Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Teako takkaluppai ri apa le’baka kuajarrangko, ana’. Tuli u’rangi parentaku,
2 sollanna la’bu umuru’nu siagang salewangang tallasa’nu.
3 Paralluko tuli tappa’ siagang tamamminraya mae ri Allata’ala siagang mae ri parannu tau. U’rangi anjo kammaya siagang boliki ri pa’mai’nu,
4 sollannu ningai siagang nipakala’biri’ ri Allata’ala siagang ri rupataua.
5 Tappakko mae ri Batara sibatu pa’mai’, siagang teako na pammahannu bawang nurannuang.
6 Angngu’rangiko mae ri Batara lalang sikontu apa nugaukanga, na Iami lampicinikiangko nikanaya carana attallasa’ bajika.
7 Teako nanukana kalennu la’bi cara’dekangangko na sitojennaya; turuki Batara siagang pakabellai kalennu battu ri ja’dalaka.
8 Anjo panggaukanga la’jari sanrapangi pa’balle mae ri kau, ia lampakabajiki batangkalennu siagang pa’mai’ mailalannu.
9 Pakala’biriki Batara siagang assareko koro’bang kaminang bajika battu ri barang-barang wassele’ buttanu,
10 nalarassi sikamma pammakkannu siagang gandung, kammayatompa je’ne’ anggoro’nu lallumpa-lumpai sa’genna tagannakkamo tampa’ pammolikannu.
11 Punna Naajarakko Batara na’, tarimai anjo kammaya a’jari pappakainga’; teako lussakki pa’mai’nu mae ri pangngajara’Na.
12 Naajaraki Batara tau Nangaia, sanrapang se’re mangge angngajaraki ana’ nasayanga.
13 Maupaki tau a’jari cara’deka siagang anggappaya pangngassengang.
14 Lompoangngangi passawallanna kala passawallang pera’ nagappaya, siagang lompoangngangi anggaranna na bulaenga.
15 Tinggiangngangi anggaranna na batu paramataya; sikontu apa-apa nukacinnaiya takkulleai napasangkammai.
16 Kacara’dekanga nasareko umuru’ la’bu, kakalumanynyangngang siagang kala’birang.
17 Kacara’dekanga napakasannangi tallasa’nu siagang napa’jariko salewangang.
18 Tau manna’gala’ jarreka ri kacara’dekanga lanakasiaki katallassang sitojennaya siagang mate’nea.
19 Lanri kacara’dekang, naNapa’jari Batara buttaya; lanri akkala’ baji’Na naNaka’rang langika ri sikamma tampa’Na.
20 Lanri pangngassenganNa naNapare’ sikamma kabattuanna je’neka irawa ri reppe’na buttaya nampa napalo’loro’ je’ne’na kammayatompa rammanga ri langi’ appatiri’ je’ne’ ri buttaya.
21 Lanri kammana anjo, anna’galakko mae ri kacara’dekanga siagang mae ri tangara’ bajika, na’! Tea sikaliko lappassangi,
22 nalanikatutui tallasa’nu, baji’ siagang appakasannang.
23 La’jappako siagang amang, siagang tena nulatatto’ro.
24 Lamangeko attinro tamallaka pakkasia’nu, siagang labajiki tinronu sila’busu’ bangngi.
25 Tena nuparallu malla’ ri bala ti’ring battua sanrapang anging lompo, antujui tau ja’dalaka.
26 LaNajagaiko Batara. Tena nalaNabalang parekangko tu’guru’ antama’ ri sikko’ nitannanga.
27 Punna nia’ pakkullenu untu’ anggaukangi bajika mae ri tau parallua ri kabajikannu, teako tollaki untu’ anggaukangi anjo kammaya.
28 Teako suroi parannu tau attayang sa’genna ammuko, punna akkulle memanja anjo wattua nutulung.
29 Teako rancanai apa-apa lappakarugia mae ri parannu tau ia niaka ri ampi’nu siagang tappaka mae ri kau.
30 Teako a’besereki siagang tau maraenga, tenaya nale’ba’ a’gau’ ja’dala’ mae ri kau.
31 Teako angngiri matai mae ri tau ma’gau’ katerassanga, siagang teako turuki gau’-gau’na ke’nanga.
32 Saba’, anjo Batara Nakabirisi tau a’gau’ ja’dalaka, mingka agang jarreki siagang tau lambusuka lalang tallasa’na.
33 Natunrai Batara balla’na tau ja’dalaka, mingka Nabarakkaki balla’na tau mannurukia mae ri Ia.
34 Nakabirisi Batara tau tinggi langgaya, mingka Nabarakkaki tau tuna pa’maika.
35 Tau cara’deka pila’ mabauki arenna, mingka tau toloa pila’ nicallai.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA