Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Jabu si mehuli jadi arah kepentaren diberu, tapi iruntuhken alu kemotunna.

² Kalak bujur erkemalangen dingen patuh man Dibata, kalak si la bujur igombangina kap Dibata.

³ Kalak lenge peganjang-ganjangken bana arah mbue ngerana, tapi kalak pentar rananna jine si engkawalisa.

⁴ Adi la lit lembu penenggala, la lit ulih juma, alu gegeh lembu, mbue ulihna.

⁵ Saksi si bujur lalap ngataken situhuna, saksi si la bujur bual kerina kesaksinna.

⁶ Kalak si meganjang rukur kutera pe la banci pentar, tapi kalak si lit ukurna menukah iakapna erlajar.

⁷ Ula perteman kalak motu, la lit si banci iajarkenna man bandu.

⁸ Ngkai maka pentar kalak beluh? Erkiteken ietehna kai si ibahanna. Ngkai maka lenge kalak bodoh? Erkiteken iakapna kai pe nggo ietehna.

⁹ Kalak bodoh la diatena pe adi ia erdosa, tapi kalak bujur mesikel maka dosana ialemi.

¹⁰ Meriah ntah mesera, pusuhndu ngenca nggejapsa, kalak si deban labo igejapna penggejapenndu si tuhu-tuhuna.

¹¹ Rumah kalak bujur tetap paguh, tapi rumah kalak jahat nandangi runtuh me.

¹² Mawen-mawen iakap kalak kempak kegeluhen dalan si idalanina, tapi situhuna kempak kematen kepeken.

¹³ Tupung tawa e, banci jadi terbuni ate ceda, kenca lepas keriahen, nimai ndele ate.

¹⁴ Kalak jahat inanamina nge bekas kejahatenna, kalak bujur pe inanamina nge bekas kebujurenna.

¹⁵ Kalak bodoh tek ia kerina, kalak pentar ijagana perjingkangna.

¹⁶ Kalak pentar gelgel ia megermet, dingen isilahkenna si jahat, kalak bodoh la megermet dingen melantar erkai pe.

¹⁷ Kalak si perampang, ilakokenna perbahanen si bodoh, kalak pentar lalap teneng ia rukur.

¹⁸ Kalak lenge inanamina me kelengenna, kalak pentar, pemeteh kap si jadi ulihna.

¹⁹ Kalak jahat erjimpuh nge pagi i lebe-lebe kalak si bujur ukurna, mindo ia gelah ikelengi.

²⁰ Kalak bayak nterem temanna, tapi kalak musil temanna jine pe ernembeh ate man bana.

²¹ Adi kemalemen ate sura-surandu, mehulilah man kalak musil, adi megombang man kalak si deban erdosa kap.

²² Ise ngelakoken si mehuli, iteki dingen ndatken kehamaten, ise si erbahan jahat papak kap ia.

²³ Erdahinlah maka kam nggeluh, adi ngeranai janah kundul-kundul saja ngenca, musil me kam.

²⁴ Kalak pentar terpuji erkiteken kepentarenna, kalak bodoh terberita perban kebodohenna.

²⁵ Adi sekalak saksi ngataken si tuhuna, ikelinina kap kesah kalak, kune si erbual icilakakenna kap temanna manusia.

²⁶ Kalak si erkemalangen man TUHAN, teneng geluhna, janah keluargana pe dat kecion.

²⁷ Erkemalangen man TUHAN e kap palas kegeluhen, kalak si bage isilahina kap kematen.

²⁸ Adi nterem rayatna, ermulia me raja, adi la ras rayat runtuh me kuasana.

²⁹ Kalak si la pedas merampus, pentar kap, kalak si perampang encidahken kebodohenna kap.

³⁰ Ketenengen ukur mahanca kalak mejuah-juah, cian ate seri ras penakit kangker.

³¹ Si erbahan mehuli man kalak musil, ipermuliakenna kap Dibata, si nindih kalak si kekurangen ihinana kap Dibata si Nepasa.

³² Kalak jahat guling erkiteken kejahatenna, tapi kalak bujur terkawal perban kebujurenna.

³³ Kalak beluh pusuhna dem alu kepentaren, tapi kalak bodoh la diatena pe kepentaren.

³⁴ Kebujuren kap mahanca bangsa jadi mulia, dosa si erbahanca bangsa jadi juru.

³⁵ Pegawai si beluh ngena ate raja, tapi adi la ngasup ndahiken dahinna iukum.