Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ [Nina Elipas,] "Erguna kin manusia enda man Dibata? Lang! Kalak pentar erguna man dirina saja ngenca.

² (Ayb 22:1)

³ Payo gia lagu langkahndu, erguna kin man Dibata? Mehuli gia kam, untung kin man BaNa?

⁴ Labo perban biarndu man Dibata maka kam IrawaiNa dingen IadiliNa,

⁵ tapi erkiteken nggo melala dosandu, janah la erngadi-ngadi jahat perbahanenndu.

⁶ Ipaksandu seninandu nggalar utangna, seh irampasndu kerina pakenna.

⁷ Man kalak si ngelabuh la kam nggit mereken lau inemen, kalak si kelihen la iberendu nakan.

⁸ Ipakendu jabaten ras kuasa, guna ngkuasai taneh e kerina.

⁹ La kam nggit nampati diberu balu-balu, janah anak melumang pe ibahandu ra ate mesui.

¹⁰ Erkiteken si e, genduari siding kerina i sekelewetndu, janah aru ate rempet ndemi pusuhndu.

¹¹ Suarindu nggo gelap, kai pe la idahndu, janah kam nggo gedap, i bas lau belin si erderu.

¹² Ma Dibata ringan i langit si meganjangna? Janah lako ngidah bintang-bintang si meganjang pe ku teruh nge ItatapNa.

¹³ Erkiteken si e nindu, "Kai kin pemeteh Dibata? Ia terbuni i bas embun; dage kuga nina ngadili kita?"

¹⁴ Iakapndu erkiteken embun nutupi Ia, kai pe la IdahNa asum Ia erdalan arah perdemun langit ras doni enda.

¹⁵ Tetap kin atendu ngikutken dalin si la mehuli, si idalani kalak jahat nai-nai nari?

¹⁶ Aminna langa pe seh paksana, lau belin nggo ngombakken ia.

¹⁷ Eme kalak si nulak Dibata, si erpengakap maka kai pe la banci ibahan Dibata bana.

¹⁸ Si tuhuna, maka ia bayak, Dibata nge erbahanca; perukuren kalak jahat, tuhu-tuhu la kuangka.

¹⁹ Meriah akap kalak bujur tawa, ngidah kalak jahat ndatken ukumenna.

²⁰ Sikerajangen kalak jahat ikernepken kerina, jenari keri ipan api kai si tading denga.

²¹ Dage o Jop, erdamelah kam ras Dibata ulanai musuhi Ia; adi bage perbahanenndu, tentu kam ipasu-PasuNa.

²² Alokenlah PengajarenNa bandu, buniken KataNa i bas pusuhndu.

²³ Mulihkenlah ku Dibata alu meteruk ukur, kejahaten si lit i bas rumahndu ulanai usur-usur.

²⁴ Ambekken emasndu, benterken ku alur lau belin si erbatu-batu.

²⁵ Bahanlah Dibata si Mada Kuasa jadi emas ras pirakndu si meherga.

²⁶ Emaka lalap kam erpengendes man Bana, janah ietehndu maka kerina keriahenndu i bas Ia sumbulna.

²⁷ Adi ertoto kam man BaNa, IbegikenNa kam, kai si nggo ipadankenndu man BaNa, banci igalarindu.

²⁸ Kai si irencanakenndu seh kerina, janah dalanndu iterangi sinalsal si seh kal harharna.

²⁹ Sabap kalak si meganjang ukurna, ipeteruh Dibata, tapi si meteruk ukurna, IselamatkenNa.

³⁰ IpulahiNa kam adi la lit salahndu, adi bujurlah perbahanenndu."