Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 O anakku, ntah mawen pernah kam erpadan njamini utang kalak.
2 Banci jadi nggo kam rutang cakap, janah teriket kerna padanndu jine.
3 Adi payo bage o anakku, nggo kam i teruh kuasa kalak ndai. Tapi bagenda carana maka banci kam pulah: minterlah dahi ia, jenari pindolah alu meseksek man bana maka kam ipulahina.
4 Ula bere matandu tertunduh, selibenndu pe ula pitpit.
5 Pulahi bandu i bas siding e nari bali ras perik ntah belkih mulahi bana i bas perburu nari.
6 O kalak perkisat, perdiatekenlah perkis, janah erlajarlah i bas ia nari.
7 Perkis la lit peminpinna, la lit mandurna, la lit si njagasa,
8 tapi erdahin ia pepulung nakan tupung paksa lego guna pangan tupung paksa perudan.
9 O kalak perkisat, asa kai nari dekahna kam medem-medem saja? Ndigan ndia kam keke?
10 Nina, "Kentisik saja aku medem; cirempu aku janah pekesahken kentisik saja."
11 Tapi tupung ia tunduh rempet reh kemusilen nindih ia desken pengerampuk si ersenjata.
12 Kalak jahat dingen kalak si la erguna pet kal meritaken berita si la tuhu.
13 Sikirepen ia erbahan tanda guna nipu kalak.
14 Alu taki pacikna, ibahanna rencana-rencana jahat, i japa pe ibahanna perubaten.
15 Erkiteken perbahanenna, rempet reh cilaka ndabuh man bana emaka mate me ia.
16 Lit pitu perkara si nembeh janah ciga kal ate TUHAN ngenenca eme: pengenehen mata si megombang, dilah perguak, tan si munuh kalak si la ersalah, ukur si erbahanca sura-sura jahat, nahe si mejingkat ngelakoken kejahaten, saksi si la erngadi-ngadi erbual, dingen kalak si peturah perubaten sapih-sapih temanna.
17 (Ams 6:16)
18 (Ams 6:16)
19 (Ams 6:16)
20 O anakku, lakokenlah kai si ikataken bapandu, ula la inget kai si iajarken nandendu.
21 Bunikenlah kata-katana, simpan i bas pusuhndu.
22 Ajarenna e kap si mabai kam i bas perdalanenndu, si ngkawali kam tupung berngi, si mereken pedah man bandu tupung suari.
23 Ajar orangtuandu desken lampu si ersinalsal kap; kam ipandangna lako nuduhken dalan si mehuli man bandu.
24 Ajarna e ngasup pedauh kam i bas diberu si la mehuli nari, i bas penaki-naki ndehara kalak si deban nari.
25 Ula kam terpikat erkiten jilena, ula kam terpikat erkiteken pengkirep matana.
26 Diberu si pencarinna erlua-lua banci isewa alu sada piring nakan, tapi erlua-lua ras ndehara kalak, kesah kap tebusenna.
27 Banci kin itamaken kalak api i bas tentenna, tapi la meseng bajuna?
28 Banci kin kalak erdalan i babo rara tapi la meseng nahena?
29 Seri kap bahayana e ras medem ras ndehara kalak. Kalak si bage la banci pulah i bas ukumen nari.
30 Kalak si nangko nakan perban lihena, labo ia ipemela-mela kalak.
31 Tapi aminna bage pe, adi ia ketunduken la banci lang igalarina pitu kali lipat, seh maka kerina si i bas ia jadi penggalarna.
32 Tapi sekalak dilaki si erlua-lua ras ndehara kalak, ia ncedaken dirina jine. Seh kal motuna kalak si bage.
33 Mela me iakapna dingen ukumen jadi sikerajangenna, gelarna mbau seh rasa lalap.
34 Perbulangen si mecimberu erkiteken pengelako ndeharana e, rawana la tanggung-tanggung, ia erbalas lanai terambati.
35 La ia nggit ngaloken galar. Pemere si asa kai pe buena la ngasup erbahan nimpet gara atena.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA