Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ngoi tobuika sababu towileleani ma Jou. Ge'enau so ngoi toga'asoko tosidemogaroku nginika, tanu nia gokoie de nia gogeruku moteke kokia naga gee ma Jo'oungu ma Dutu wini'asokokau.

² Salingou nimasitipokoku, 'uwa kanimarohu-rohu, la 'ena niosabari. Niosidumutu 'ania dora ma ngekomo nimakariwo moi de moi.

³ Nimariwo de ma goungu nio'ahu nimakakasanangi, la 'ania rimoi gee 'o Ngomasa 'Itebi-tebini 'isidadiokau ge'ena 'uwa niamada.

⁴ Ngone matero ka 'o roese moi, de poodumu ka 'o Ngomasa 'Itebi-tebini 'inaparetano. Koge'enali mita ngini ma Jo'oungu ma Dutu wini'asoko ma ngale nia singina nganono ka moi.

⁵ Nanga Jou kawomatengoka, nanga ngo-ngaku ka moi, 'ina'osiki ka de 'o ronga moi,

⁶ de ma Jo'oungu ma Dutu kawomatengoka, 'una ge'ena ngone poodumu nanga Dea. 'Unau 'o diwanga de 'o dunia yasuluunuku wapa-pareta, gee womanarama ma ngekomo ge'ena 'iodumoka, de wokuasa ge'ena 'iodumoka.

⁷ Ma ngone moi-moi pamake 'o co-catu ma Kristusino, moteke kokia naga 'una wokula.

⁸ Ma ngale ge'ena 'o Buku 'Itebi-tebinoka 'isilefoku, "Ma 'orasi 'una wodoa 'o ngii gee 'ifoloi 'ikuru-kurutieka, 'una waki'asa manga gudai gee wakitago-tagokino, de wakikula 'o sagala co-catu 'o nyawa-nyawaka."

⁹ Aa, "'una wodoakau" ge'ena ma ngale 'isira wo'utiokau sigado 'o ngii gee 'ifoloi 'idaduukoka 'o duniaka ne'ena.

¹⁰ De 'una gee wo'uti-'utiokau gu'una, 'unau ge'ena gee wodoa 'o ngii gee 'ifoloi 'ikurutie de 'o sagala diwanga, so 'una naga de wakokipareta kiaka naga bato 'o 'alami wasuluunuku.

¹¹ 'Unau wokula-kula 'o sagala co-catu 'o nyawaka; munuka wakigoraka yodadi 'o su-suloko, munuka yodadi 'o nabii, de munukali yositota-totara 'o Habari ma Owa. 'Asa de munukali wakigoraka ma ngale 'o jamatioka yoleleani de yodoto-dotoko.

¹² Ma Jo'oungu ma Dutu wodiai koge'ena, la 'awi 'umati wonadua-duangou ma ngale powileleani de posikuata 'o jamati ge'ena la ma Kristus 'awi roese,

¹³ sigado ngone poodumu podadi ka moi sababu powingaku ma Kristus, de poodumu pasahe 'itiaiokau ma ngale ma Jo'oungu ma Dutu 'awi Ngowaka. De ngone podadi balusokau nanga ngo-ngakuoka so ma gou-goungu pomadotomokau 'isoka ma Kristus.

¹⁴ So ngone 'isoka 'o ngowa-ngowakuawau gee yaika yaino yomote-moteke 'o doto-dotoko 'i'ini-'inioka 'o nyawa-nyawano gee yoba-barija yosili-liba de manga ngeluku.

¹⁵ Ma ngone salingou posidumutu 'okia sonaa 'iti-tiai de nanga singina 'o dora ya'omanguku, la naga 'o sagala moi-moioka gee 'ito'ingo de kapomadotomo monga 'isoka ma Kristus, gee wodadi 'o jamati ma saeke.

¹⁶ 'Una wosibalusu 'o roese ma kia sonaa 'iodumu ge'ena 'isikalape 'isidi-diai, de 'isikadowanga moi de moi de to 'ena ma boboo. De nako ma kia sonaa ge'ena moi-moi 'imanarama gee to 'ena ma manarama, ge'ena 'o roese 'iodumu ge'ena 'asa 'ifero 'idadi 'ibalusu de 'isikuata de 'o dora.

¹⁷ Sababu ge'ena de ma Jou 'awi kuasa, nedau tinidongose tosigou-goungu: 'Uwau nio'ahu 'isoka 'o nyawa gee kowinako-nakowa ma Jo'oungu ma Dutuka, gee yatiba-tibangi 'okia sonaa ma faedaa koi'iwa-'iwa.

¹⁸ To 'ona manga di-dibangi 'ipupukakau. 'Ona yo'ahu wikurutoka ma Jo'oungu ma Dutu, sababu yohaga-haga ma sala. 'Ona koge'ena yodadi, sababu manga singina 'i'opini.

¹⁹ 'Ona manga mahe koi'iwakau, so 'ona yamoteke manga nyafisuu ma dorou 'i'ini-'inioka, de yomakapake kaitimaronga ka 'onau manga singina ma mau.

²⁰ Ma ngini ko koge'enawa! Ngini nimadotokokau ma ngale ma Kristus so wininakokau.

²¹ Ma raiokau ngini winigi'isenokau 'una, de ngini ge'ena to 'una 'awi do-domoteke, ngini nisidotokokau 'o habari 'iti-tiai ma ngale 'o Yesus!

²² Sababu ge'ena niamada nia gokoie de nia gogeruku 'isoka ma sira gee koniongakuwasi 'o Yesusika, gee nia 'ahu yosito-torou de 'o sagala nyafisuu gee nisiliba-liba.

²³ Salingou 'ania singina de nia di-dibangi 'iodumu 'idadi ma sungi.

²⁴ Tanu ngini nio'ahu 'isoka 'o nyawa ma sungi gee ma Jo'oungu ma Dutu wosidadiku moteke to 'una wi dulada; ge'ena la 'o gokoie de 'o gogeruku 'iti-tiai, 'ibo-boooto de 'itebi-tebini.

²⁵ Sababu ge'ena 'uwau nimakakaelu-eluku. Ma 'ena gee niobi-bicara moi de moika ge'ena salingou ma gou-goungu, sababu ngone poodumu ne'ena ma Kristus 'awi roese ma kia sonaa.

²⁶ Nako ngini niongamo, 'uwa niosimadaka nia do'otasa ge'ena sigado niosowono. 'Uwa niongamo niatoobiruku,

²⁷ la 'o Tokata ma Koana 'uwa 'o 'orasi 'imadamake ma ngale nitaili.

²⁸ 'O nyawa gee yotosi-tosiki, salingou yomaogoro yotosiki. De salingou yomanarama yomakua-kuata de 'iloa-loa ma ngale manga 'inomo yomadononu, de yakiriwo 'o nyawa gee yakisidu-dukurangi.

²⁹ Nako ngini niobicara, 'uwa niopake 'o demo-demo 'ito-torou. Ma 'ena niapake 'o demo-demo gee yaowa-owa, gee yakisikuata de yakiriwo 'o nyawa 'iregu. 'O demo-demo koge'ena 'asa yakisidadi laha 'o nyawa-nyawa gee yo'ise-'isene.

³⁰ 'Uwa niosibalisa 'o Ngomasa 'Itebi-tebini. Ngini nisino-nakokau de 'o Ngomasa 'Itebi-tebini niodadi to ma Jo'oungu ma Dutu wi 'umati, sigado ya'adono ma 'orasi ma Jo'oungu ma Dutu winisilaha.

³¹ 'Uwau nia singina 'isiri-siri, nia singinaka nimadonoaku, de nimakakangamo. 'Uwau nimakalawani de niakisito-torou 'o nyawa, de 'uwau niodiai 'o sagala dorou.

³² Ma 'ena ngini salingou nia singina 'isure de nimakadora moi de moi, de 'uwa niosi-singina 'o nyawa manga sowono nginika, 'isoka ma Jo'oungu ma Dutu mita kowosi-singinawa to ngini nia sowono. 'Una kowosi-singinawau nia sowono, ma ngekomo pomarimoiokau de ma Kristus.

Efesus

Video Efesus 4

Ikuti Kami:

KONTAK | PARTISIPASI | DONASI