Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Nakanamo Elifas, "Ri sikontu umma’ rupataua tena manna sitau a’matu-matu mae ri Allata’ala. Tau sannaka baji’na akkala’na, poro mae ri kalenna bawang a’matu-matu.
2 (22:1)
3 Maka nia’ matu-matunna mae ri Allata’ala, punna nugaukang ero’Na? Apaka nia’ passawalanna mae ri Ia, punna sukku’ baji’na tallasa’nu?
4 Teai lanri malla’nu ri Allata’ala, na nituduko siagang nisalakangko,
5 passangalinna lanri jai duduna dosanu, siagang tamaka ja’dala’na tindakannu siagang panggaukannu.
6 Punna takkullea nabayara’ inranna sari’battannu, nurampasa’ ngasengi pakeanna.
7 Tau posoa tena nusarei je’ne’ inung, tau cipuruka tena nupirarai kanre.
8 Nupakei jabatannu siagang koasanu untu’ angngallei sikamma buttaya.
9 Teai poro tenana bawang nutulungi sikamma jandaya, mingka ana’ kukanga nujallakkang tongi.
10 Lanri kammana minjo narassimo sikko’ ri tammulilinu, siagang ti’ring nitongko’mi ri pakkasia’ malla’ atinnu.
11 Pila’ sassangi alloa, takkulleako accini’; tallangko nituju ri a’ba sannaka lompona.
12 Sai langi’ tinggia pammantanganNa Allata’ala, na accini’ naung, ri sikamma bintoeng tinggi dudua?
13 Mingka akkuta’nangko angkana, ‘Apa todong Naasseng? Ia niaki irateanna rammanga, takkulleai angngadeliki’.’
14 Nukapangi angkana nitongkoki paccini’Na ri rammang, siagang irateji ri pa’baeng-baenna langika siagang buttaya a’jappa?
15 Maka tuli ero’ ijako allalo ri oloang napilea sikamma tau ja’dalaka?
16 Niparuntangi ke’nanga ri tenanapa narapiki wattu kamateanna, na nianyukang ri je’ne’ aba’ antujuai.
17 Iaminjo ke’nanga barani antollaki Kaminang Koasaya, na nakapang angkana takkulleai a’gau’ apa-apa mae ri ke’nanga.
18 Nampa Allata’alaja le’ba’ ampa’jari kalumanynyangi ke’nanga! Tena tojeng nakupahangi batena appikkiri’ tau salaya pikkiranna!
19 Tau bajika, ammakkala’ rannui, punna nacini’ tau ja’dalaka anggappa hukkungang.
20 Sikamma barang-baranna tau ja’dalaka ancuru’ taba sikali, nampa nikanre ri pepe’ sa’genna la’busu’ apa tassesaya.
21 Jari, Ayub, assiama’ mako siagang Batara, sollanna nunggappa kasannangngang. Punna nugaukang kammaya anjo, mattantu anggappako kaupakkang.
22 Tarimai apa Napangngajarranga Batara mae ri kau; boli’ ngasengi anjo lalang ri pa’mai’nu.
23 Pakatunami pa’mai’nu, ammotere’ mako mae ri Batara, pammarimi kaja’dallanga ri balla’nu.
24 Pela’mi bulaennu kaminang ti’noka; pasambilai antama’ ri binanga tenayamo je’ne’na.
25 Boli’mi kamma na Kaminang Makoasaya a’jari bulaennu, siagang a’jari pera’nu sannaka lompona anggaranna.
26 Jari akkulle mako tuli tappa’ mae ri Allata’ala, na nuasseng angkana Iami kabattuanna mate’nenu.
27 Punna appala’ doangko, laNapialiko, nakkulle nurupai sikontu janjinnu.
28 Usahanu tuli langngerangi wassele’, siagang singaraka lassingari tallasa’nu.
29 Tau borroa nipakatunai ri Batara, mingka tau tuna pa’maika Napasalamaki.
30 LaNatulungko Allata’ala punna tena nusala, siagang punna nugaukang ero’Na."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA