Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ma Kristus ngaro wosongenokau ma wisimomikokau, so ngini mita nisiwangokau de ma Kristus. Sababu ge'ena salingou nianonu 'okia naga gee daku 'o sorogaaka, kiaka ma Kristus wopareta de ma Jo'oungu ma Dutu.

² Salingou niosi-singina 'okia sonaa gee daku 'o sorogaaka, la 'uwa ka gee 'o duniaka.

³ Sababu ngini nimasidosongenokau de ma Kristus so ne'ena ngini niomarimoi de ma Kristus de 'ania 'ahu ma dutu naga ma Kristusoka. De nia 'ahu ma dutu ge'ena kowosidumutuawasi.

⁴ To ngini 'ania 'ahu ma dutu ge'ena la ma Kristus. So dua gee 'una woboali 'o duniano, ngini mita 'asa de de 'una 'awi kumati ma sigoronaka.

⁵ Sababu ge'ena, salingou ma gou-goungu niamada 'iso de 'o nyafisuuou ma dorou gee naga nginioka, gee 'imau ngini niomakapake kanio'itimaronga matero ka 'o kaso, niodi-diai 'o dorou, de niomau ka ngini nimadolomu 'o harataa. Niomau ka ngini nimadolomu 'o harataa ge'ena kaimatero de 'o barahala niasuba.

⁶ 'O nyawa gee ge'ena 'iodumu yadi-diai 'asa ma Jo'oungu ma Dutu wakihukumu.

⁷ Ma sira ngini mita niodi-diai 'o dorou koge'ena, gee ma 'orasi ngini niparetano 'o nyafisuu ma dorou ge'ena.

⁸ Ma ne'ena ngini niongakuokau ma Kristusika, salingou nimaogoro niodiai 'ito-torou, ge'ena la 'uwau niotabangamo, nito'otasa, nia singina 'itorou 'o nyawaka de 'uwa 'o nyawa manga ronga ma dorou niodi-diai bolo 'uwa niosisupu 'o demo-demo gee koyadaenuwa niosisupu.

⁹ 'Uwau nimakakaeluku moi de moi, sababu ma sira nia 'ahu 'ito-torou gee niamadakau.

¹⁰ Ne'ena ngini niamakekau 'o 'ahu ma sungi, ge'ena la niamadakau 'ania di-diai 'ito-torou gee 'isoka ma sira. 'Ania 'ahu ma Jo'oungu ma Dutu wadiaiokau ma sungi, gee ne'ena naga kowomaogo-ogoruwa wadiai la 'ifoloiosi 'isure 'isoka 'unali. Ge'ena ma dumutu la ngini wininako de winisahe 'itiai ma Jo'oungu ma Dutu.

¹¹ Ngini 'ania 'ahu ma sungiou, ge'enau so koi'iwau 'isikakaregu ko 'o Yahudiokawa bolo 'o Yahudioka, yomasuna-sunaka bolo koyomasuna-sunawa. Mita koi'iwau 'isikakaregu 'o nyawa ma dudunino bolo gee 'o bongana ma nyawa, 'o yongosi bolo ko 'o yongosuwa. 'Iodumu ge'ena kaimatero sababu pomarimoi de ma Kristus de 'unau 'ifoloi wodaduie de 'o sagala moi-moi.

¹² De ngini ge'ena ma Jo'oungu ma Dutu 'awi 'umati. Ma Jo'oungu ma Dutu winisibosono de winiirikokau niodadi to 'una 'awi 'umati la winileleani duga ka 'una. Ge'enau so ngini salingou niakisingina 'o nyawa-nyawaka, nia singina 'isure, 'uwa nimadaduie, niobicara nimasidi-diai 'o nyawaka, de niosabari 'o sangisara ma sigoronaka.

¹³ Ngini salingou niosabari moi de moika, 'uwa niosi-singina 'o nyawa manga sala nginika de 'uwa nimadonoaku nia singinaka. Ma Jou kowosi-singinawau to ngini nia so-sowono, so ngini mita salingou 'uwa niosi-singina 'o nyawa manga so-sowono.

¹⁴ De 'ifoloiosi 'iparaluu ge'ena la ngini salingou nimakadora, sababu de 'o dorau ge'ena so ngini nioodumu ma gou-goungu nimarimoi.

¹⁵ Salingou 'ania butusangi moteke 'o go-gasa ma owa ma Kristusino gee naga 'ania singinaka. Sababu ma Jo'oungu ma Dutu winiirikokau niodadi matero ka 'o roese moi de ma kia sonaa, la nio'ahu nimakakasa-sanangi de 'o singina 'isa-sanangi gee ma Kristusino. De salingou kaitaurika niokasamaowa ma Jo'oungu ma Dutuka.

¹⁶ Salingou niosi-singina ma Kristus 'awi do-dotoko gee posironga de ma barakatioka, la nio'ahu moteke 'awi do-dotoko. De ngini salingou de nia cawaro nimakadotoko moi de moi, de nimasikatiari moi de moi. Nio'amalaha ma Jo'oungu ma Dutuka de niosinyanyi 'o Mazmur, de nionyanyi winisiarene, de nia jaru 'o Ngomasa 'Itebi-tebinino.

¹⁷ De 'okia naga bato niadiai bolo 'o kianikia niobicara, ge'ena 'iodumu salingou moteke kokia naga 'o nyawa yongaku-ngaku 'o Yesusika. Nio'amalaha ma Jo'oungu ma Dutuka to ngone nanga Dea gu'una, ma ngale 'okia naga gee 'o Yesus wodiaiokau nginika.

¹⁸ 'O nge-ngeweka gee nionga-ngaamokokau, salingou nio'isene 'ania rokatika, moteke kokia naga yadaene ngini nio'ahu de ma Jou.

¹⁹ De 'o nau-nauru gee nionga-ngaamokokau, ngini salingou 'ania wekata niakisimara'ai de 'uwa niakirohu-rohu.

²⁰ Ngini 'o ngowa-ngowaka salingou niosigisene 'ania balusika, sababu koge'ena ge'ena ma Jo'oungu ma Dutu woduaka.

²¹ De ngini 'o dea-dea, nia ngowaka manga singina 'uwa niasiri, 'uwa sigado manga singina 'i'ogu.

²² Ngini 'o gilaongo, ge'ena naga 'o sagala moi-moioka salingou nio'isene 'ania tuangika. 'Uwa niaki'isene duga ka ma 'orasi to 'ona manga bionoka la niomau kanisiarene, ma 'ena niaki'isene de nia singina ma gou-goungu sababu winihoromati ma Jou.

²³ 'Okia naga bato nisimanarama, salingou niamanarama niosigou-gounguku matero kawinileleani ma Jo'oungu ma Dutu, so duga ka 'o nyawawa niakileleani.

²⁴ Ngini nianakokau 'ato ma Jou 'asa winidudu-duanga 'o barakati ma ngale nia parasengi, sababu ngini ge'ena to ma Kristus 'awi nyawa de ngini ge'ena konimaogo-ogoruwa winileleani ma Kristus.

²⁵ De nago'ona bato yodiai 'o dorou, 'ona 'asa yamoku manga sowono ge'ena, ma 'orasi ma Jo'oungu ma Dutu wosikilioro 'onaka. Sababu ma Jo'oungu ma Dutu kowoiri-irikuwa 'o nyawa.

Kolose

Video Kolose 3

Ikuti Kami:

KONTAK | PARTISIPASI | DONASI