Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Angahhi to apa jao suruga to nanii Almaseh cumadokko mangparenta jio sa'de kanan-Na Puang Allataala, nasaba' wa'ding dipau kumua dipatuo pole'mo kamu' jio mai kamatean sola Almaseh.

² Battuananna, ia to penawammi la mipatuju lakoi to la miampa' jao suruga, danggi' na apa lan lino mipikkiri'.

³ Wa'ding dipau kumua mangkamo kamu' mate, na ia to katuoan barummi sola Almaseh te'dapa napajan, nasaba' te'dapa napapajanni Puang Allataala.

⁴ Apa ianna ratu pole'mo to Almaseh, to mben kamu' katuoan baru, iamora joo wattu napajan too to kamala'biran-Na Almaseh ammimala'bih sola.

⁵ Iamo joo ca'beanni to sininna kamadoangan gaja'mi, susinna manggauk sala, panggaukan laen to tangsipato', nturu' bang pakkaeloran penawa, mangpanggaukan tangmelo na madoang nnassang sininna apa, nasaba' ia to tomangngassang dipapadai tossompa dewata.

⁶ Ia ngasanmo joo la mparatu kamagallian-Na Puang Allataala lako totangnturu' Puang.

⁷ Mpugauk toda kamu' panggaukan susi joo tonna jolona, tommituru'pi to kamadoangan gaja'mi.

⁸ Apa la mica'beanmi tee too to panggaukan susi joo, susinna mabirih, mangpabalah, mpugauk kagajatan, mpau gaja' tau, mangkada carepa.

⁹ Danggi' misiuraga, nasaba' mangkamo kamu' nca'bean sipa' jolomi sola kamadoangan gaja'mi.

¹⁰ Mangkamo kamu' diben katuoan baru. Menjajimo kamu' tau baru to napaden Puang Allataala. Na da'tan bang kamu' dibarui, ammisannissen-issenna Puang Allataala sola ammisasusi-susinna sipa'-Na.

¹¹ Iamo joo te'damo nadipasilaenan to umma'-Na Almaseh. Te'damo nadipasilaenan to-Yunani na to-Yahudi, todisunna' na totangdisunna', bangsa laen na bangsa to tangmessipa', kaunan na tangkaunan, nasaba' pada bang unaki' dipupenjaji tau baru. Almasehra to kaminang parallu na Iamo torro lan kita'sola ngasan.

¹² Napakamoja' kamu' Puang Allataala na mangkamo kamu' napilei menjaji tau mesan-Na. Iamo joo la sikamasean kamu' padammi rupa tau, melo penawa, danggi' matampo, mangkada rampa' lako tau, sola sabbara' kamu'.

¹³ Sisabbarasan kamu' ke denni to sala lako kalemi, ammidampanganni. Susi Puang Allataala mangka ndampangan kamu', susi too to tau laen la midampangan.

¹⁴ Ia to kaminang parallu iamo to sipakamoja' kamu', nasaba' ia ke sipakamoja' kamu' la memmesa' tongan to penawammi.

¹⁵ Napileimo kamu' Almaseh menjaji susi lesoan batang kale-Na. La sikalino kamu' sola padammi tomatappa'. Eloranni kamasannangan to pole jio mai Almaseh, ngkuasai penawammi. La mangkurru sumanga' too kamu' lako Puang Allataala.

¹⁶ La mipallan penawa tarruhhi to pangngajaran-Na Almaseh ammituru'i. La da'tan bang kamu' siajaran misipakainga' too mpake sininna kapaissenanmi. La macanning atimmi mangkurru sumanga' lako Puang Allataala mimakkelong Zabur, kelong pangpujian ba'tu kelong laen.

¹⁷ Moi apa mipugauk ba'tu mipau, ia to panggaukanmi la situru' panggaukanna umma'-Na Puang Isa. Mangkurru sumanga' kamu' lako Ambe' Puang Allataala, nasaba' apa to napugauk Puang Isa lako kalemi.

¹⁸ Ee, kamu' to baine! Menturu' kamu' lako muanemi, sanga iamo la napugauk tonturu' Puang.

¹⁹ Ee, kamu' to muane! Pakamoja'i to bainemi. Danggi' mipasusii to todisua-sua bangra lan bolami.

²⁰ Ee, kamu' to anak! La tuli mangpesa'ding kamu' lako tomatuammi, nasaba' iamo nakabudai Puang Allataala.

²¹ Ee, kamu' to ambe'! Danggi' mipa'dikkii to penawanna anakkami anna danggi' naka'tu rannu.

²² Ee, kamu' to kaunan! Turu'i to sininna parentana puangmi lan tee lino. Danggi' na ia manda ke nakita kamu' mipemasannangngii to penawanna. Apa la mituru' tonganni to parentana, ammikasiri'i susi ngkasiri' Puang Allataala.

²³ Ianna den jaman nasuan kamu', la masumanga' kamu' njamai, susi ke Puang Allataala mipangjaman na tangngia tolino manda.

²⁴ Ingaranni kumua la miampa' pahalami jio mai Puang, susi to mangka nabasse lako umma'-Na. Puangmi to Almaseh na Iamo mipangjaman.

²⁵ Ia to tompugauk kasalan la dipabalahhi, nasaba' te'da tau napasilaenan Puang Allataala ke mangsessai.

Kolose

Video Kolose 3

Ikuti Kami:

KONTAK | PARTISIPASI | DONASI