Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Udi sebabni nyak -- sai jelma tahanan, sai ditahan ulihni ngelayani Tuhan -- ngilu nihan jama niku: hurikdo nutuk kedudukanmu sebagai ulun sai radu diurau ulih-Ni Allah.

² Hagani keti selalu rendah hati, lemoh lembut rik sabar. Tunjukkodo kasihmu jama nulung peperda keti.

³ Berusahado temon-temon untuk hurik damai in kesatuan sai diciptako ulih Ruh-Ni Allah tetap tepelihara.

⁴ Angkah wat sai badan rik sai Ruh. Reno juga keti diurau untuk sai harapan sai gegoh.

⁵ Angkah wat sai Tuhan, sai iman, sai baptisan,

⁶ rik sai Allah sai jadi Bapa sunyin jelma. Iado Tuhan semesta alam, sai beguai liwat sunyinni, rik bekuasa di delom sunyinni.

⁷ Ram masing-masing nerima suatu pengenian nutuk api sai dikeniko ulih-Ni Almasih.

⁸ Delom Alkitab tetulis, "Waktu Ia cakak mik rang sai paling langgar, Ia ngusung lamon tawanan; rik Ia ngeni pengenian-pengenian jama manusia."

⁹ Nah, kik diucakko "Ia cakak" retini Ia mula-mula radu regah sampai mik rang sai serebah-rebahni di bumi inji.

¹⁰ Rik Ia sai radu regah udi, Iado juga sai cakak sampai mik rang sai jaoh lebih langgar jak sunyin langit sehingga sunyin alam semesta diisi jama kehadiran-Ni.

¹¹ Iado sai "ngeni pengenian-pengenian jama manusia", sebagian diangkat-Ni jadi rasul, sai bareh jadi nabi, sai bareh lagi jadi pengeni kabar Kabar Betik udi, rik sai bareh muneh diangkat-Ni jadi guru-guru rik jelma sai memelihara jemaah.

¹² Inji diguaiko-Ni in umat-Ni Allah dilengkapi sepenuhni in dapok ngelayani Tuhan rik ngebangun badan Almasih.

¹³ Renodo ram sunyin jadi sai ulih iman sai gegoh rik pengertian sai gegoh tentang Anak-Ni Allah. Rik ram jadi jelma-jelma sai dewasa sai makin saka makin betambah sempurna injuk Almasih.

¹⁴ Maka ram mak jadi sanak-sanak lagi sai mak tantu rik teusung mik dija mik dudi ulih arus bemacam-macam ajaran jak jelma-jelma sai licik. Tian nyesekko jelma jama tipu muslihat tian.

¹⁵ Mawat! Sebalikni ram harus nyatako hal-hal sai benor jama hati penuh kasih, in delom sunyin hal ram makin saka makin jadi sempurna injuk Almasih, sai jadi kepala ram.

¹⁶ Di debah pimpinan-Ni, sunyin anggota badan udi tesusun rapi, rik saling dihubungko ulih sendini masing-masing. Rik kik unggal anggota udi beguai injuk sai seharusni, maka sunyin badan udi haga betumbuh jadi dewasa rik kuat liwat kasih.

¹⁷ Ulihni seno demi gelar-Ni Tuhan, injido sai haga kucawako rik kutegasko: dang lagi hurik injuk jelma-jelma sai mak kenal jama Allah, rik mikerko sai mawat-mawat.

¹⁸ Pikeran tian radu kelam. Tian mak kenal jama hurik sai dikeni ulih-Ni Allah, mani tian sama sekali mak ngedok pengetahuan api-api tentang Allah. Tian injuk reno, mani keras ulu.

¹⁹ Tian radu mak ngedok perasaan meliom lagi, sehingga tian nutuk sunyin nafsu, rik hurik hajor sesuka hati.

²⁰ Kidang Isa Almasih sai keti kenal lain injuk reno!

²¹ Keti radu ngedengi tentang Ia! Rik sebagai jelma-jelma sai nutuk Ia, keti radu diajar juga tentang sifat-sifat-Ni Allah sai wat jama Ia.

²² Ulihni seno lepasko manusia saka jama cara kehurikan saka sai lagi dicadangko ulih kehagaan-kehagaanni sai nyesekko.

²³ Hagani hati rik pikeranmu dibaharui sunyinni.

²⁴ Hagani keti hurik sebagai manusia ampai sai diciptako nutuk rencana-Ni Allah; yakdo jama tabiat sai benor, lurus rik suci.

²⁵ Ulihni seno Puari-puari sunyinni, dang lagi bebuhung. Belakudo jujor peperda keti, mani ram sunyin, jama-jama anggota badan-Ni Almasih.

²⁶ Kik keti butong, dangdo naganko kebutonganmu ano nyebabko keti bedusa. Dangdo butong sepanjang rani,

²⁷ in iblis mak mansa kesempatan.

²⁸ Jelma sai biasa maling harus taru maling. Sebalikni ia harus beguai in mansa nafkahni jama jujor rik dapok nulung jelma sai kekurangan.

²⁹ Kik keti cawa, dang makai cawa-cawa sai kamak. Pakai gaoh cawa-cawa sai ngebangun rik ngeni tulung jama ulun bareh. Cawa-cawa injuk reno haga ngeratongko kebetikan jama ulun-ulun sai ngedengini.

³⁰ Dang nyedihko hati Ruh-Ni Allah. Keti radu dimeteraiko jama Ruh, jadi kedau-Ni Allah. Ruh udi juga merupako jaminan bahwa Rani Pembebasan haga ratong bagimu.

³¹ Lebonkodo sunyin perasaan sakik hati, dendam rik butong. Dang lagi mekik-mekik rik maki-maki. Dang lagi wat perasaan nyuoh atau perasaan bareh injuk reno udi.

³² Sebalikni, hagani keti betik hati rik wat belas kesian peperda keti, rik saling ngampuni gegoh injuk Allah pun ngampuni keti liwat Almasih.

Efesus

Video Efesus 4

Ikuti Kami:

KONTAK | PARTISIPASI | DONASI