Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Dob ai nini si Elipas na hun Teman ma mambalosi,
2 “Mintor dong ma nani guna ni jolma bani Naibata? Lang, bani dirini tumang do marguna halak na maruhur.
3 Mintor adong ma tumaram gunani bani Pargogoh Na So Tarimbang in, anggo pintor ho? Atap mintor adong ma untung-Ni hunjai, anggo ipadaulat ho parlahoumu?
4 Mintor tumaram ma pinsangon-Ni ho anggo halani hadaulatonmu, anjaha masuk hu paruhuman rap pakon ho?
5 Ai lang banggal do hajahatonmu? Anjaha lang marsibar hasalahanmu?
6 Ibuat ho do humbani saninamu sikoram lang marhala, anjaha ibuat ho do hiou ni halak na talag-talag.
7 Bani halak na mandatei seng ibere ho bah, anjaha seng ibere ho sipanganon bani halak na loheian.
8 Halak simada gogoh do simada tanoh in, anjaha halak na sangap do marianan ijai.
9 Lumei do halak na mabalu ipalaho ho, anjaha tangan ni halak na tading maetek iripuki ho.
10 Halani ai do ase hona taon siding inggot bam, anjaha mangonai bam songgot-songgot na so niarapkon,
11 gabe golap sinalsalmu, gabe aha pe lang ididah ho, anjaha irungkub bah marbanggal ho.
12 Ai lang i langit pardatas do marianan Naibata? Tonggor ma, bintang sigijangan, gijangni in ai!
13 Hape nim, ʻAha ma ipabotoh-botoh Naibata? Boi ma Ia manguhum hun hombun na golap ai?
14 Hombun do na manrungkubsi, gabe lang boi Ia mangidah; mardalan bani lopah ni langit do Ia.ʼ
15 Sihol mandalani dalan sinabasaia do ho, na dob nidalanan ni halak parjahat,
16 na niraseihon i lobei ni panorang ni sidea, anjaha bah marbanggal mangayubkon palasni?
17 Na mangkatahon bani Naibata, ʻLaho hun bennami!ʼ ampa, ʻAha ma na boi bahenon ni Pargogoh Na So Tarimbang in bennami?ʼ
18 Hapeni namin, Ia do manggoki rumah ni sidea bani na madear. Tapi daoh ma humbangku pingkiran ni parjahat.
19 Idahon ni halak parpintor ma ai, gabe malas uhurni, anjaha halak na so marpipot manrehei sidea.
20 Tongon, domma rasei hape imbangta, anjaha tading-tadinganni bois ipangan apuy.
21 Mahua mardear ma ho pakon Naibata, ase mardamei ho, marhitei ai gabe sogop pasu-pasu bam.
22 Sai jalo ma pangajaran humbani pamangan-Ni, anjaha parimbagaskon ma hata-Ni.
23 Anggo martoruh ni uhur ho mulak bani Pargogoh Na So Tarimbang in, anjaha ipadaoh ho hagedukon ai hun lampolampomu,
24 anggo iambungkon ho omas ai hubagas orbuk, ampa omas na hun Opir ai hu tongah-tongah ni batu na ibagas binanga,
25 anjaha anggo Pargogoh Na So Tarimbang in ma gabe omas bam, pakon gabe arta pirak bam,
26 tongon, gabe marmalas ni uhur ma ho ibagas Pargogoh Na So Tarimbang in, anjaha boi dirgak mangkawahkon Naibata.
27 Martonggo ma ho hu Bani, jadi tangihonon-Ni ma ho; anjaha galari ma bagah-bagahmu.
28 Atap aha pe isurahon ho, jadi ma ai, anjaha na lihar ma manondangi dalanmu ganup.
29 Ai Naibata do patoruh sigijang uhur, tapi iurupi do halak sitoruh uhur.
30 Ia do paluahkon halak na so marpipot; anjaha ho pe boi do maluah marhitei haborsihon ni tanganmu.”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA