Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ndigan pe ula ilupakenndu kai si kuajarken man bandu o anakku. Ingetlah lalap kai si kukataken man bandu.

² Ajarku bandu erbahanca gedang umurndu janah senang geluhndu.

³ Tetaplah kam patuh man Dibata janah bujurlah perbahanenndu man kerina manusia. Burakenlah e i bas kerahungndu dingen suratken i bas pusuhndu.

⁴ Adi bage perbahanenndu subuk Dibata bage pe manusia ngena atena ngenehen kam.

⁵ Ernalemlah man Dibata alu bulat ukurndu. Ndigan pe ula ernalem man pemetehndu jine.

⁶ Ingetlah Dibata i bas kerina si idahikenndu emaka Ia si nuduhken dalan si payo man bandu.

⁷ Ula iakapndu pentar kam lebih asa patutna; patuhlah man Dibata janah ula kam nggit ngelakoken si jahat.

⁸ Adi bage pengelakondu, perbahanenndu e desken tambar si pepalem penakit ras si mesuindu.

⁹ Mehamatlah man TUHAN alu mpersembahken ulih jumandu si mehulina kal man BaNa.

¹⁰ Adi bage perbahanenndu la banci lang dem lumbungndu alu gandum dingen lau anggurndu sampur, seh maka lanai siat ingan munikenca pe.

¹¹ Kune kam iajarken TUHAN, o anakku, perdiatekenlah e, janah bahanlah e jadi sada persinget.

¹² Iukum TUHAN kap kalak si IkeliniNa, bali ras bapa ngukum anak buah atena.

¹³ Sangap kal kalak si ndatken kepentaren, eme kalak si ndatken pengertin.

¹⁴ Untungna belinen asangken pirak, janah ergan kap e asangken emas.

¹⁵ Ergan kap kepentaren asangken permata; bicara kerina pe si isurandu ipersada la kap terpeseri ras kepentaren e.

¹⁶ Kepentaren kap si mereken man bandu umur si gedang, bage pe kebayaken ras kehamaten.

¹⁷ Kepentaren kap si erbahanca senang geluhndu, janah si mabai kam arah dalan dame.

¹⁸ Kalak pentar kap kalak sangap. Kepentaren si mereken kegeluhen man bana.

¹⁹ TUHAN njadiken doni enda alu KepentarenNa, alu KebeluhenNa ItamakenNa langit i bas inganna.

²⁰ Alu PemetehNa IbahanNa maler lau belin, bage me embun si mereken udan ku doni enda.

²¹ Erkiteken si e o anakku, ula kal sirangi kepentaren ras pemeteh! Ula pulahi pe.

²² E kap si mereken kegeluhen, kegeluhen si senang dingen dame man bandu.

²³ La kam biar-biaren erdalan janah la terantuk pe.

²⁴ Tupung tunduh la kam mbiar janah badeh pertunduhndu gedang-gedang berngi.

²⁵ La pada aru atendu kerna kebiaren si rempet rehna, desken galumbang si rempet ngombakken kalak jahat.

²⁶ TUHAN si njagai kam, la ipelepasna kam jertuh kena siding.

²⁷ Asa bancina, bahanlah mehuli man kerina kalak si perlu penampatndu.

²⁸ Ula suruh temanndu nimai seh pagi, adi banci nge isampatindu ia genduari.

²⁹ Ula isurakenndu erbahan jahat nandangi temanndu si balengen; ia ringan ideherindu janah tek ia man bandu.

³⁰ Ula erjengil la ersebap ras kalak si la pernah erbahan ceda man bandu.

³¹ Ula mecimberu man kalak si erbahan la bujur, janah ula usih pe perbahanenna,

³² sabap TUHAN ernembeh ate man kalak si erbahan jahat, tapi IbahanNa bujur man kalak si ndalanken si ngena AteNa.

³³ TUHAN masu-masu rumah kalak benar tapi IsumpahiNa rumah kalak jahat.

³⁴ Kalak si meganjang rukur, juru me i bas TUHAN, tapi melias Ia man kalak si meteruk rukur.

³⁵ Kalak pentar ertambah-tambah kap gelarna merim, tapi kalak bodoh ertambah-tambah si erbahanca iakapna mela.