Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kuidah ka pengenehenen si deban i bas TUHAN si Erdolat nari. I bas pengenehenen e kuidah buah pangan dem sada raga.
2 Isungkun TUHAN aku nina, "O Amos kai si iidahndu?" "Buah pangan sada raga," ningku ngaloi. Nina TUHAN man bangku, "Paksa pendungina nggo seh man bangsangKu Israel. Ukurku lanai erkusur lako ngukum ia.
3 I bas wari e ende-enden i bas istana salih jadi sora tangis ngandung. I jah i je merap bangke jelma. Bangke-bangke e ibenterken ndarat alu sinik-sinik."
4 Begikenlah enda, o kam si ndedehi kalak si kekurangen, kam si rusur ndarami dalan lako engkernepken kalak musil i bas negeri enda.
5 Nindu "Ndigan ndia wari raya enda keri, gelah banci ka kita erbinaga gandum? Lanai kita sabar nimai wari Sabat enda mentas, maka banci ka sibenaken erbinaga! Kenca bage banci sipekitik tumba pendayan, sipeberat anak timbangen penukuren, janah sipake timbangen palsu guna nipu langganenta.
6 Gandum si lanai erguna meganjang sibahan ergana. Sidarami kalak musil si la ngasup nggalari utangna, subuk nggalar sepasang selop pe la ia ngasup, jenari situkur ia jadi budakta."
7 TUHAN, Dibata nu Israel, nggo ersumpah nina, "Ngayak ndigan pe la Aku lupa kejahatenna.
8 Erdandanken si e linuren me taneh enda, janah kerina kalak i bas negeri e mbiar kerina. Negeri e iugur kerina, emaka nangkih me ia ku das, jenari surut desken Lau Nil i Mesir.
9 Paksana reh me i ja Kubahan matawari sundut tupung pantek ciger, janah doni enda jadi gelap tupung suari. Aku, TUHAN si Erdolat, nggo melasken katangKu.
10 Pesta-pestandu Kusalihken jadi penguburen janah ende-endenndu si meriah Kusambari jadi sora ngandung erkiteken ceda ate. Kubahan maka icukurndu buk takalndu jenari ipakendu uis guni, janah bali me kam ras orang tua si nangisi kematen anakna dilaki si tonggal. Wari e seh kal pagitna seh ku bas pendungina.
11 Paksana reh me maka negeri e kelihen mekelek Kubahan. Melihe me kalak, tapi labo kempak nakan; muas ia, tapi la kempak lau. Muas melihe me ia megiken kata TUHAN. Aku TUHAN si Erdolat, nggo melasken katangKu.
12 Terdaram-daram me kalak i Utara nari ku Selatan, i kenjahe nari ku kenjulu. I japa pe idaramina kata si rehna i bas TUHAN nari, tapi lalap la idatca.
13 I bas wari e subuk anak perana tah si nguda-nguda si juah-juahen terketes perbahan muasna.
14 Kalak si ersumpah i bas gelar berhala-berhala Samaria, si ngataken 'I bas gelar dibata-dibata Dan', tah pe 'I bas gelar dibata-dibata Berseba' -- kalak si bage ugapa pe guling janah lanai keke-keke."
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA