Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Sapa se ta’ endha’ apolong ban oreng laenna artena pera’ mekkere aba’na dibi’ malolo; sabban panemmona oreng laen elaban terros.

² Oreng budhu ta’ endha’ eberri’ pangarteyan; se ekaterro pera’ ngedirragiya essena atena.

³ Oreng dusa nespa odhi’na; mon la juba’ nyamana, tanto eya-seya.

⁴ Cacana oreng bisa daddi somberra kabicaksana’an, dhalem akantha tase’ raja, kobassa akantha aeng se agili.

⁵ Ta’ bagus noro’ ka oreng se daraka ban nendhes oreng se ta’ sala.

⁶ Mon oreng budhu acaca matokaran, ban menta eokom menangka pangajaran.

⁷ Cacana oreng budhu maancor aba’na; aba’na tajira’ bi’ cacana dibi’.

⁸ Petenna reya nyaman rassana, mon ekalodhu’ ekarassa kobassa.

⁹ Oreng se ngenthengngagi kawajibanna padha juba’na ban oreng se dujan marosak.

¹⁰ PANGERAN reya akantha manara se koko; ka jadhiya reng-oreng se jujur entar ban nemmo kennengngan se aman.

¹¹ Tape oreng sogi nyangka artana panyalamedda aba’na akantha geddhung tenggi ban koko e sakalenglengnga kottha.

¹² Oreng se angko bakal ngalotora, oreng se andhap asor bakal ehormadana.

¹³ Nyaot sabellunna ngedhingngagi reya tamaso’ lalakon se budhu ban ta’ teppa’.

¹⁴ Oreng se terro odhi’a kellar nanggung kasossa’an; mon pangaterro jareya tadha’, elang keya pangarebban.

¹⁵ Oreng se tenggi buddina terro nyareya elmo terros; oreng bicaksana terro olleya pangajaran malolo.

¹⁶ Tor-ator reya pamokka’na jalan mon nyabisa ke oreng raja.

¹⁷ Oreng se acaca dha’-adha’ e pangadilan katonna bendher cacana, tape cacana etemmo bendher salana mon la dhateng mosona.

¹⁸ Ngangguy ellot tokar bisa epamare, la’-mala’ partantangan e antara oreng se kobasa sakale bisa eahere.

¹⁹ Taretan se esake’e atena mon esemma’ana amalaradan dhari kottha se kowat; tokar reya akantha palangnga labang sakethengnga kottha se abinteng.

²⁰ Kaangguy ca’-oca’ se ekoca’agi, badha ollena se kodu ekarassa.

²¹ Jila andhi’ kobasa masalamet otaba marosak odhi’na manossa; oreng kodu nanggung hasella cacana.

²² Oreng se nemmo bine, olle kaontongan; bine reya paparengnga PANGERAN.

²³ Oreng mesken nyo’on kalaban tatakrama; oreng sogi nyaot sambi tak-nyentak.

²⁴ Badha kanca se ta’ esto, badha keya se alebbidan ban taretan.