Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Muyuh pangeh tinui pad-pad dengan Keristus. Ngaceku ineh do' nakap anun-anun luk déi' dita', su apeh luk inan Keristus tudo pa tinueh Allah.
2 Ngerawé ratnan luk déi' dita', aleg ngerawé ratnan luk bang tana.
3 Ngaceku muyuh pangeh naté, idi ulun muyuh inapung dengan Keristus bang Allah.
4 Ulun muyuh luk matu, ieh ineh Keristus. Idi kareb Ieh macing sekedueh kua', muyuh pana' miak melagan pad-pad denganNeh bang rayehNeh.
5 Do' muyuh ngilep amung-amung kekamen tana' ini, ieh ineh, pasét, luk melutak, maya' pian burur sebuleng, idi lili luk dat, idi teh lili luk mepad kudeng sembayang inan akang.
6 Idi ratnan amung-amung ineh useh Allah miak macing kuan lemulun luk ngelaba balaNeh.
7 Idi atun muyuh pana' nalan maya' luk kudeng ineh kareb ulun muyuh bang imetdeh.
8 Iamo' nekini do' muyuh necan amung-amung ineh, ieh ineh useh luk ngacing ét niat, kuyo, idi bala luk melutak.
9 Aleg mebalih arang muyuh sebuleng, ngaceku muyuh pangeh nenala' ulun luk mon ineh dengan amung-amung kekamenneh,
10 idi nengayung ku ulun luk mebaruh. Ieh ineh lemulun luk mebaruh luk ruen Allah mebaruh maya' ayu Allah, Lun, luk Mudut ineh, pad nguit nemuyuh miti Neneh dengan matu-matu.
11 Ngaceku ineh na luk idi lun pupu baken idi lun Yahudi, na luk idi sunat idi na sinunat teh, na luk idi lun luk na mileh idi lun luk mesangit, idi na luk idi demulun idi lun do'. Iamo' Keristus luk mangun ku luk amung-amung! Idi Keristus luk bang luk amung-amung.
12 Muyuh ini pupu Allah. Ieh mawa nemuyuh idi nemili' nemuyuh mangun ku pupuNeh sebuleng. Ngaceku ineh do' muyuh ngayung ku katu, beneh niat, idi kadang niat.
13 Do' muyuh mulai niat seburur dengan seburur idi maré do' arang muyuh sebuleng, kareb idé-idé ngadu' seburur lemulun baken. Do' muyuh maré do' arang muyuh sebuleng, mepad kudeng Tuhan pangeh nemaré do' kuan muyuh.
14 Iamo' luk pun-pun ratnan amung-amung ineh, do' muyuh ngayung ku awa luk miak ngabet luk amung-amung mangun ku aceh rurum luk meriput.
15 Idi do' awang Keristus ngimet bang niat muyuh, idi bang luk kudeng ineh teh muyuh pangeh tinawar bang burur luk sebuleng; idi do' muyuh maré ubur.
16 Idi do' bala Keristus ineh tudo bang nemuyuh dengan mela, dengan amung-amung ileh. Idi mada' idi periteteng arang muyuh sebuleng, dengan nani ubur idi ubur-ubur idi nani luk ratnan Roh. Idi do' menani dengan maré ubur kuan Allah bang niat muyuh.
17 Anun-anun luk ruen muyuh idi luk belén muyuh do' amung ineh ruen dengan ngadan Tuhan Yésus, idi maré ubur kuan Allah Taman tau bang ngadan Yésus.
18 O decur luk inan awan, do' muyuh mebeneh ratnan awan muyuh maya' kudeng luk petulu bang Tuhan.
19 O deléi luk inan awan, do' muyuh mawa inan awan muyuh, idi aleg megateh niat nedeh.
20 O anak-anak, do' muyuh maya' ukum taman-tinan muyuh bang luk amung-amung, ngaceku ineh luk petulu inan Tuhan.
21 O taman-tinan, aleg muyuh ngacing ét niat inan anak-anak muyuh, pad ideh na metalang niat.
22 O demulun, bang luk amung-amung do' muyuh maya' bala lun luk kuan nemuyuh bang tana' ini, baken dengan siayu pad muyuh buren lemulun, iamo' dengan niat luk lutep, pad muyuh ngerayeh Tuhan.
23 Anun-anun luk ruen muyuh, do' nganau' dengan matu-matu, mepad kudeng luk kuan Tuhan idi baken kuan lemulun.
24 Do' muyuh ngerawé! Muyuh miak ngalap ua' ratnan Tuhan. Muyuh miak ngalap ua' ratnan Tuhan. Muyuh miak ngalap luk tinina' Tuhan kuan pupuNeh. Muyuh mangun ku demulun kuan Tuhan, ieh ineh Keristus.
25 Idi lemulun luk nganau' sala' miak mabeh sala' luk inau'neh ngaceku Allah ngua' kuan anid-anid burur dengan na mili' ayu lemulun.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA