Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia tee aku', to ditarungku nasaba' mpangjamanna' Puang, meta'dana' lako kamu' kumua ia to sipa'mi la sipato' susi sipa'na umma'-Na Puang Allataala, nasaba' mangkamo kamu' dipilei menjaji umma'-Na.

² Danggi' mimatampo, sipangkada rampa' kamu', sisabbarasan kamu' ammisipakamoja' too.

³ Mipengkulle-kullei tatta' sikalino ammida'tan nnampuii to kamangmesan penawa napaden Roh Allataala.

⁴ Ia to tomatappa' dipasangrapang mesa' batang kale. Mesa' toora Roh Allataala. Susi too mesa'ra to mirannuan jio mai Puang Allataala to mangka mpilei kamu' menjaji umma'-Na.

⁵ Mesa'ra Puang, mesa'ra kamatapparan, mesa' toora pangjioran.

⁶ Mesa'ra Puang Allataala, to napuambe' sininna tau. Iamo Puangna sininna tolino, Ia toomo ngkuasaii sininna issinna lino na torro too lan kaleta'.

⁷ Pada ntarimamiki' barakka' jio mai Almaseh situru' pakkaeloran-Na.

⁸ Susi to diuki' lan Sura' Allataala mpau Almaseh kumua, "Ia tonna mangka ntaloi ewalinna, endekki de' ngenan kaminang majao, mbawai buda todirampa, na mben barakka' tolino."

⁹ Apara battuananna joo kada? Ia ke dikua, "Endekki" battuananna denmo namellao do' ngenan kaminang majiongna lino.

¹⁰ Jaji, Ia to Almaseh to mangka mellao, Ia toomo mangka endek de' ngenan majaoannapa na langi', kumua napasukku'i to sininna apa lan lino.

¹¹ Pada nabenni barakka' to umma'-Na. Den to napupenjaji rasulu', den to napupenjaji nabi, den to napupenjaji tompangpeissenan Kareba Kasalamatan, den to napupenjaji guru iarika tonnurusu' jamaa.

¹² Nabenni joo barakka' anna kullei umma'-Na mpangjamanni na pamawatang tooi kamatapparanna to umma'-Na to dipasangrapang batang kale-Na Almaseh.

¹³ Ia ke susimi joo, memmesa' penawamiki', nasaba' pada matappa'miki' lako Anak Allataala na pada tapahangngi kumua indara Ia. Tomasaranianki' na samasai-sainna arannai sukku'ki' susi Almaseh.

¹⁴ Te'damo tasusi tontamane' matappa' napamale melako mangrupa-rupa pangngajaranna tokalasi, to madoang mpalao sala ba'tu nnuragaki'.

¹⁵ Apa nturu' tonganmiki' pangngajaran tongan na sipakamoja' tooki'. Na samasai-sainna menjajimiki' susi Almaseh lan sininna passalan. Iamo dipasangrapang ulu,

¹⁶ na ia tee kita' dipasangrapang mangrupa-rupa lesoan batang kale-Na Almaseh. Te'da natiseran joo kale, nasaba' Almaseh nnampaii. Saloboh-lobohna na samawatang-watangna to kale, ke sipakamoja'ki' na pada mpangjamanki' Puang situru' barakka' to mangka dibenki'.

¹⁷ Kuasan-Na Puang kupangngingaran kamu' kumua, "Danggi' omo mimessipa' susi totangnturu' Puang Allataala." Tangsipato'na bang to napikkiri' tuu lako tau,

¹⁸ na te'da namapahang. Te'da naampa' katuoan baru to nabenni Puang Allataala, sanga te'da naissenni to pangngajaran tongan na tangmangpesa'ding tooi.

¹⁹ Te'da namasiri', anna kamadoangan gaja'na bangra naturu', nampugauk mangrupa-rupa panggaukan to tangsipato'na.

²⁰ Na ia to Almaseh to diajaran kamu' te'da ia nasusi sipa'na joo.

²¹ Katongananni Ia. Misa'dingmo to pangngajaran-Na. Na mangkamo kamu' diajahhi to sipa'-Na.

²² Midiajahhi kumua la mipatorro to sipa' jolomi. Danggi' mituru' omo kamadoangan gaja'mi to mpalao sala kamu' ammimasolang.

²³ Sibalikanna la misulleimi to sipa'mi mipemeloii to penawammi,

²⁴ ammipamulai to katuoan baru situru' pakkaeloran-Na Puang Allataala. La maruruh na tongan to panggaukanmi susi sipato'na tau mesan-Na Puang.

²⁵ Ee, tomala'bihku'! Danggi' mimangkada tangtongan lako padammi rupa tau, apa maruruh kamu' mpaui to tonganna, nasaba' umma'-Namo kamu' Almaseh.

²⁶ Ia ke mabirih kamu', danggi' mipugauk dosa. Danggi' paratui lako kabuh allo ke mabirih kamu',

²⁷ anna danggi' naden wattunna Ballisi' ssede kamu' mpugauk dosa.

²⁸ Ia to tobiasa boko, danggi'mo naboko. Apa la maruruhri mangjama, naampa'i to la naputuona, nawa'ding too ntulungngi to tomakario-rio.

²⁹ Danggi' mimangkada to napumasolang tau, apa kada mpamasumanga'ra to napumelo to tossa'dingngi anna nnampa' barakka'.

³⁰ Danggi' mipugaukki to apa ssussai Roh Allataala to torro lan kalemi. Ingaranni kumua ia to katorroan-Na lan kalemi, iamo buttinna kumua umma'-Namo kamu' Puang Allataala. Na Iamo la mikanassai kumua la napasalama' kamu' Puang Allataala jio mai pangsessa ke Kiama'mi lino.

³¹ Danggi' mimapa'dik ati, mangpabalah, magalli, massipura, ngkada-kadai tau, maba'ci ba'tu laennapa.

³² Apa la sipemeloan penawa kamu', misikamasean, misidampangan too susi Puang Allataala ndampangan kamu' nasaba' Almaseh.

Efesus

Video Efesus 4

Ikuti Kami:

KONTAK | PARTISIPASI | DONASI