Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tikan itengen si Paulus karina anggota runggu i, idokken mo ranana, "Kènè karina kaka anggi! Merperangè ngo aku ipas nasa ukurku menguèi Dèbata soh mi ari sidari èn."
2 Idokken si Paulus kessa ranana i, mèter idokken Imam Huntuun simergerar si Ananias mo asa iparap sicènder i gembar si Paulus i ia.
3 Nai idokken si Paulus mo mbang imam huntuun i, "Iparap Dèbata mo ko alè dingding sinikapur! Kundul ngo kono i sidi lako menghukum aku merguru mi pati-patiin i, keppèken kono sendiri mengelanggar pati-patiin i, ai idokken kono asa iparap aku, pada hal enggo merralo i mi pati-patiin!"
4 Nai nina sicènder i gembar si Paulus i mo taba si Paulus, "Kasa ilèai kono imam huntuun Dèbata?"
5 Ialoi si Paulus mo, "Kènè alè dengan, oda kubettoh mula imam huntuun i keppèken ia. Tersurat ngo ibas Bibèl bagèen, 'Ulang ilèai kono pengulu bangsamu!'"
6 Ibettoh si Paulus mo horong Sadusè ngo keppèken dèba sipulung i, dèba nai horong Parisè. Kerna nai nina mo taba perrunggu i, "Kènè karina kaka anggi! Kalak Parisè ngo aku, janah dukak Parisè. Iadili pè aku isèn, kumarna pengharapen dekket kumarna percaya ngo aku, balik nggelluh kalak sienggo matè."
7 Idokken kessa bagidi gabè merselisih mo horong Parisè dekket Sadusè, janah gabè bellah dua mo perrunggu i.
8 (Ukum kalak Sadusè, oda percaya balik nggelluh sienggo matè, malaèkat pè oda ngo nina lot, bang tendi pè; tapi ukum horong Parisè, iperketuhu ngo i karina.)
9 Guttur mo runggu i, kèkè mo dèba kalak Parisè sigabè guru agama mengalo, nina mo, "Cituk poda lot kesalahen kalak èn kuidah kami! Tah tuhu ngo lot tendi barang malaèkat mermongkamisa!"
10 Tapi makin guyuna mo perselisihen kalak idi i, gabè mbiar mo komandan soridadu i tah bakunè gabè ipersuragè kalak i nola si Paulus dok atèna. Idokken mo roh soridadu lako merembah si Paulus i tengah-tengah kalak i nai mi tangsi.
11 Nai bernginkenna i, cènder mo Tuhan i, i gembar si Paulus janah mendokken tabasa, "Pos atèmu! Enggo ikesaksiken kono aku i Jerusalem, kennah bagi ma ngo ikesaksiken kono Aku i kuta Rom!"
12 Sicegenna nola sibarembenkenna i, lot mo dèba kalak Jahudi i merbulaban. Mersumpah ngo kalak i, mak ndorok mangan mak ndorok mènum kalak i, ukum mak dèng ipusa kalak i si Paulus.
13 Lebbih ngo empat puluh kalak simerbulaban i.
14 Idahi kalak i ngo imam-imam Ekuten dekket pengulu-pengulu, nina mo taba kalak i, "Enggo ngo kusumpahken kami mak ndorok mangan mak ndorok mènum kami, sidekkah mak dèng kubunuh kami si Paulus.
15 Kerna naidi, baing kènè mo rebbak dekket anggota Mahkamah Agama surat taba ekuten soridadu i, asa iembah nola si Paulus mi hadeppen ndènè, bagè cara naing iperèso kènè dèng perkarana i. Tapi ukum kami, enggo kin mèma i tengah ndalan, asa i sidi kupusa kami ia i tengah ndalan i dèng."
16 Tapi terbertik ngo bulaban kalak idi i bai bebberrè si Paulus. Jadi laus mo ia mi tangsi lako magahken taba si Paulus.
17 Nai idilo si Paulus mo sada kalak perwira mi gembarna, nina mo tabasa, "Taruhken lebbè anak perana èn mendahi komandan soridadu, ai lot sinaing bagahenkenna tabasa."
18 Jadi itaruhken mo anak perana i mendahi ekuten soridadu, nina mo mbangsa, "Idiloi si Paulus tahanen i ngo aku, janah idokken asa kutaruhken anak perana èn taba Kono, kerna lot nina sinaing bagahenkenna bamu."
19 Nai icèkèp komandan i mo tangan anak perana i mennegu narih mboni, nai ikuso mo ia, "Kadè pana naing bagahenkenmu bangku?"
20 Ialoi anak perana i mo ia, "Mertuptup ngo kalak Jahudi, lako mengidoken asa iembah Kono si Paulus baremben mi runggu, bagè cara naing iperèso kalak i dèng perkarana i asa ntangkas.
21 Tapi ulang mo uèi pengidoon kalak idi i, ai enggo lebbih empat puluh kalak merbulaban, mengentip ngo kalak idi i tengah ndalan, asa i sidi nina ipusa kalak i si Paulus. Ai rebbak mersumpah ngo enggo kalak i, mak ndorok mangan barang mènum pè kalak i, sidekkah madèng ibunuh kalak i si Paulus. Bagèndari pè enggo mo kebbas kalak idi, pellin katamu nai ngo pèmaan kalak i."
22 Jadi nina komandan i mo tabasa, "Ulang pella ibagahken kono barang taba isè pè sienggo nibagahkenmu i taba aku." Nai ipasulak mo ia balik.
23 Nai idiloi komandan i mo dua kalak perwira, nina mo taba kalak i, "Pèmaken lebbè dua ratus kalak soridadu dekket pitu puluh kalak nai simerkuda, dekket dua ratus kalak nai lengkap mersenjata, asa berkat kènè mi Kaisarèa pukul sibah berngin èn.
24 Pèmaken kin ma mo sada kuda kundulen si Paulus, asa taruhken kènè ia mendahi Gubèrnur Feliks."
25 Nai ibaing komandan i mo surat embahen kalak i bagèen katana,
26 "Tabè mo bamu alè sinipersangapen Gubèrnur Feliks, bangku nai Klaudius Lisias.
27 Itangkup kalak Jahudi ngo èn; jadi sinderrang naing ipusa ia, roh ngo aku dekket soidadu mengerampasisa, kubettoh kessa kalak Rom ngo ia keppèken.
28 Tapi sinderrang naing kuperèso ia kadè salahna, kuembah mo ia mi runggu mbellen agama kalak i.
29 Keppèken oda lot kesalahenna, memmaing patut merutang kessah ia, barang pè ikurung. Ai pellin tersèngèt pati-patiin agama kalak i ngo perselisihenna.
30 Nai lot mo magahken bangku, lot taki-taki jahat kalak idi tabasa. Kerna naidi ngo asa kupasulak ia mendahi kono. Enggo ma ngo kudokken taba pengadu i, asa taba kono iandèken pengadunna i."
31 Jadi iembah soridadu i mo si Paulus, bagè perèntah sienggo nijalona i, itaruhken mo bernginna i soh mi Antipatris.
32 Sibarembenkenna i nola pellin soridadu merkuda i nai ngo kessa mennaruhken si Paulus soh mi Kaisarèa, ai molih ngo sidèbankenna i mi markasna.
33 Soh kessa kalak simenaruhken i mi Kaisarèa, iberrèken kalak i mo surat i taba gubèrnur, janah si Paulus i pè itogiken mo mi hadeppenna.
34 Ijaka gubèrnur i kessa mo surat i, ikusoi mo si Paulus, barang i dikè nai asalna. Ibettoh kessa mo kalak Kilikia ngo keppèken si Paulus i,
35 nina mo tabasa, "Kuperrèso pè perkaramu i, mula enggo kessa roh simengaduken kono mi sèn." Nai idokken mo asa itahan si Paulus ibas tahanen si Herodes.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA