Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Keranaq nike tiang -- sopoq tahenan, saq tetahen lantaran jari pelayan Tuhan -- tiang bẽng nasẽhat, adẽq idupde sebagẽ dengan-dengan saq sampun temanikang siq Allah, idup maraq maksut Allah ngemanikang side.

² Side pade harus tetep rendah atẽ, lemah lembut, dait sabar. Petitoqang kasihde siq care saling tulung sopoq kance saq lain.

³ Dait pade berusahe meliharaq kesatuan Roh siq care kadu damẽ sejahtere jari pengiketne:

⁴ Sopoq awak, dait sopoq Roh, pade maraq side sampun temanikang tipaq sopoq pengharepan saq araq dalem maksut Allah ngemanikang side.

⁵ Cume araq sopoq Tuhan, sopoq iman, sopoq baptisan,

⁶ sopoq Allah dait Bapa lẽman selapuq, Allah saq lẽq atas selapuq dait siq selapuq dait bekarye langan dait lẽq dalem selapuq.

⁷ Sopoq-sopoq ite nerimaq rahmat menurut ukuran saq teicanin siq Almasih.

⁸ Lẽq dalem Kitab Suci tetulis, "Sewaktu Ie taẽk ojok taoq saq paling atas, Ie gadingang luwẽq tawanan; dait Ie ngicanin paice-paice tipaq manusie."

⁹ Nah, lamun teparan "Ie taẽk" artine Ie tetu-tetu sampun turun jangke taoq saq paling bawaq lẽq gumi niki.

¹⁰ Dait Ie saq sampun turun nike, Ie ẽndah saq taẽk jangke taoq saq jaoq atasan lẽman selapuq langit jari penoqang selapuq-lapuqne.

¹¹ Ie saq ngicanin rasul-rasul dait nabi-nabi, dengan-dengan saq nyampẽang Kabar Solah dait pemimpin-pemimpin jemaah dait guru-guru jemaah.

¹² Hal nike Ie laksaneang jari ngelengkapin dengan-dengan saq tehususang bagi Allah jari pegawẽan pelayanan, jari pembangunan rage Almasih.

¹³ Siq care nike ite selapuq jari sopoq siq iman saq pade dait pengertian saq pade mengenai Bije saq asalne lẽman Allah. Dait ite jari dengan-dengan saq dẽwase, saq sayan ngonẽq jari sayan sempurne maraq Almasih.

¹⁴ Make ite ndẽq jari kanak-kanak malik saq ndẽq tetep pendirian dait tejauq ketoq-ketẽq siq macem-macem pengajahan lantaran tipu muslihat manusie dait lẽq dalem kelicikan ie pade saq nyesatang.

¹⁵ Sebalikne, ite harus nyatayang kebenaran siq atẽ saq penoq kasih, sehingge dalem selapuq hal ite sayan ngonẽq jari sayan sempurne maraq Almasih saq jari kepalente.

¹⁶ Lẽq bawaq pimpinan-Ne, selapuq anggote awak nike tesusun rapi, dait saling tehubungang siq sendi-sendine sopoq-sopoq. Dait lamun sebilang anggote nike begawẽan maraq saq seharusne, make selapuq awak nike gen jari sayan dẽwase dait kuat langan kasih.

¹⁷ Keranaq nike demi pesẽngan Tuhan, niki saq gen tiang sampẽang dait tegesang: Sampunang malik idup maraq dengan-dengan saq ndẽq kenal kance Allah siq pikiranne saq sie-sie.

¹⁸ Pikiran ie pade nike sampun bute. Ie pade ndẽq kenal kance kehidupan saq teicanin siq Allah, sẽngaq ie pade tetu-tetu bodo dait pagah.

¹⁹ Ie pade sampun ndẽq bedowẽ rase ilaq malik, sehingge ie pade turut selapuq napsune, dait serakah gawẽq perbuatan saq cabul.

²⁰ Laguq side pade ndẽq maraq nike. Side pade sampun berajah jari kenal kance Almasih.

²¹ Sẽngaq side pade sampun dengah mengenai Ie dait nerimaq pengajahan lẽq dalem Ie menurut kebenaran saq nyate lẽq dalem Deside Isa.

²² Keranaq nike tetẽh selapuq tabiat manusiende saq laẽq, saq kenyeke nyẽdaq siq kemẽlẽq-kemẽlẽq saq nyesatang.

²³ Roh dait pikirande harus tejariang baru selapuqne.

²⁴ Side pade harus idup jari manusie baru saq tecipteang menurut pekayunan Allah lẽq dalem kebenaran dait kesucian saq setetune.

²⁵ Keranaq nike semeton senamian, sampunang malik beduste. Side pade harus jujur sopoq kance saq lain, sẽngaq ite selapuq pade-pade jari bagian jemaah Almasih.

²⁶ Lamun side pade sili, ndaq alurang hal nike jari penyebap side pade bedose. Ndaq sili sejeloan,

²⁷ adẽq Belis ndẽq mauq kesempatan.

²⁸ Dengan saq biase memaling harus engkah memaling. Sebalikne ie harus begawẽan adẽqne mauq napkahne secare jujur dait mauq nulung dengan saq kekurangan.

²⁹ Lamun side pade ngeraos, ndaq kadu ucapan-ucapan saq kotor. Kadu ucapan-ucapan saq solah saq bau ngajah dait nulung dengan lain. Ucapan-ucapan saq maraq nike gen datengang rahmat tipaq dengan-dengan saq dengah.

³⁰ Ndaq miaq Roh Allah jari asẽq. Side pade sampun tesahang siq Roh Allah bahwe side pade jari dowẽn Allah. Roh nike ẽndah jari jaminan bahwe jelo penyelametan gen dateng tipaq side.

³¹ Tetẽh selapuq rase sakit atẽ, dendem, sili, betungkasan dait nyumpaq-nyumpaq. Ndaq malik araq rase meriq atao perasaan lain saq maraq nike.

³² Sebalikne, side pade harus gerasaq dait murah atẽ sopoq kance saq lain, dait saling ngampunin pade maraq Allah ngampunin side pade langan Almasih.

Efesus

Video Efesus 4

Ikuti Kami:

KONTAK | PARTISIPASI | DONASI