Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kai ene hakịu iạ -- sěngkatau taumatan tahungkụ e, mạtatahungkụ u pẹ̌tatangkiang Mawu -- mědẹ̌dorong sěngapang botonge si kamene; pẹ̌biahe tuhụ kal᷊aianengu kere sěngkatau seng nikuiangu Ruata.
2 Pakasasanạ bue naung i kamene ringangu pakasasikome ringangu pakananandu naung. Pěnodẹkong kakěndagu ringangu pẹ̌tatatul᷊ung sěmbaụ dingangu wal᷊ine.
3 Pẹ̌tatětehẹ̌ko ringangu kạguwạu naung mẹ̌biahẹ̌ dingangu pẹ̌darame tadeạu kasasěmbaụ ual᷊ingu Rohkẹ̌ u Ruata e tatapẹ̌be mạpapadul᷊i.
4 Kětạeweng badang sěmbaụ dingangu Rohkẹ̌ sěmbaụ. Kerene lai i kamene kẹ̌kuiang baugu pělaharapẹ̌ man sěmbaụ e.
5 Kětạeng sěmbaụ Mawu e, mang sěmbaụ pěngangimang mang sěmbaụ sasahani,
6 kụ mang sěmbaụ Duata nakoạ i Amang u patikụ taumata. Kai i Sie Mawun sarul᷊uang apan munarane tụtausu kěbị, dingangu kawasa su ral᷊ungu patikụ.
7 I kitẹ sěngkatau-sěngkatau e nakatarimạ u ghaghěllị tuhụewe kakěpal᷊e nighěllị i Kristus.
8 Su ral᷊ungu Winohẹ Susi e kạbawohẹ, "Piạ i Sie nẹ̌těngkasapuạ sol᷊ong marangẹ e, i Sie kai nakawawa taumata nitaweng lawọ; dingangu něngonggọu manga laonggọ su taumata."
9 Ho, kereu nịbawera, "I Sie nẹ̌těngkasapuạ" mangal᷊ene i Sie kụ humotonge seng limintụ sol᷊ong tampạ kasanakenge su dunia ini.
10 Kụ i Sie seng limintụ ene ute mal᷊aing i Sie nẹ̌těngkasapuạ limembong karangẹ e wọu patikụ l᷊angị hakịewem patikụ sarul᷊uang e nal᷊oho su rarěntane.
11 Kai i Sie "mạngonggọu manga laonggọ su taumata", sěnggạ nịlahengkẹ nakoạ manga rarolohang, sěnggạ nakoạ manga nabi; sěnggạ e wue ute nakoạ mělahabaru Injilẹ̌, dingangkewelai i sire wal᷊ine ute nihengkẹ e nakoạ manga mananěntiro dingangu měmamadul᷊i jamaatẹ̌.
12 Ini e kinoạ'E tadeạu apang kawanuan Duata e niapakasukụ e pinakapia tadeạu makatangkiang Mawu e ringangu makapělanging badang i Kristus e.
13 Ual᷊ingu ene ute i kitẹ kěbị nariadi sěmbaụ ual᷊ingu pěngangimang mẹ̌sul᷊ung dingangu katatahuěnna mẹ̌sul᷊ung mạanung Ahusu Ruata. Kụ i kitẹ e nakoạ matatěllang kakạděngụe kạkasukụe su ral᷊ung i Kristus.
14 Tangu i kitẹ e ute wal᷊inewe wědang kere manga rariọ tal᷊awuọ ipẹ̌darerehe ringangu ipẹ̌daruruhu anging tamai ramahi kahian sěllihu haghin těntiro měngakal᷊ẹ̌. I sire kai makapal᷊idẹ̌ taumata ual᷊ingu pěngangakal᷊'i sire.
15 Kumbahang! Kai i kitẹ e harusẹ̌be mapakal᷊ahẹu katul᷊idẹ̌ dingangu ral᷊ungu naung napenẹu kakěndagẹ̌, hakịu ene ute su ral᷊ungu patikụ munara e i kitẹ kakạděngụe mang kakạsukụe kere i Kristus, nakoạ těmbọ i kitẹ e.
16 Kai su ral᷊ungu pěngangahạ'E, patikụ laesu wadang ene e nahundugẹ̌ mapia, ringangu piạ pẹ̌dal᷊ahěmpukang e sěmbaụ dingangu wal᷊ine ual᷊ingu lensorange sěmbaụ-sěmbaụ. Kụ kereu apan laesu wadange měmunara tuhụewe hinone ute, patikụ badange ene sarung tumendang mase matoghasu pẹ̌kakakěndagẹ̌.
17 Batụu ene su arengu Mawu, tangu iạ mẹ̌bera ringangu mẹ̌dorong ini sěngapam botonge; kumbahang bue saụ mẹ̌biahẹ̌ kere taumata wẹ̌gan Duata měngkate mědẹ̌dal᷊ahaghin tiněnna tạ kěhase.
18 Sipirang i sire e seng marěndung. I sire seng tawe makakiral᷊a pẹ̌bawiahẹ̌ nionggọu Mawu Ruata, u i sire mamben těnga-těngadẹ̌ tawẹ kasingkạ i sire apa-apa mạanun Mawu. Kakoạ i sire kerene ual᷊ingu kai runia těmbọ i sire makakětị.
19 I sire semben tawẹ pěndange mamea lai, hakịu i sire měngkate tụtuhụ abul᷊i ringangu mạhimatụ mawuang.
20 Arawe i Kristus Yesus seng kinasingkateng i kamene e wal᷊inewe kerene!
21 I kamene seng masingkạ i Sie! Kere tumatol᷊en'E, ute i kamene mal᷊aing seng nitěntiroěng u kakakoạ u Ruata e tẹ̌taghuaneng'E!
22 Batụu ene i kamene e pěmpěluạkon taumata těbe ringangu pẹ̌bawiahẹ̌ těbe seng kakạgolange ual᷊ingu haghing kapulu makạpal᷊idẹ̌.
23 Karimạko ral᷊ungu naung dingangu tiněnnanu e pakasueko pakatal᷊imbuhu.
24 I kamene pěmpẹ̌biahẹ̌ko tabidạu taumata wuhu niriadi tuhụ koạ u Ruata; ringangu tabiete suhinone matul᷊idẹ̌ dingangu susi.
25 Ual᷊ingu ene manga anạ u sěmbaụ e pakatatul᷊idẹ̌ko i kamene sěmbaụ dingangu wal᷊ine. Abe kowe pěmpẹ̌konti, batụu i kitẹ e kawe lawọbe laesu wadang i Kristus.
26 Kamageng i kamene sawelang u pẹ̌du, ute kumbahangbe měmpẹ̌sal᷊a. Pẹ̌dung kamene piawe kasědakeng u ěllo,
27 tadeạu setang tawe makaěbạ loahe.
28 Taumata nanarang mẹ̌tako e harusẹ̌be mangědo mẹ̌tako. Su sěmběkane i sie harusẹ̌ mẹ̌těngkasaghedẹ̌ tadeạu makahombang pẹ̌bawiahe ringangu katul᷊idẹ̌ dingangu makaambangbe apang kẹ̌kawusange.
29 Mageng i kamene měmpẹ̌bisara ute, kumbahang měngkai kạberane wawera maral᷊amuhụ. Pianẹ e měbẹ̌beram bawera makạbangung dingangu makạonggọu tul᷊umang su taumata wal᷊ine. Wawera kerene e sarungbe makakarěntan kal᷊auntung su manga taumata apam makạdingihẹ̌ e.
30 Kumbahangbe mapakasusan Rohkẹ̌ u Ruata e. I kamene seng nilaakun Rohkẹ̌, nikoạ tataghuanengu Ruata. Rohkẹ̌ e mal᷊aing nakoạ tatiala u ěllong karal᷊iwirẹ̌ e sarungbe ruměnta waug'i kamene.
31 Hipeko kal᷊awọu kurang u naung, kindorẹ, dingangu pẹ̌du. Kumbahangbe měngkai měmpěmansagẹ̌ dingangu měngkai mẹ̌darohang. Kumbahang měngkai lai piạ pěndangu pẹ̌bawinsị arau pěndang kewe lai wal᷊ine sihinge.
32 Su sěmběkane ute, naung i kamene e pakapapiako ringangu pěmpẹ̌kakěndagẹ̌ bue sěmbaụ su wal᷊ine ringangu pěmpẹ̌gaghěllịkong ampung kerẹewe lai Mawu Ruata mal᷊aing něngonggọu kal᷊aampung si kamene su ral᷊ung i Kristus.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA