Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Sengko’ olle pangaton pole dhari GUSTE Allah Se Mahatenggi. Sengko’ nangale’e budhak aesse wa’-buwa’an se massa’.
2 PANGERAN mareksane, "Apa se etangale’e ba’na, Amos?" Sengko’ nyaot, "Karanjang aesse wa’-buwa’an se massa’." PANGERAN adhabu, "Baktona la mateng kaangguy Tang ommat Isra’il. Sengko’ ta’ ngoba’a Tang sajja pole ban masthe ngokom reng-oreng jareya.
3 E bakto jareya nyanyeyan-nyanyeyan e karaton bakal aoba’a daddi tanges. E man-dhimman bakal ajalamperrana mayyit se ebuwang ta’ asa’-kasa’."
4 He, mara edhingngagi, ba’na se nyecce’ reng-oreng mesken e nagara reya sampe’ reng-oreng jareya mate!
5 Ba’na ngoca’ ka aba’na dibi’, "Ce’ abidda onggu re-are paraya’an reya. Sengko’ kaburu terro awal-juwala pole, tape paraya’an jareya ta’ re-mare keya. Ba’ bila are Sabat reya se mareya, me’ olle sengko’ bisa molae ajuwal tang gandum pole? Sengko’ ce’ terrona se nyathuda, nepo ngangguy ker-taker, sarta co-ngoco oreng ban tembangan.
6 Gandum se rosak bi’ sengko’ bisa ejuwal epatenggi argana. Sengko’ nyareya oreng mesken se ta’ sanggup majar otangnga, maske otang jareya pera’ padha ban argana kasot sapasang, oreng jareya bi’ sengko’ ekenneng belli epadaddiya tang dunor."
7 PANGERAN, Allahna bangsa Isra’il, la asompa, "Sengko’ maske baramma’a ta’ epaloppa’a ka lalakonna reng-oreng jareya se jahat.
8 Bume bakal agundhegga ban reng-oreng bakal sossa’a kabbi atena. Saantero nagara bakal agundhegga sarta bakal jal-gunjalana akantha Songay Nil.
9 Bakal napa’a baktona Sengko’ macompedda are e baja beddhuk ban bume bakal pettengnga e baja seyang. Sengko’ GUSTE Allah Se Mahatenggi la ngoca’agi parkara reya.
10 Paraya’anna ba’na kabbi bi’ Sengko’ eoba’a epadaddiya kasossa’an, ban nyanyeyan-nyanyeyanna epadaddiya tanges se agingging. Bi’ Sengko’ ba’na epanyokora obu’na sarta epangangguya kaen karong menangka sossana atena. Ba’na bakal padha’a bi’ eppa’ ban ebu se nangese ana’ nonggalla se mate. Are jareya bakal eaherana kalaban kabadha’an se talebat mangennes ate."
11 GUSTE Allah Se Mahatenggi adhabu, "Bakal napa’a baktona Sengko’ madhatengnga kalaparan ka nagara reya. Oreng bakal lapara, tape banne lapar terro ngakana kakanan. Oreng bakal pelka’a tape banne pelka’ terro ka aeng. Reng-oreng jareya lapar ban pelka’ terro ngedhinga Tang pessen.
12 Oreng bakal alalana’a dhari dhaja ka lao’ ban dhari temor ka bara’ se terro ngedhinga Tang pessen, tape ta’ kera badha se nemmowa.
13 E are jareya la’-mala’ reng-oreng ngodha se ras-baras bakal kalengngerra keya polana pelka’.
14 Reng-oreng se asompa bit nyamana brahala Samaria kalaban ngoca’ kantha reya, ‘Bit dibana bangsa Dan’ otabana ‘Bit Diba Bersyeba’ — bakal labuwa ban ta’ bisa jaga pole."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA