Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ I Saulus nadamba apa i Stefanus nipatesira. Nompamula eo haitu todea topangoseaka i Yesus ri ngata Yerusalem mpuu-mpuu nipandasa *ntoYahudi sampe ira nasimpotare hau ri njumangu ngata ri bagia Yudea bo Samaria. Aga *suro-suro i Yesus ledo nalai.

² Tona natundu nte Alatala nombatana i Stefanus ri dayo, bo nombatangisi ia ante nasusa mpuu rarara.

³ I Saulus nompasimbuku njuu mompandasa topangoseaka i Yesus ala domo raparasayara i Yesus. Nipebutuna banuara nipesuana bo isema-sema nomparasaya i Yesus, langgai bo mombine, niumbunjaina ri savalikuna bo nisuarakana riara ntarunggu.

⁴ Topomparasaya nasimpotare haitu, nompatolele kareba lako nte Alatala ri umba-umba.

⁵ Saito ira nosanga i Filipus. Ia hau ri ngata Samaria bo nipatolelena ka tona hamai i Yesusmo Magau Topepakasalama anu nijanji nu Alatala.

⁶ Tempo todea nangepe i Filipus notesa bo nikitara kabaraka-kabaraka nipoviana, nipariarara mpuumo anu nitesana haitu.

⁷ Apa nadea *seta nipopalaina lako nte tona. Seta-seta haitu nesuvu bo nongare-ngare. Nadea muni tona nakoyo, tona nakejo, bo tona napunggu nipakabelona.

⁸ Jadi nadamba mpuumo rara ntona ri ngata Samaria.

⁹ Ri ngata haitu naria saito toposibalimata nosanga i Simon. Bara sakuya kasaena ia nompopokumaa todea ri ngata Samaria sabana poviana. Bo niulina iamo tona nabaraka.

¹⁰ Pura-pura tona ri ngata haitu, tomaoge bo tona biasa, nompariara tesana. Niulira, "I Simon mai naria baraka ntupu anu niuli 'Baraka Oge'!"

¹¹ Nasae mpuumo ia nompopokumaa ira ante posibalimatana sampe ira pura-pura nompariara ia.

¹² Tapi i Filipus nompatolele Kareba Belo ka ira. Kareba Belo haitu nanguli Poparenta nu Alatala bo i Yesus Kristus, Magau Topepakasalama. Niparasayaramo kareba haitu bo ira nidiumo, langgai bo mombine, tandana ira nomparasaya i Yesus.

¹³ I Simon mboto nomparasaya, bo naupu ia nidiu, nituntunina njuumo i Filipus. Nokumaa mpuu ia nanggita kabaraka-kabaraka bo tanda-tanda nipokumaaka nipovia i Filipus.

¹⁴ Suro-suro ri ngata Yerusalem nangepe kareba tona ri ngata Samaria nantarima tesa nu Alatalamo. Jadi nitudura i Petrus bo i Yohanes hau ri Samaria.

¹⁵ Tempo i Petrus bo Yohanes nakava hamai, niposambayakara toSamaria anu nomparasaya i Yesus ala Nosa Gasa nu Alatala manau nte ira.

¹⁶ Apa Nosa Gasa nu Alatala dopa nanau mombakuasai ira. Ira aga nidiu, tandana ira nomparasaya i Pue Yesus.

¹⁷ Jadi, i Petrus bo i Yohanes nombadika palera ri balengga ntoSamaria haitu bo Nosa Gasa nanau nte ira mpuu.

¹⁸ Nikita i Simon suro-suro nombadika palera ri balengga ntona haitu bo Nosa Gasa nombakuasai ira. Jadi nikeninamo doi ka i Petrus bo Yohanes apa ia madota mangali kabaraka haitu.

¹⁹ Niulina, "Dekei ka yaku muni kuasa tutu ala yaku muni mamala mombadika paleku ri balengga ntona sampe ira rakuasai Nosa Gasa nu Alatala."

²⁰ Tapi nesana i Petrus, "Masurukavu mpuu iko bo doimu! Nisarumakamu kabaraka nidekei nu Alatala mamala raali ante doi?

²¹ Iko ledo ntoto masipato metuntuni riara pokarajaa kami hitu, sabana raramu ledo nanoa ri panggita nu Alatala.

²² Nisaniku iko tu nasiriati bo iko nipobatua dosa! Jadi, kajeamo lako ri patujumu nadaa, bo perapimo nte i Pue ala raampungiNa pekirimu nadaa tutu!"

²³ (8:22)

²⁴ Nanguli i Simon, "Ai! Tulungi posambayakamiu yaku, perapi nte i Pue ala anu niulimiu tutu ledo mambela yaku."

²⁵ Naupu i Petrus bo Yohanes nosabi bo nompatolele tesa i Pue ka todea, nanjilimo ira hau ri ngata Yerusalem. Bo riara polipara haitu nipatolelera Kareba Belo ri ngata dea ri bagia Samaria.

²⁶ Naria *malaeka nu Alatala nakava nangulika i Filipus, "Koimo hau ri puluna sampe mukava dala motua lako ri ngata Yerusalem hau ri ngata Gaza." (Dala haitu domo nasaro niose.)

²⁷ Jadi haumo i Filipus. Tempo haitu naria saito toEtiopia ri dala haitu notua lako ri ngata Yerusalem hau manjili ri ngatana mboto. Ia tona nalanga panggana bo ia nipakakuasa nombaurusi kakalumana i Kandake, Magau Mombine ri tana Etiopia. Tona haitu dako nombasomba Alatala ri ngata Yerusalem bo ia nodoka nanjili hau ri ngatana mboto. Tempo ia nonturo riara dokana, ia nombabaca buku nitulisi Nabi Yesaya nggaulu.

²⁸ (8:27)

²⁹ Jadi Nosa Gasa nanguli ka i Filipus, "Koi ragamo doka ntona hautu."

³⁰ Jadi nangovamo i Filipus hau mantotoaka doka haitu. Niepena tona riara nu doka nombaca buku nitulisi Nabi Yesaya. Jadi nekutanamo i Filipus, "Nisanimiu batuana anu nibacamiu tutu, tua?"

³¹ Nesana toEtiopia, "Berimba kusani ane ledo ria tona mombabatuasina ka yaku?" Pade niunakana i Filipus mesavi ri doka, bo monturo ri sinjorina.

³² Hitumo tesa-tesa lako ri buku Nabi Yesaya nibacana haitu: Ia mpo bimba niumbu rakeni rasambale, mpo *ana bimba ledo nombee ane nigau buluna. Ivesia muni ia ledo ntoto sambelaa notesa.

³³ Ia nisalai bo ledo nitangara nanoa. Ia nasalisa nipatesi sampe ledo ria mulina mamala ratutura ntona.

³⁴ Nanguli toEtiopia haitu ka i Filipus, "Uli kaku isema kakanana niuli Nabi Yesaya tempo nitesana tona nirapaka bimba, karona mboto atau tona ntanina?"

³⁵ Jadi, i Filipus nompasimbayu Kareba Belo i Yesus ka tona haitu nompamula lako ri tesa-tesa nibacana pangane.

³⁶ Riara polipara haitu, nikitara uve napara dala. Nanguli toEtiopia, "Peintamo! Moitu uve. Mamala yaku radiu sii-sii?"

³⁷ [Nesanamo i Filipus, "Ane niparasayamiu mpuu, mamala komiu radiu." Nanguli toEtiopia haitu, "Niparasayaku i Yesus Kristus Iamo Ana nu Alatala!"]

³⁸ Naliu sia, nipopetaanamo dokana, bo nanaumo ira randua lako ri doka bo hau riara nu uve. ToEtiopia haitu nidiu i Filipusmo, tandana niparasayana i Yesus.

³⁹ Nesore ira lako riara nu uve, Nosa Gasa nu Alatala nangala i Filipus lako ri sia bo domo nikita ntoEtiopia. ToEtiopia haitu nompapola polipana bo nadamba mpuu rarana.

⁴⁰ Ledo nisani-sani, nariamo i Filipus ri ngata Asdod. Nipapolana polipana bo nipatolelena Kareba Belo i Yesus ka todea ri pura-pura ngata sampe nakava ri ngata Kaisarea.

Kisah Para Rasul

Video Kisah Para Rasul 8

Ikuti Kami:

KONTAK | PARTISIPASI | DONASI