Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ale anakku, anggo ra ho manjamin hasomanmu, pala marjabat tangan ho mangkopkop halak na legan.

² Jadi anggo sangkut ho marhitei sahap ni bibirmu, tartangkap ibahen hata ni pamanganmu,

³ on ma bahen, ale anakku, paluahkon dirimu, ai domma madabuh ho hubagas tangan ni hasomanmu. Laho ma, patoruh dirimu, elek-elek ma hasomanmai!

⁴ Ulang ma lopas matamu modom, atap salibonmu tartunduh;

⁵ sai paluah ma dirimu, songon balua hun tangan ni parburu, songon manuk-manuk hun tangan ni parsambil.

⁶ Laho ma bani porkis, ale parrayoh, pardiatei ma pambahenanni, anjaha maruhur ma!

⁷ Age pe lang dong bani sidea pangulu, mandur atap raja,

⁸ ipasirsir do sipanganonni bani musim logou ni ari, ipatumpu do sipanganonni bani musim sabion.

⁹ Sadiha dokah ho modom-modom, ale parrayoh? Andigan pe ho puho humbani na modom?

¹⁰ Nim, “Tongkin nari modom, tongkin nari tartunduh, tongkin nari tibal-tibal anjaha marlompit tangan,”

¹¹ jadi roh ma bam hamiskinon songon panamun, anjaha hahurangan songon halak parsinjata.

¹² Jolma na so margagan, halak sihorjahon hajahaton, ai ma na mansahap-sahapkon hata ladung,

¹³ ai ma na pahirdop-hirdop matani, sibere partanda marhitei naheini, anjaha na patuduhkon marhitei jari-jarini,

¹⁴ ai ma na manranggihon na masambor marhitei akal-akal ampa na torus manuan paringoran.

¹⁵ Halani ai sompong do roh hasedaon bani; podas do ia maropuk, seng hatambaran.

¹⁶ Na onom on ihasogamkon Jahowa, na pitu on tene ihagigihon:

¹⁷ Mata na mangenjeng, dilah siparladung, ampa tangan siduruskon daroh na so marpipot,

¹⁸ uhur na paranggi-ranggi hajahaton, ampa nahei na sihap marlintun bani na masambor,

¹⁹ saksi palsu siluarhon ladung, ampa na manuan parbolah-bolahan i tongah-tongah ni na marsanina.

²⁰ Ale anakku, ramotkon ma parentah ni bapamu, anjaha ulang ma ambukkon pangajaran ni inangmu.

²¹ Sangkutkon ma ai tongtong ibagas uhurmu, anjaha parsinongkok bani borgokmu.

²² Anggo mardalani ho, ai ma na manogu-nogu ho, anggo modom ho, ai ma na manjagai ho; anjaha anggo puho, ai ma na marsahapkon ho.

²³ Ai suluh do titah ai, anjaha pangajaran ai panondang; dalan hu hagoluhan do pinsang-pinsang ampa lumba-lumba,

²⁴ na manjaga ho humbani naboru na jahat, humbani naboru na legan silandit dilah.

²⁵ Ulang oji ho mangidah hajengesonni ibagas uhurmu, anjaha ulang ma tartangkap ho ibahen hirdop ni matani.

²⁶ Ai halani boru jalang rugi do halak sansayat ruti, tapi halani parinangon ni halak na legan magou tonduy na maharga ai.

²⁷ Ai boi do halak mamboan apuy bani abinganni, anjaha hiouni ai seng mosog?

²⁸ Atap tarbahen halak do mardalan i atas ni narnar, anjaha naheini ai seng matutung?

²⁹ Sonai do halak na mandohori parinangon ni hasomanni; seng anjai lang hona uhum na manjamahsi.

³⁰ Ai lang bador do panangko, anggo manangko ia laho pasombuh hisapni, halani loheian ia?

³¹ Anggo tardapot ia, maningon paulakonni do pitu hali lompit, ronsi haganup ugas-ugas na i rumahni maningon berehononni do.

³² Tapi halak na lontong do halak sihorjahon parbangkison; na mansedahon dirini do halak na mangkorjahon ai.

³³ Pukul-pukul pakon habadoron do rupeini, anjaha seng tarsasap be habadoronni ai.

³⁴ Ai parsimburuon do mamuhoi ringis ni dalahi, anjaha seng maralang-alangan uhurni bani ari pambalason.

³⁵ Pardearan aha pe lang martarima bani, sadiha pe ibere ho, seng ra ia manjalosi.