Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hata ni si Agur, anak ni si Jeke, na hun Massa. Nini halak ai, “Domma loja ahu, ale Naibata, domma loja ahu, angkulangku pe domma hurleh.
2 Tongon ahu do siotoan humbani jolma, anjaha seng dong panimbangion ni jolma bangku.
3 Seng ongga huguruhon hapentaran, anjaha seng dong habotohon bangku pasal Na Pansing in.
4 Ise ongga naik hu nagori atas anjaha tuad use hunjai? Ise ongga patumpu logou bani tanganni? Ise boi mambaluti bah ibagas hiou? Ise do na pajonamkon haganup tampakan ni tanoh on? Ise do goranni, anjaha ise do goran ni anakni? Ibotoh ho do ai?”
5 Haganupan hata ni Naibata pitah do, gantar do Ia bani sagala na marhaporusan Bani.
6 Ulang tambah-tambahi hata-Ni ai, ase ulang hona pinsang ho, anjaha tardapot ho parladung.
7 “Dua do na hupindo hun Bamu, ulang ma lang ibere Ham ai bangku, paima lape matei ahu.
8 Padaoh Ham ma humbangku uhur sipakulah-kulah pakon hata ladung. Ulang ma bere Ham bangku hamiskinon atap habayakon, tapi bere Ham ma bangku sipanganon ansa na porlu,
9 ase ulang, anggo marlobih-lobih ahu, huporsou Ham, anjaha huhatahon, ʻIse Jahowa?ʼ Ase ulang, anggo masombuhtu ahu, manangko ahu, gabe sambor hubahen goran ni Naibatangku.”
10 Ulang ma pasambor-sambor jabolon bani tuanni, ase ulang iburai ho, gabe seda ho.
11 Adong do halak na mamurai bapani: anjaha na so pasangap inangni.
12 Adong do halak na mangagan borsih sidea, tapi dungutni pe lang iusah.
13 Adong do halak parmata na toal, na pamiut-miut salibonni hu atas.
14 Adong do halak paripon na songon podang, parngadol na songon pisou, laho mamondut halak na madoyuk hun tanoh on pakon halak na masombuh hun tongah-tongah ni hajolmaon.
15 Dua boru ni lintah mangkatahon, “Bere, bere.” Tolu seng tarbosuri; ompat seng ongga mangkatahon, “Sungkup ma!”
16 Ai ma nagori toruh pakon harambuyon na lambang, tanoh na so ra bosur bani bah ampa apuy na so ongga mangkatahon, “Domma sungkup.”
17 Mata ni halak na mapas bani bapani, anjaha ipahiri inangni na dob ubanon, paguton ni kawak na i topi bah do ai, anjaha panganon ni anak ni haluhuy.
18 Na tolu on halongangan do bangku, anjaha na ompat on seng tararusi ahu:
19 Ai ma parhabang ni manuk-manuk nanggordaha i awang-awang, pardalan ni ulog bani dolog batu, pardalan ni kapal i tongah laut ampa parsaoran ni dalahi bani naboru,
20 Sonon do parlahou ni boru jalang: Mangan do ia anjaha iapusi babahni, nini: seng dong hubahen na jahat.
21 Halani na tolu masam on do dugur tanoh, anjaha halani na ompat on seng tahan ia.
22 Halani jabolon, anggo gabe raja ia, halani halak na oto, anggo marlobih-lobih ia;
23 halani naboru na niapasan hape adong na mambuatsi ampa halani jabolon naboru na manoluk kuasa ni tuanni.
24 Adong do ompat na etek-etek i tanoh on, tapi pandei tumang.
25 Ai ma porkis sada hulanan na so margogoh, tapi ipasirsir sidea do bohalni bani musim milas;
26 ampodi, ai ma binatang na so margogoh, tapi ipauli do rumahni bani dolog batu;
27 balang, seng marraja, tapi atur do sidea marhulan-hulan misir;
28 boraspati, na boi tangkapon ni tangan, tapi bani lopou ni raja marianan.
29 Adong tolu na tanggung panlangkahni, ompat na jenges pardalanni:
30 Ai ma singa, sigogohan humbani sagala binatang, na so ongga surut hun lobei ni atap aha pe,
31 huda panjangan, hambing bajar pakon raja, na manlangkah i lobei ni balani.
32 Atap maoto ho, marhitei na ipagijang ho dirimu, barang ipingkiri ho na masambor, tutup ma lah pamanganmu bani tanganmu!
33 Ai dadih na ginunsang-gunsang manjadi mantega, igung na niantuk gabe tarngurngur, anjaha gila na pinuhoan patubuh paringoran.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA