Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Pakkalabinianga nibangungi ri kacara’dekanna bainea mingka niruntungi ri kadongokanna.

² Tau lambusuka mallaki siagang mappakala’biriki ri Karaeng Allata’ala; tau tenaya nalambusu’ ri tallasa’na nahina

³ Lanri tampona, nangai napakatinggi kalenna tau dongoka; tau cara’deka lanila’langi ri kana-kananna tonji.

⁴ Punna tena sapi, tena wassele’na kokoa; lanri kagassinganna sapia, lalla’bi kattoanga.

⁵ Sa’bi lambusuka tuli napaui apa kontutojenga; sa’bi tanipatappaka tuli a’balle-ballei.

⁶ Tau tampoa tena nala’jari cara’de’, mingka tau cara’deka gampangi appilajara’.

⁷ Teako agangi siagang tau dongoka’; tena apa-apa lakkulle naajarrangko.

⁸ Tau cara’deka naassengi angkana antekamma batena lappanggaukang, tau dongoka nitipui ri kadongokanna.

⁹ Tau dongoka tena najampangi angkanaya apaka nipammopporangi dosana yareka tena; tau bajika eroki nipammopporang dosana.

¹⁰ Susaya siagang rannua niaki niboli’ lalang ri pa’maika; tau maraenga takkulleai amminawang angkasiaki.

¹¹ Balla’ tau bajika tuli jarreki; balla’ tau ja’dalaka larumbangi.

¹² Nia’ oloang lambusuki cinikanna, mingka kale’bakkanna anjo oloanga mangei ri kamateanga.

¹³ Ri bokona kakkalaka nia’ kapang karru’; karannuanga akkullei kasusaang kale’bakkanna.

¹⁴ Tau ja’dalaka lanakattoi wassele’ kaja’dallanna, tau bajika lanakattoi rappo kabajikanna.

¹⁵ Tau dongoka tappaki mae ri sikontu bicaraya, tau cara’deka tutui ri panggaukang.

¹⁶ Tau bajika akkala’na tutui na bella battu ri kaja’dallanga, tau dongoka lintaki nai’ larrona, nampa amang nasa’ring.

¹⁷ Tau nangaia larro dongoki panggaukanna; tau cara’deka sa’baraki sipa’na.

¹⁸ Tau tenaya pangalamanna la’jari dongoki; tau cara’deka lapila’ katambangi pangngassenganna.

¹⁹ Tau ja’dalaka latunduki mae ri tau lambusu’ pa’maika, untu’ appala’ sollanna nikamaseang.

²⁰ Tau kasi-asia tena ningai ba’lalo ri bela-belana; mingka tau kalumanynyanga jai sahaba’na.

²¹ Inai-nai anghinai paranna tau, a’gau’ dosai; inai-nai baji’ pa’mai’ ri tau kasi-asia, lamate’nei.

²² Inai-nai anggaukangi apa bajika, lanipatappaki na nipakala’biri’; inai-nai anrancanakangi kaja’dallanga niaki ri oloang salaya.

²³ Lalang sikontu usahaya nia’ passawallanna; bicara kosonga napatu’guru’ kasi-asi taua.

²⁴ Tau cara’deka nipuji lanri kacara’dekanna; tau dongoka alla’bangi niasseng kadongokanna.

²⁵ Punna nia’ sa’bi a’bicara tojeng, napasalamaki nyawaya; punna a’bicara balle-ballei, ta’gilingi ambaliangi aganna.

²⁶ Tau mappilangngeria ri Batara a’jari amangi, siagang kaluargana lania’ pa’la’langanna.

²⁷ Mappilangngeria ri Batara iami pappokokanna kate’neanga; siagang oloang untu’ alliliangi kamateanga.

²⁸ Kakalumanynyanganna karaenga iamintu ri pajaina ra’ya’na; punna tena ra’ya’na takkulleai koasa.

²⁹ Tau cara’deka talintakai larro; tau dongoka takkulleai nalewai kalenna.

³⁰ Pa’mai’ sannanga napakabajiki tubua; angngiri mataya sanrapangi garring kamateanga.

³¹ Inai a’gau’ baji’ mae ri tu kasi-asia, napakala’biriki Allata’ala; inai anjallakkangi tau lammaya, nahinai Tumappare’na.

³² Tau ja’dalaka panraki lanri kaja’dallanna, tau bajika nijagai lanri kalambusanna.

³³ Kacara’dekanga tuli niaki lalang ri pikkiranna tau bajika akkala’na; mingka nijallakkangi lalang ri pikkiranna tau dongoka.

³⁴ Kaadelanga siagang kabajikanga naangkaki areng baji’na bansaya, mingka dosaya ampa’jari tunai bansaya.

³⁵ Sannangi pa’mai’na karaenga mae ri pagawe cara’deka; mingka larroi mae ri pagawe tenaya nakkulle ampajappai tugasa’na.