Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Muyuh lun Galatia pelaba bacé! Idéké luk pangeh nenaluk nemuyuh dengan mangun? Até Yésus Keristus luun kayuh salib pangeh ginala' pa kiung muyuh!
2 Do' ngor balaku ini: inanké muyuh nengalap Roh ineh ngaceku maya' Ukum, kian ngaceku ninger idi manu ku Bala luk Do' lek?
3 Ngudehké muyuh kudeng ineh bacé? Muyuh pangeh nengimun dengan Roh, pianké muyuh mangeh kekamen maya' ulun tana' ini?
4 Mo'-mo' ké amung-amung peruan luk pangeh ilap muyuh? Na ui manu ku ineh.
5 Inanké Allah maré Roh kuan muyuh, idi nganau' kekamen luk melalud arang muyuh ngaceku muyuh maya' Ukum ineh kian ngaceku ninger idi manu ku Bala luk Do' lek?
6 Mepad kudeng luk inayud ratnan Ibrahim, "Ieh pangeh manu inan Allah, idi ngaceku anuneh ineh ieh imo Allah matu."
7 Ngaceku ineh do' muyuh kali', idi amung-amung lemulun luk manu ineh anak-anak Ibrahim luk matu.
8 Surat Allah nekali' atun, idi Allah sikal nganau' lun pupu baken matu ngaceku anu, idi Ieh nemada' Bala luk Do' atun kuan Ibrahim, kebalaNeh, "Idi bang namu amung-amung lun pupu baken miak ngalap peruan."
9 Ngaceku ineh amung-amung lemulun luk manu ngalap peruan dengan Ibrahim luk manu ineh.
10 Lemulun luk merapet sikal maya' Ukum, ideh pa liang kediman, ngaceku pangeh inayud, "Idi kediman kuan anid-anid burur lemulun luk na lutep nganau' amung-amung luk inayud bang surat Ukum ineh."
11 Megala' pa kiung Allah, idi seburur pana' na miak ruen matu ngaceku ratnan Ukum; ngaceku pangeh inayud, "Lemulun luk matu miak ngalap ulun ngaceku anu."
12 Iamo' Ukum ineh baken ratnan manu, iamo' maya' kudeng luk inayud, "Lemulun luk maya' amung Ukum ineh miak mulun ngaceku Ukum ineh teh."
13 Imao' Keristus pangeh nenguli' netau ratnan kediman Ukum ineh dengan mangun ku aceh kediman kuan tau, ngaceku pangeh inayud, "Kediman kuan anid-anid lemulun luk tekito luun kayuh."
14 Keristus nenganau' ineh, pad peruan luk ratnan Ibrahim miak macing kuan lun pupu baken bang Keristus Yésus, pelé tau miak ngalap Roh luk pijani' ineh ngaceku ratnan anu.
15 O kinanak-kinanakku, ui makai luk pinginud ratnan ulun tau luk pekalai: kudeng dueh burur ngamo ratnan anun-anun, pad didueh pejani', seburur pana' nateh miak ngusag jani' ineh, kian ngeluun ineh.
16 Allah nenganau' jani'-jani'Neh kuan Ibrahim idi inulneh. Surat Allah na pebala, "idi kuan amung inulneh," ilungneh mula' lemulun. Kebalaneh, "Idi kuan sebuleng inulmu," ilungneh seburur mo', ieh ineh Keristus.
17 Ini ilung balaku: Allah nenganau' aceh jani', idi nepejani' maya' ineh. Ukum luk nacing apat ngeratu teluh ngepulu' lak muci ratnan ineh na miak ngusag pejani' ineh, idi ngagka' jani' Allah.
18 Ngaceku kudeng luk barén Allah macing ratnan Ukum, idi baken ieh ratnan jani'Neh; iamo' ngaceku Allah pangeh nenganau' jani' ineh, idi Ieh nengacing ineh kuan Ibrahim.
19 Kudeng pieh kudeng ineh, anunké ulek Ukum ineh? Ukum ineh pangeh biré pad ngegala' sala', idi inan ulek pad macing inul Ibrahim tinganak, luk inan jani' ineh biré. Ukum ineh biré lemaba melaikat-melaikat dengan ticu' seburur lemulun luk ngatum.
20 Idi na ulekneh lemulun luk ngatum kudeng inan seburur mo'; idi Allah ineh Sebuleng.
21 Inanké ilungneh Ukum ineh sikal metueh ratnan jani'-jani' Allah? Na tu-tu! Ngaceku kudeng sebuleng ukum pangeh biré luk miak ngacing ulun kuan lemulun, kali' rungen lemulun miak ruen matu ratnan ukum ineh.
22 Iamo' Surat Allah pebala, amung tana' ini pa liang lalud sala', pad baré ineh luk pijani' maya' anu inan Yésus Keristus miak barén kuan lemulun luk manu.
23 Iamo' kareb nateh anu ineh nacing, tau pangeh inimet pa liang Ukum, idi tinutup, pad anu ineh miak uen ngegala'.
24 Ngaceku ineh Ukum ineh pangeh mangun ku aceh guru pad Keristus macing, pelé tau miak ruen matu ratnan anu.
25 Iamo' pangeh acing anu ineh, idi na tau pa liang ukum guru ineh.
26 Amung-amung muyuh anak-anak Allah ngaceku ratnan anu Keristus Yésus.
27 Amung muyuh luk pangeh rireb bang Keristus pangeh nengayung ku Keristus.
28 Na luk idi lun Yahudi idi lun pupu baken, na luk idi demulun idi lun luk mepuit, na luk idi deléi idi decur; ngaceku amung-amung muyuh ini mangun ku sebuleng bang Keristus Yésus.
29 Kudeng muyuh mangun ku pupu Keristus, kali' rungen muyuh inul Ibrahim luk ngalap babpat petulu dengan pejani' Allah ineh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA