Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Elifas ngoca’, "E antarana manossa reya, tadha’ settonga se aguna ka Allah. Oreng se andhi’ akkal buddi pera’ aguna ka aba’na dibi’.

² (22:1)

³ Apa gunana ka Allah mon ba’na ajalannagi kasokanna? Apa ontongnga ka Salerana mon odhi’na ba’na samporna?

⁴ Banne polana ba’na tako’ ka Allah, ba’na earane ban eanggep sala,

⁵ tape polana dusana ba’na ce’ bannya’na, tengka polana ce’ juba’na.

⁶ Mon taretanna ba’na ta’ bisa majar otangnga, bi’ ba’na erampas kabbi kalambina.

⁷ Ba’na ta’ aberri’ ngenom ka oreng se pelka’, ta’ matabari ngakan ka oreng se lapar.

⁸ Ba’na ngangguy pangkat ban kakobasa’anna kaangguy arampas sakabbinna tana.

⁹ Ba’na banne pera’ ta’ endha’ atolong para randha, tape na’-kana’ se ta’ andhi’ eppa’ embu’ etendhes keya.

¹⁰ Daddi sateya bannya’ jebbak e sakalenglengnga ba’na, ban atena ba’na katako’en daksakala.

¹¹ Are sajan petteng, ba’na ta’ nangale pa-apa, ba’na tasellem elanyo’ banjir se ce’ rajana.

¹² Allah reya gu ta’ alenggi e langnge’ se paleng tenggi, nondhu’ ngoladi ka tang-bintang e baba’anna, maske tang-bintang jareya ce’ tenggina?

¹³ Tape ca’na ba’na, ‘Dhu ngagaliya apa Allah rowa, se badha e attassa ondhem ban ta’ bisa ngadili sengko’ ban ba’na?’

¹⁴ Ba’na nyangka Allah ta’ bisa ngoladi nerbas ondhem se kandel, ban pera’ bisa alomampa e bates e antarana langnge’ ban bume?

¹⁵ Apa ba’na paggun lebada e jalan se epele reng-oreng jahat?

¹⁶ Reng-oreng jareya esendhal sabellunna baktona ajal, elanyo’ banjir se ce’ rajana.

¹⁷ Jareya reng-oreng se bangal nolak Se Mahakobasa, se nyangka Allah ta’ bisa apa-rapa ka aba’na.

¹⁸ Mangkana Allah se masogi reng-oreng jareya! Sengko’ ta’ ngarte onggu ka pekkerra reng-oreng durjana!

¹⁹ Reng-oreng becce’ agella’ kaperagen, mon nangale oreng jahat narema okoman.

²⁰ Dhi’-andhi’na oreng jahat epaancor, re-karena se gi’ badha tompes ekello’ apoy.

²¹ Daddi, Ayyub, mara atobat ka Pangeran me’ olle ba’na olle kataremtemman. Mon ba’na ajalannagi jareya, tanto ba’na olle kaontongan.

²² Tarema apa se eajarragi Pangeran ka ba’na; sempen kabbi e dhalem atena.

²³ Mara abali ka Pangeran kalaban ate andhap asor, kajahadan e bengkona ja’ paterros.

²⁴ Buwang emmassa ba’na se paleng morne; ontallagi ka dhasarra songay se la ta’ metto aeng.

²⁵ Dina Allah Se Mahakobasa me’ daddi emmassa ba’na, ban salakana ba’na se paleng bagus.

²⁶ Daddi ba’na tanto ros-terrosan parcaja ka Allah, ban tao ja’ Allah jareya somberra kasennengnganna ba’na.

²⁷ Mon ba’na adu’a bi’ Allah tanto ekabbullagi, ban ba’na tanto bisa neptebbi janji.

²⁸ Sabarang se elakone ba’na tanto ahasel ros-terrosan, odhi’na ba’na tanto etera’e sonar se terrang.

²⁹ Oreng se sombong ekababa’agi bi’ Pangeran, tape se andhap asor epasalamet.

³⁰ Allah tanto nolong ba’na mon ba’na ta’ sala sarta mon ajalannagi se daddi kasokanna."