Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Anggappa’ pole se’re paccini’ battu ri Batara Kaminang Tinggia. Nia’ kucini’ se’re karanjeng nibonei rappo-rappoang ti’no’.
2 Akkuta’nangi Batara ri nakke angkana, "Apa nucini’ Amos?" Appialima’ angkana, "Se’re karanjeng nibonei rappo-rappoang ti’no’." Nakanamo Batara, "Narapi’mi wattunna mae ri ummakKu Israel, rapang rappo-rappoang ti’nokamo. Tenamo nalaKupinra pole rancanaKu siagang ma’nassa laKuhukkungi ke’nanga.
3 Ri anjo alloa sikamma kelong-kelonga ri balla’ karaenga la’jari karruki. Kemae-kemae attambung mayaka, le’baka nipela’ cokko-cokko."
4 Pilangngeri, he ikau ngaseng anjallakkangai tu kasi-asia ri anne pa’rasanganga sa’genna panra’ ke’nanga!
5 Nukana ngaseng mae ri kalennu, "Teai sipato’ sallona allo-allo passua’-suarranga. Erokki’ akkaro-karo mange ambalukangi gandunta, mingka anne passua’-suarranga tena le’ba’-le’ba’na. Angngapapi nale’ba’ anne allo Pammari-marianga, sollanta akkullemo a’balu pole? Erokki accatu’, annipu ri pa’baku’ siagang jekkong ri timbanganga.
6 Gandung panraka akkullei nibalukang tinggi ballinna. A’boyaki’ tu kasi-asi tenaya nakkulle ambayaraki inranna, manna pole nainrang sipammalli sandala’ bawang, na niballi a’jari atanta."
7 Batara, Allata’alana Israel, le’baki assumpa angkana, "Tena sikali nalaKukaluppai panggaukang ja’dala’na ke’nanga.
8 Lamme’bereki buttaya, siagang sikontu taua lasusa kabusuki nyawana. Sikontu pa’rasanganga lata’goccangi siagang kammai nitoeng Binanga Nil.
9 Lanarapiki wattunna naKupalabu alloa ri tangnga alloa siagang a’jari sassangi linoa ri wattu alloa. INakke, Batara Kaminang Tinggia, anne akkana.
10 Sikamma passua’-suarrannu laKupinrai a’jari kasusaang, siagang kelong-kelonnu a’jari karru’. LaKupa’jariko ikau ancukkuruki kalennu siagang ammakeko kaeng karung tanra si’na. Rapangko anrong mangge angkarruki kamateanna ana’ sitau-tauna. Anjo alloa lakala’busangi a’jari allo sanna’ appakasi’nana pa’mai’."
11 Nakana Batara Kaminang Tinggia, "Lanarapiki wattunna naKupabattu bala kacipuranga ri anne pa’rasanganga. Lacipuruki taua, mingka teai lanri kanre. Laturerei taua, mingka teai lanri je’ne’. Cipuruki siagang turerei ke’nanga mae ri pasangKu.
12 La’lampai taua timboro’ wara’ anrai’ kalau’ untu’ amboyai pasangKu, mingka tanagappayai ke’nanga.
13 Anjo alloa, ba’lalo manna tau rungka tamangngapa-apaya latena ngaseng nangngu’rangi napakamma turere.
14 Sikamma tau assumpaya lanri barhala Samaria angkana, ‘Lanri rewatana bansa Dan’ yareka ‘Lanri rewatana Bersyeba’ — latu’guru’ kabusuki siagang tambangungami pole."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA