohobei?
4 Anai sug yen meigdoc ebdebin an Krisdus gin, kaba, yen yeic yen meijug erij. Dara Mena Gogoufu eic einyana aingma aingma dou yen touohob. Dangga yen youdesa augwan gini emesloulougwero, hang yen yobsara dau gin touei? Anai sug yen yaimo Musa men gomnomna aud gousanara ucugb deit, kaba, areg yen yaimo se yen meijireseb menau se Krisdus ginohob, kaba, augwan ediyebeiya dau yen, hang yen yeic yen meijug erij dag augwougb toua namcirohob. Dobnaro. Dan decinaga yen yemeicara dag ginero. Doba yen yaimo Krisdus men ucina gin terimda.
5 Anai sug Allah esa Mena Gogoufu dou yen sug nosa naugb en eigtou se yen meigdoc mes namcir. Hanoba en aben ganusbus dara eic gansins ogdoc Mena Gogoufu men goubesa dou yen toua, kaba, en eicara dangga dau sug yen yaimo Musa men gomnomna aud gousanara gin enggei? Era ogdoc yen meigdoc ebdebin an areg emen emesai eisaugb Krisdus dou yen gin dousei? Naro. Yen yecinaga Allah eic ganusbus dara gansins dou yen ogdoc sug yen meigdoc ebdebin an areg emen emesai dou yen gin dous.
6 Augwan gini aninim dag Abraham men geicara sug nosa touohob. Anai Surad Injil Meb Mohon enara deb, endagai: Abraham medoc ebdebin an areg Allah os dou en. Hang Allah eic gesgigouhwesa dou en ucugb ogdoc gin toua.
7 Dangga hang, gareg en medoc ebdebin an Musa men gomnomna naugb sug Allah eic gesgigouhwesa dou en ogdoc gin, kaba, en emedag Abraham medebeito misen touwero. Doba gareg en medoc ebdebin an Allah en mer eisaugb en Meisi Yesus gin, kaba, sud hom ingga dous eng edag Abraham medebeito misenohob. Dan douwan naugb yen yemauwam an didi eisaugb ginero. Doba dan douwan naugb yen yecinaga augwan gini dag misen namcir.
8 Dara sug Allah eic gesgigouhwesa dou yeng yugmahara toua ogdoc sug yen meigdoc ebdebin an Krisdus gin, kaba, en ens dau augwan gini dou Abraham sug nosa touohob. Anai en os dou en deb se Surad Injil Meb Mohon deb, endagai: Ogdoc ban abdebeito hom, kaba, dan demeic geigouhw dou lusud se cinogo gin augwan toues.
9 Dangga hang, gareg en medoc ebdebin an areg Allah os dou en eisaugb Krisdus gin, kaba, Allah eic geigouhw dou en aninim dag en eic geigouhw dou Abraham sug en od mena debsa Allah an areg en os dou en sug nosa touohob.
10 Doba gareg en aimo Musa men gomnomna, hanoba en od mena debsa Allah, dauntoba en eic gesgigouhwesa dou en ogdoc gin dous, kaba, Allah men gagaresa eb naugb en namcir. Dara Musa enara deb dangga dou emeng Yahudi emen emjemouwer se Surad Injil Meb Mohon sug nosa touohob, endagai: Gareg dau yen, en emaimo Allah men gomnomna augwan terimdero, doba en edreg dau homohob, kaba, Allah men gagaresa eb naugb en namcir.
11 Dangga areg graga augwan, kaba, ens ainyes dou maman dag sud hom ingma, kaba, Allah emeic gesgigouhwesa dou en ogdoc sug en aimo Musa men gomnomna ginero. Doba Allah eic gesgigouhwesa dou en ogdoc sug en medoc ebdebin an en dous. Augwan gini esogwa deisa areg Allah ens deb se Surad Injil Meb Mohon deb sug nosa touohob, endagai: Gareg en medoc ebdebin an areg dan den dou en gin, kaba, enin dous eng dan deic gesgigouhwesa dou en ucugb toua. Len gus, isnaro. Hang en emomom terimda touwero, doba maireseb menau geb huhugb eb naugb en namcir.
12 Doba eisaugb sud hom areg en ouwan naugb Allah eic gesgigouhwesa dou en dau sug en aimo Musa men gomnomna gini dous, kaba, Surad Injil Meb Mohon esulou en an dag gini, endagai: Gareg en ouwan naugb Allah eic maireseb menau geb huhugb dou en dau sug en aimo Musa men gomnomna gin dous, kaba, esloulougb naugb en emedis mougwa homero, doba en aimo augwan gini audud namcir. Naro, kaba, maireseb menau geb huhugb emeb naugb en touwero, doba Allah men gagaresa eb naugb en terimda. Dangga hang, sud hom areg en aimo Musa men gomnomna naugb sug Allah eic gesgigouhwesa dou en ucugb. Dara sud hom gedig en medoc ebdebin an areg Allah os dou en eisaugb gin dous, kaba, lahwas maran geicara aninimero, doba susugb namcir. Anai homa, kaba, en medoc ebdebin an enin men geicara. Doba homa, kaba, en medoc ebdebin an Krisdus men geicara naugb en dous.
13 Doba Krisdus, kaba, en esga maman dau gomnomna mohon men gagaresa augwan namcirohob. Anai en eperwei maman mamuhw naugb gagaresa gini akebin en se sogo salib dau maman. Augwan gini aimo dau areg Surad Injil Meb Mohon enara dag gin deb sug nosa touohob, endagai: Sud hom areg lusud leic gomom dou en, hanoba len letob en se sogo salib, kaba, Allah men gagaresa eb debin enohob.
14 Krisdus esga maman dau gomnomna men gagaresa. Dauntoba ogdoc Krisdus men geicara gin, kaba, maireseb menau geb huhugb emediyebeiya dau yeng yugmahara touwero. Doba areg Allah os dou Abraham naugb yen sug nosohob, kaba, augwan eb naugb yen toua terimda. Dangga hang, sug maman mamdoc ebdebin an Krisdus men geicara naugb maman gin, kaba, Allah esa Mena Gogoufu se maman mamdoc mes, aimo dau areg en os deb sug nosa an maman toua.
15 Dan indagunerij, dara dan indamouwerij, dan deic dau lusud meren geicara eisaugb areg len los doum, kaba, dan dainyenara hom dou yen. Anai yen yecinaga dag areg len los doum, hanoba len louwara debin ginohob, kaba, sud hom emerses naugb en emeic men ingma emaulo gini toua deitero. Doba augwan ebsugeb namcir.
16 Augwan gini aimo dau Allah men geicara dou Abraham gin toua. Anai sug Allah os ara ara dou enohob, kaba, en ou enin moho debin dou en. Hang emediyebeiya dau en touwero. Doba eb naugb en toua namcir. Doba areg Allah os dou Abraham naugb sug en eic geigouhw dou lusud se cinogo augwan, kaba, Surad Injil Meb Mohon emenara dag en eic geigouhw dou len ogdoc en medebeitor leinyana touwero. Doba Surad Injil Meb Mohon enara dag en os augwan gini dou Abraham an en medebeito hom dous. Dara en medebeito hom gin, kaba, eni Krisdus. Yen youman areg dan den dou yen gini deigeigouhw namcir.
17 Dangga areg dan den dou yen gin, kaba, men meijouhw dag gini: Sug Allah os ara ara dou Abraham, hanoba en ou enin moho debin gin touohob, kaba, Musa men gomnomna emerses dara emoguc dougwo areg Allah os dou Abraham gin touwero. Doba ebsugeb namcir. Anai Musa men gomnomna gin, kaba, emeinoisa Allah men gos dou Abraham gin touwero. Doba sug arisogomoc huntun hogu mos homoi edeisu ginahabi, kaba, Allah emesa men gomnomna ogdoc Musa gini dou emeng Yahudi emen emjemouwer daiyamo deit.
18 Dangga toua, sug Allah eic ara ara dou Abraham dau sug en aimo Musa men gomnomna an gin dous, kaba, areg Allah eic dou en gin, kaba, emogdoc Allah men gos dou gin deitero. Doba ogdoc Abraham men geicara an gin dous. Dobnaro. Allah os dou enohob. Hang en emeic augwan dag mogud dou Abraham gin toua.
19 Doba sud hom dau yen, kaba, en eijidougwo dan, endagai: Sug Allah os dou Abraham naugb en eic geigouhw dou maman ogdoc en medebeito Krisdus hom gini dous, kaba, dagiro, naugwe hang, en eic men gomnomna menau dou Musa ucan gin dou maman deita? Ingga, kaba, dan dauni dou en dag gini: Allah eic gomnomna gin dou Musa naugb en ens lusud meren geicara dou len dag len lebesesar namcirohob. Hang gomnomna gin, kaba, emeb terberber touwero. Doba Allah eic gini dou maman terimda edebeij lona sug Abraham medebeito hom graga, moho Krisdus, en agunyenohob. Dau, kaba, gomnomna mohon gini ediyebeiya toua namcir. Anai areg Allah os dou Abraham gin, kaba, eisaugb Krisdus gin dous. Dangga toua, sug Allah eic men gomnomna gini dou leng Israel sug nosa, kaba, en emeic teisis dou len touwero. Doba en eic dou sud hom gesa taij naugb lenahabi, en emdeic dou len toua. Anai sug malaikad lesai Allah men gomnomna gin, kaba, len lesai gin dou Musa nosahabi, en emdesai dou leng Israel deitda.
20 Doba areg Allah os dou Abraham gin, kaba, sud hom ingma emesa taij naugb gin touwero. Doba Allah enin enara teisis dou en. Anai areg Allah os gin, kaba, emaimo dau sug Abraham eic dau Allah mesira naugb en esai dou len gus touwero. Doba aimo dau areg Allah enin os deb dou en dous. Hang gin, kaba, moho agas bedreg dau Musa men gomnomna toua namcir.
21 Sug Allah os ara ara teisis dou Abraham, doba en eic men gomnomna dou leng Israel ogdoc sud hom gesa taij, moho Musa, gin dous, kaba, gini men meijouhw dag Musa men gomnomna dara Allah men gos dou hwas edregim namcirohobei? Dangga, isnaro. Anai sug Allah eic gomnomna hom dou maman, doba edeinyum naugb sug ahwan maman aud maireseb menau geb huhugb gin, kaba, en eic gesgigouhwesa ucugb dou maman ogdoc sug maman maimo men gomnomna hom gin toua. Dobnaro. Allah men gomnomna ogdoc Musa gin, kaba, en emeic dou maman naugb sug ahwan maman aud maireseb menau geb huhugb ginero. Doba en eic dou maman, dauntoba maman macinaga dag maman mabesesar. Hang mamom icira gin toua namcirohob.
22 Augwan gini esogwa deisa areg Surad Injil Meb Mohon enara deb sug nosa touohob, endagai: Lusud se cinogo gin augwan, kaba, sesar oiharaga len. Hang len ledag sogougb dou en touohob. Dangga hang, areg Allah os dou Abraham naugb sug en eic gesgigouhwesa dou lusud ogdoc en medebeito Krisdus gin, kaba, en emeic dou len ogdoc sug len laimo Musa men gomnomna gin touwero. Doba gareg en od mena debsa Allah an areg en os ginohob. Hanoba en medoc ebdebin an Yesus Krisdus gin toua, kaba, Allah eic gesgigouhwesa dou en ogdoc gin namcir.
23 Anai sug lona emedagasa naugb sug maman mamdoc ebdebin an Krisdus ginbuma, kaba, Musa men gomnomna edag sud hom gedig en ouf maman se tu gesisug. Dauntoba maman maigtou sungga naugb gogom toua terimda. Hanoba en esedougwo maman naugb sug maman mamarges dau gin touwero. Doba maman maigtou se tu gesisug ingga terimda edebeij lona sug Allah ens cumougt ainyes dou maman naugb sug maman mamdoc ebdebin an Krisdusahabi, en emesga maman dau gin toua namcir.
24 Dangga hang, Musa men gomnomna gin, kaba, en edag sud hom gedig en ogod maman an sesar dous. Dauntoba maman mamedreg gomnomna gin touwero. Doba maman mahau dau gin namcir. Dara en eicara dag gini terimda edebeij lona sug Krisdus en enahabi, Allah emeic gesgigouhwesa dou maman ucugb toua namcir. Anai maman mamdoc ebdebin an Krisdus ginohob.
25 Doba iteitogin, kaba, cumougt naugb sug maman mamdoc ebdebin an Krisdus edebeij mamanohob. Dangga kaba, Musa men gomnomna emebehnehino dougwo maman toua deitero, doba maman marges dau namcir.
26 Sug yen meigdoc ebdebin an Krisdus Yesus dag ginohob, kaba, yen yemedag sogougb dou Musa men gomnomna toua deitero. Doba yen yedag hom dara en. Hang Allah emeigdoumesa yen yedag en mogwihi mogo yen dag misen touohob.
27 Dara Krisdus men maireseb augwan eb naugb yen toua. Anai sug gembala ogun yen se duhu sug nosa, kaba, gini ansins dag yen yedag hom dara en toua namcirohob.
28 Dangga hang, iteitogin, kaba, yen yemeija leng Yahudi susugb dau lugmahara, dara sogougb susugb dau lusud misen, dara ligiji susugb dau ligida touwero. Doba se Krisdus Yesus gin, kaba, yen yaugwan yedag hom terimda.
29 Sug Krisdus moho aiga yen dag ginohob, kaba, yen toua yedag Abraham medebeitor misen namcir. Hang areg Allah os dou en sug nosa, kaba, emediyebeiya dau yen touwero, doba eb naugb yen toua terimda.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA