Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Halak na papulig dirini, sisuhuni rosuhni sandiri, siimbang sagala uhur hapantason do ai.
2 Seng marosuh halak na bodoh bani habotohon, tapi pitah bani na patugah-tugahkon pingkiranni do hansa.
3 Anggo masa hajahaton, roh ma hahirion, anjaha habadoron do mangihut bani horja hasamboron.
4 Bah na bagas do sahap ni pamangan ni jolma; bah tubuh hapentaran, bah na mardalan do ai.
5 Seng dear mangapiti halak parjahat, laho mansalahkon halak parpintor ibagas paruhuman.
6 Bibir ni halak na bodoh paroh paringoran, anjaha pamanganni dilo-dilo do bani lonsing-lonsing.
7 Pamangan ni halak na oto hamagouan do ai bani, anjaha bibirni, siding bani dirini.
8 Hata ni siparhusip-husip mantin-mantin do ai, anjaha masuk-masuk hubagas uhur.
9 Halak na lansei bani horjani, dos do ai pakon halak siparseda dirini.
10 Benteng na toguh do goran ni Jahowa, haporusan do ai bani halak parpintor, gabe seng mahua be.
11 Arta ni halak na bayak, huta na pinatoguh do ai bani, anjaha tembok na gijang do ai, ninuhurni.
12 Anggo lape madabuh, gijang do uhur ni jolma, tapi toruh ni uhur do parlobei ni hamuliaon.
13 Halak na mintor marsampang, hape lape torang ibogei, haotoon do ai bani anjaha habadoron.
14 Tonduy na hinsah mambahen tahan halak manaron, tapi uhur na mandolei, ise ma na boi pahisar ai?
15 Uhur ni halak na pantas jumpahan habotohon, anjaha pinggol ni halak na maruhur pindah-pindah bani hapentaran.
16 Sibere-bere ni jolma do palumbang langkah-langkahni, anjaha ai do manogu-nogusi hu lobei ni halak na sangap.
17 Songon na pintor do halak, na parlobei mangadu-adu bani parkarani, paima roh imbangni na mansalahkonsi.
18 Marjomput na sinurat mangujungi parsalisihan, anjaha mambahen haputusan bani paringoran ni halak na gogoh.
19 Sanina na hona tipu, songon benteng na so tardohori do ai, anjaha parsalisihan songon pating-pating situtup rumah bolon.
20 Humbani buah ni pamanganni do bosur boltok ni halak, bosuran do ia ibahen buah ni bibirni.
21 Hamatean barang hagoluhan marguru bani kuasa ni dilah do, anjaha halak na mambotoh manramotkonsi, ai do na mangankon buahni.
22 Halak na dapotan parinangon, jumpahan na madear do, jumpahan idop ni uhur do ia humbani Jahowa.
23 Mangelek do sahap ni halak na masombuh, tapi halak na bayak koras do parsampangni.
24 Adong do hasoman na parsedahon, tapi adong do homa hasoman na sangkanan humbani sanina.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA