Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi ini punneh ui ini, Paulus, luk pangeh kiling ngaceku Tuhan, mutuh nemuyuh mulun petulu dengan tawar luk inan muyuh pangeh tinawar ineh.
2 Do' muyuh mebeneh niat, melaya' niat, idi mulai niat. Idi teh do' ngegala' awa muyuh idi ngedengan seburur dengan seburur.
3 Do' muyuh mekél ngita rurum luk biré Roh Allah nemuyuh, dengan abet awang idi pedo'.
4 Inan sebuleng burur idi sebuleng Roh mepad kudeng inan sebuleng rapet luk inan muyuh pangeh tinawar Allah.
5 Inan sebuleng Tuhan, sebuleng anu, idi sebuleng rereb.
6 Inan sebuleng Allah idi Taman kuan amung lemulun. Ieh ineh Tuhan pa luun amung-amung, idi Ieh ngakem bang luk amung-amung. Ieh idi bang luk amung-amung teh.
7 Anid-anid burur tau ngalap baré luk petulu maya' babpat luk biré Keristus ineh.
8 Maya' kudeng luk inayud, "Kareb Ieh numak iné' dita' Ieh nenguit mula' lemulun luk tiban; idi Ieh nemaré baré kuan lemulun."
9 Anunké ilung bala, "Kareb Ieh numak"? Ilungneh, pun-pun Ieh netemurun — ieh ineh macing nan tana' luk pa liang tu-tu.
10 Idi Ieh luk pangeh netemurun, Ieh ineh teh luk pangeh numak meluun dita' ratnan amung-amung langit ineh, pelé Ieh miak manu' luk amung-amung.
11 Ieh luk maré baré-baré kuan lemulun. Ieh nengiding sebuang lemulun mangun ku rasul-rasul, sebuang mangun ku nabi-nabi, sebuang mangun ku lun mada' Bala luk Do', idi sebuang mangun ku gembala idi guru.
12 Ieh nenganau' ini pad ngeletep lun manu kuan kekamen Tuhan, pad ngetueh burur Keristus.
13 Kudeng ineh teh amung-amung tau macing inan sebuleng rurum bang anu idi ileh ratnan Anak Allah. Tau mangun ku lun merar luk iuk-iuk amé' meriput petulu dengan rayeh Keristus.
14 Pad tau na mangun ku anak-anak peh luk lipak-lipak mepad kudeng ribut luk iniup amung-amung bui bada' luk bida' lemulun dengan saluk idi ilehdeh luk dat ineh, idi luk ngeraruh lemulun ku ilehdeh ineh.
15 Iamo' dengan pebala luk matu dengan awa, do' tau mangun meriput bang Keristus luk mangun ku Lun Rayeh.
16 Pa liang imet Keristus amung babpat burur ineh mepamung idi burur ineh petutum ngaceku ratnan anid-anid lawa' tulang luk tinina' kuanneh. Idi kareb anid-anid babpat ngakem maya' luk petulu, amung burur ineh temubu' idi uen ngetueh bang awa.
17 Bang ngadan Tuhan, ui pebala idi mada' nemuyuh: aleg muyuh mulun maya' lawé lun pupu baken luk maya' terawédeh luk mo'-mo';
18 idi terawédeh medacem. Ideh na ngalap babpat bang ulun luk biré Allah ngaceku ideh mebacé idi metueh niat.
19 Na ideh mileh migu'. Ideh maré bururdeh kuan kekamen luk dat, idi megéi' nganau' amung-amung kekamen luk melutak.
20 Iamo' baken kudeng ineh luk inan muyuh sibada' ratnan Keristus!
21 Matu muyuh pangeh neninger ratnan Ieh, idi muyuh pangeh nesibada' ratnan Ieh, maya' luk matu luk ginala' bang Yésus.
22 Ngaceku ineh do' nala' ulun muyuh luk mon luk nenguit nemuyuh mulun maya' ulun muyuh luk atun luk uen ngaté ngaceku pinianneh luk naluk.
23 Do' amung terawé muyuh idi niat muyuh ruen mebaruh.
24 Do' ngayung ku ulun luk mebaruh, luk inau' maya' ayu Allah, idi luk uen ngegala' bang ulun luk matu, mesiri, idi meligan.
25 Ngaceku ineh do' muyuh ugka' mebalih. Do' anid-anid muyuh pebala luk matu kuan kinanakneh, ngaceku amung-amung tau pad-pad mangun ku babpat burur Keristus.
26 Kudeng muyuh museh, aleg nganau' sala', aleg muyuh nganug useh muyuh pad aco macep.
27 Aleg muyuh maré luk inan kuan Iblis.
28 Lemulun luk pekalai mano, do' ieh ugka' mano peh, idi meluun do' ieh merur nakap luk kuan bururneh sebuleng, pad ieh miak maré kuan lun masi'.
29 Aleg ngeruat bala luk dat, iamo' ngeruat bala luk do' idi luk petulu pad ngacing peruan kuan lemulun luk ninger bala muyuh ineh.
30 Idi aleg muyuh ngesusa' Roh Allah luk meligan luk inan muyuh pangeh itu pad macing aco ulu'.
31 Do' amung-amung luk mepét, megateh nait, useh, kedaluh, idi kuyo talan rat arang muyuh dengan amung-amung luk dat.
32 Do' muyuh méi' seburur dengan seburur, idi mebeneh niat, idi pedo' seburur dengan seburur, mepad kudeng Allah pana' bang Keristus pangeh nemaré do' kuan muyuh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA