Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali ojo karata i mPaulus sira dua i Barnabas nja’u kota Ikonium, sira masua sindara-ndara ri raya banua to napampotunde nto Yahudi, panewa sira mampakarebaka tau to siromu nja’u ria kareba matao. Tempo sira magombo etu sira mampakanasa kojo kareba matao wali see naka boros kojo tau to mangaya i Pue Yesu. Tau to mangaya etu re’e to Yahudi pasi re’e seja to si’a to Yahudi.
2 Pei to Yahudi to bo’onya mangaya, sira mangarotai raya ntau to si’a to Yahudi see sira maja’a rayanya resi tau to mangaya i Yesu etu.
3 Pei i Paulus sira dua i Barnabas masae sira dua maroo-roo nja’u kota etu. Sira taa meka rayanya mampakarebaka kareba mangkonong i Pue. Pasi i Pue mampaponsanika tau nja’u ria monso pu’u anu to napakarebaka nsira dua mangkonong kanoto i mPue, apa Ia mangawaika sira dua kuasa mangika palaong to taa rapobiasa to mawali tondong resi tau pasi to mampakaipu raya ntau.
4 Pei tau nja’u kota etu sira mawali yau dua ntila. Re’e sangga’a to mangaluluka to Yahudi, pasi re’e sangga’a mampasimbalika pomakau i mPue Yesu.
5 Wali yako etu tau to si’a to Yahudi pasi to Yahudi seja sindara-ndara pei tau tu’a nsira mangansongka damangansesai i Paulus sira dua i Barnabas pasi mangantasoka sira dua watu.
6 Pei sira dua re’e mangandonge songka ntau etu, wali sira dua miyai yako ri kota Ikonium etu, yau wo’u ri propinsi Likaonia. Nja’u ria sira yau ri kota Listra pasi Derbe pasi ri lipu-lipu to ri awenya.
7 Nja’u ria seja sira dua mampakarebaka resi tau kareba matao.
8 Wali nja’u kota Listra, re’e samba’a tau to malulu witinya yako ri pampoana. Ngkai etu ojo matundatunda, ia taa kojo nakurang malinja apa taa maroso witinya.
9 Wali ngkai to taa maroso witinya etu mampodongeka seja tempo i Paulus magombo. Tempo etu i Paulus mangalo’aka kojo resi ngkai etu pei mangansani ngkai etu ia mangaya i Pue Allah nakurang mampakatao ia.
10 Wali see naka i Paulus maroso loonya manganto’oka ia, “Pakore manoto!” Wali ngkai etu ia mansaka matambesi tudu ngkangkore panewa ia malinja.
11 Wali ojo pangkita ntau boros palaong to naika i mPaulus resi ngkai etu, sira sakaboo, magombo ri raya basa nsira, etu semo basa Likaonia, sira manganto’o, “Gete! Tau si’i bara pue-pue to napue ngkita, pei sira roomo mawali yau ewa kita to lino ta’anya pei ratamo mangasawang kita!”
12 Wali tau boros etu mangansangaka sira dua mangampake sanga nu pue-pue nsira. I Barnabas sira mangansangaka pue Seus, pasi i Paulus sira mangansangaka pue Hermes apa ia semo to biasa magombo.
13 Wali yako etu ma’i to pampue mpue Seus. Tau etu semo to mampasilonga banua to napampue ntau resi pue Seus. Banua etu re’e ri sambali ngkota. Wali to pampue etu ia mangangkeni bara sawei mba’a sapi to pongka pasi mangkeni seja sese ngkaju nja’u wombo ngkota. Naka pei ia mangkeni sapi pasi sese ngkaju etu apa ia pasi tau boros damampampueka resi i Paulus sira dua i Barnabas damampakabae sira dua.
14 Pei ojo pandonge i Barnabas sira dua i Paulus songka ntau boros etu, sira mangansia yau pakenya apa mawo kojo rayanya. Pasi sira maripo njo’u oyo ntau boros panewa maroso loonya manganto’o,
15 “Gete komi! Maka pei komi mangika palaong si’i? Kami si’i ojo to lino seja sewaju pei komi. Naka pei kami ma’i resi komi ma’i mangangkenika komi kareba matao, see komi maya mangandolika tangomu yako ri pue to tare batuanginya si’i pei maya mampue mampakabae i Pue Allah anu to tuwu. Etu semo i Pue Allah anu nampapowali yangi, lino, tasi, pasi samparia bananginya.
16 Wali tempo owi i Pue Allah ojo mangabiaka yau komi to si’a to Yahudi mangalulu pamporani ndaya to si komi.
17 Pei nempo ewa wetu, i Pue Allah Ia taa mangkalingan mangawaika komi tondong to mampakanasaka komi Ia re’e, apa Ia sangkani mangika anu to manoto resi komi. Ia mantudumaka uja yako ndate yangi pasi Ia mangika see mawua pinumuya ngkomi. Ia mangawaika komi gana pangkoni pasi kasanang ndaya.” Wali etu semo gombo i mPaulus sira dua i Barnabas resi tau boros etu.
18 Pei nempo ewa see gombonya, tiroo mandasai naepe nsira dua manganta’amaka pamporani ntau boros, apa tau boros etu taa kojo napandooka rani mangkeni pampuenya resi sira dua.
19 Wali yako etu ratamo to Yahudi to yako ri kota Antiokhia pasi kota Ikonium, sira rata nja’u kota Listra etu. Tau rata etu mampogomboka tau Listra manganto’o maja’a i Paulus sira dua i Barnabas panewa tau Listra etu mampasimbalika yau tau to rata etu. Wali sira mangantasoka i Paulus watu panewa mangaditi yau ia ri sambali ngkota. Sira mampandayaka ia matem.
20 Pei tempo etu anaguru i mPue Yesu to re’e ri Listra etu, sira yau makore tiku i Paulus. Wali tempo etu i Paulus naendo muni panewa mambangu pei yau muni njo’u raya ngkota. Yako etu ojo kaeonya rao i Paulus sira dua i Barnabas polas wo’u njo’u kota Derbe.
21 Rata ri Derbe etu i Paulus sira dua i Barnabas mampakarebaka kareba matao resi tau ri kota etu, panewa boros tau to mawali anaguru i mPue Yesu. Yako etu sira dua mawolili muni ri kota Listra pasi ri kota Ikonium pasi ri kota Antiokhia to ri propinsi Pisidia.
22 Wali samparia lipu to kaliu nsira dua etu, sira mampakaroso raya ntau to anaguru i mPue Yesu. Pasi sira manganto’oka tau etu, “Ne’e kojo pandooka mangalulu i Pue pei pakaroso pangaya ngkomi. Kita damangarata boros kasesa ri tempo si’i. Taa maya kita taa datarata kasesa etu, apa ojo karoonya kita mangarata kasesa panewa kita maya mangarata anu to matao to rawaika resi tau to Makolenya i Pue Allah.” Ewa see gombo nsira dua.
23 Wali yako etu sira dua mangampilis bara sawei mba’a tau ri ponto-ponto lipu naka re’e tau to mangaya. Tau etu napilis nsira dua damawali ketua ntau to mangaya to siromu ri lipu-lipu etu. Wali roo etu sira dua mampokai-kaika ketua-ketua etu tongonya mangorop. Sira mangansarumakaka tau etu resi i Pue Allah see Ia damangararamaka sira, apa Ia semo to naaya nsira.
24 Yako etu i Paulus sira dua i Barnabas polas wo’u liu nja’u propinsi Pisidia panewa rata nja’u propinsi Pampilia.
25 Rata nja’u ria sira yau mampago kota Perga panewa mampakarebaka tau ri kota etu tuntu i mPue. Roo see sira polas wo’u yau lo’u kota Atalia ri wii ntasi.
26 Wali ojo karata nsira la’u kota Atalia etu sira dua mapone ri bangka panewa malayag mawolili muni njo’u kota Antiokhia to ri propinsi Siria apa yako nja’u ria pangampokau ntau sira dua seore. Tempo pangampokau etu, re’e tau to mampokaika sira dua mansarumakaka sira resi i Pue Allah see Ia damangajagang sira yako ri kanotoNya tempo sira mangika palaong to danaika nsira etu. Wali palaong to etu sira roomo mangika see naka sira mawolili muni.
27 Wali ojo kadongka nsira nja’u Antiokhia, sira mana’u yako ri bangka panewa roo see sira yau mampasiromunaka tau to mangaya to nja’u nja’u ria. Panewa sira dua mangansaritaka tau etu mangkonong samparia to naika i mPue Allah ri raya mpalinja nsira. Pasi sira dua mangansaritaka seja tau Antiokhia etu mangkonong ewa wimba naika i mPue Allah seore mampaponsanika seja tau to si’a to Yahudi see tau to si’a to Yahudi etu mangaya seja i Pue Yesu.
28 Wali yako etu i Paulus sira dua i Barnabas masae sangkodi maroo-roo sindarandara pei anaguru i mPue Yesu nja’u kota Antiokhia etu.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA