Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sonon do ipataridahkon Jahowa hu bangku: Tonggor ma, sada hirang marisi buah na dob mabei.
2 Dob ai nini ma, “Aha do na nididahmu Amos?” Jadi ningku ma, “Sada tapongan marisi buah na dob mabei.” Dob ai nini Jahowa ma dompak ahu, “Domma jumpah ujung ni bangsang-Ku, Israel, seng marpangulaki be uhur-Hu mangidahsi.
3 Gabe tangis-tangis ma pandoding naboru na i rumah panumbahan bani panorang ai,” nini Tuhan Jahowa, “radag ma holi bangkei bani ganup ianan, panggijingkononkon ma ai sip-sip.”
4 Tangar ma on, nasiam na mandogei-dogei na musil anjaha na mangodoh-odoh halak na masombuh i tanoh on,
5 na mangkatahon, “Antigan pe salpu poltak ni bulan, ase manjual omei hita? Antigan salpu homa ari Sabat, ase boi aruhononta omeita laho manjual ai, ase boi paetek-etekonta tumba anjaha panaikonta harga, anjaha boi hita mandalankon sipaoto-oto marhitei timbangan palsu,
6 ase boi bolionta halak na musil marhitei pirak ampa halak na masombuh marhitei sapasang sipatu, sonai homa manjualhon lapung ni gandum?”
7 Domma pala marbulawan Jahowa bani hamuliaon ni si Jakob, “Tongon, seng anjai halupahonon-Ku be pambahenan ni sidea ai ganup.
8 Mintor lang ma dugur tanoh on halani ai, anjaha marpusok ni uhur sagala pangisini? Mintor lang ma sampur ganupan ai songon Bah Nil anjaha ipalindak-lindak, dob ai surut use songon Bah Masir?
9 Bani panorang ai,” nini Tuhan Jahowa, “bahenon-Ku ma mata ni ari sundut tongah ari, anjaha manggolapi tanoh on arian.
10 Paubahon-Ku ma ari rayanima gabe pusok ni uhur, anjaha ganup doding-dodingnima gabe tangis-tangis. Nahkonon-Ku ma guni bani binongeinima ampa hapalpalon bani ganup ulu. Bahenon-Ku ma ai songon pusok ni uhur bani parmatei ni anak sasada, anjaha ujung ni ai songon ari na gok hapaeton.”
11 “Tonggor ma, na roh ma arini,” nini Tuhan Jahowa, “tongoson-Ku ma lohei hu tanoh on, sedo lohei bani ruti barang horah bani bah, tapi bani hata ni Jahowa do, sihol tangaronni namin.
12 Jadi madou-adou ma sidea hun laut na sada hu laut na sada nari, anjaha hun utara hu hapoltakan; mardalani sidea hujai-hujon, laho mangindahi hata ni Jahowa, tapi seng anjai jumpah sidea ai.
13 Bani ari na sada ai mandatei ma anak boru na majenges ampa anak parana halani horahan.
14 Sidea na marbulawan bani Asera ni Samaria, anjaha na mangkatahon, ʻSongon sintongni manggoluh naibatamu, ale Dan, anjaha songon naibata, parlingodanmu manggoluh do, ale Barseba, maningon ragei do sidea holi, anjaha seng be tarjongjongkonsi.ʼ”
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA