Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Anu najadi ri ngata Antiokhia najadi munimo ri ngata Ikonium. I Paulus bo i Barnabas hau ri *banua petupu ntoYahudi, bo ri sia nitesa-tesara ka tona sampe nadea *toYahudi bo tona ledo toYahudi nomparasaya i Yesus.

² Tapi toYahudi anu ledo nadota nomparasaya, aga nompakapane rara ntona ntanina ledo toYahudi sampe navuu matara nanggita topangoseaka i Yesus.

³ I Paulus bo Barnabas nasae nonturo ri sia. Ledo naeka ira notesa i Pue Yesus ka tona. Nitesara pepotoveNa bo kabelo raraNa bo i Pue nombadekei kuasa ka ira movia kabaraka-kabaraka bo tanda-tanda nipokumaaka ala rasani ntodea tesa nu suro-suro haitu mpuu-mpuu nakana.

⁴ Tapi tona ri ngata haitu ledo nasintuvu. Naria nosabingga ka toYahudi, bo naria muni nosabingga ka suro-suro.

⁵ ToYahudi bo pakeni ntoYahudi nosanggani-nggani ante tona ntanina ledo toYahudi, nasintuvu mompandasa bo mombarempe i Paulus bo i Barnabas ante vatu.

⁶ Tapi nisani i Paulus bo Barnabas nia ntona haitu, jadi nalaimo ira hau ri bagia Likaonia, haitumo ri ngata Listra, ngata Derbe bo ri ngata-ngata ntanina ri bagia haitu.

⁷ Nipatolelera muni Kareba Belo i Yesus ri sia.

⁸ Ri ngata Listra naria saito langgai napunggu kadana lako ri pompoanakame. Ia ledo sanggani nolipa sabana kadana ledo naroso.

⁹ Topunggu haitu nonturo nangepe tesa i Paulus. I Paulus nanggita tona haitu bo nisanina tona haitu mamala rapakabelo sabana niparasayana mpuu. Jadi i Paulus nompeintaka ia,

¹⁰ bo nanguli ante suara namangga, "Peangga pakanoa!" Jadi, neanggamo topunggu nasalisa bo kaliu-liu nolipamo.

¹¹ Nanggita anu nipovia i Paulus, nongaremo todea ante basara mboto, haitumo basa Likaonia. Niulira, "Nanau ri duniamo *viata-viata mpo karo manusia!"

¹² I Barnabas niulira viata nosanga i Zeus, bo i Paulus niulira viata nosanga i Hermes, apa iamo topotesa.

¹³ Ri savaliku ngata haitu, naria banua petupu ka viata Zeus. Topojaga banua haitu nanggeni japi-japi pomava ante bunga-bunga hau ri bobaa nu ngata, sabana ia nosanggani-nggani nte todea madota mosambale japi haitu mombasomba i Paulus bo i Barnabas.

¹⁴ Niepepa i Paulus bo i Barnabas nia ntodea haitu, nibiteramo pakeara mboto, tandana nasusa mpuu rarara sabana todea haitu madota mombasomba ira. Nangovamo ira hau ri tatanga ntodea bo nongare nombatagi todea ivei:

¹⁵ "Nemo! Nee mpuu rasombamiu kami! Kami hii manusia biasa nasimbayu mpo komiu! Kami nakava ri sii mompatolele Kareba Belo ka komiu ala komiu mompalaisi kabiasamiu anu ledo naria gunana, evamo nombasomba viata-viata. Komiu kana metupu nte Alatala anu natuvu sampe ri kasae-saena. Iamo nompajadi langi bo tana bo tasi bo pura-pura isina.

¹⁶ Tempo nggaulu, Alatala nompalamba manusia natuvu nangoseaka dotara mboto.

¹⁷ Tapi nau ivesia, ledo nalinga raraNa nombadekei tanda-tanda ka kita ala rasanita Iamo Alatala. Ia nabelo mpuu nte kita, nidekeiNa ka kita uda lako ri langi, bo asele mpanggaviata ri tempona. NidekeiNa kandea ka kita bo nipakadambaNa rarata."

¹⁸ Nau suro-suro notesa ivehaitu, sakidepa ledo nipakulera mombataamaka todea manggeni pesomba ka ira.

¹⁹ Naupu haitu, bara sako-ndua toYahudi lako ri ngata Antiokhia ri propinsi Pisidia bo muni lako ri ngata Ikonium nakava ri ngata Listra. ToYahudi haitu nantanara todea ri ngata Listra ala ira muni mangeva i Paulus sampe ira nombarempe i Paulus ante vatu bo niumbunjaira hau ri savaliku ngata. Niulira namatemo ia.

²⁰ Tapi tempo topomparasaya ri sia neangga nompatiku ia, nembangu mpanjili ia bo nesua riara nu ngata. Naeo mpadondo hau ia ri ngata Derbe nosanggani-nggani ante i Barnabas.

²¹ Ri ngata Derbe, i Paulus bo i Barnabas nompatolele Kareba Belo bo nadea tona nomparasaya i Yesus. Naupu haitu nanjilimo ira randua hau ri ngata Listra. Lako ri ngata Listra hau ri ngata Ikonium pade napola hau ri ngata Antiokhia ri propinsi Pisidia.

²² Ri ngata-ngata haitu ira nompakaroso rara ntopangoseaka i Yesus bo nompopatora ira nee molengga-lengga momparasaya. Niulira, "Kita kana mombarasai kasusa bo kapari ruru pade mamala kita mombarasai kasana ri Poparenta nu Alatala."

²³ Ri ngata-ngata haitu i Paulus bo i Barnabas nanganggataka pakeni ntodea topangoseaka i Yesus. Ira nopuasa bo nosambaya, nerapi i Pue mombajagai pakeni haitu, apa Iamo panjarumakara.

²⁴ Naupu haitu i Paulus bo i Barnabas nompapola polipara noliu ri bagia Pisidia sampe nakava ri propinsi Pamfilia.

²⁵ Naupu ira nompatolele tesa nu Alatala ri ngata Perga, notuamo ira hau ri ngata Atalia ri bivi ntasi.

²⁶ Ri sia ira nesavi kapala mbaso bo nanjili hau ri ngata Antiokhia ri propinsi Siria. Ri ngata Antiokhia haitumo nipanganggataka ira bara ipia bo niposambayaka ntopangoseaka i Yesus. Niposambayaka ala Alatala mompoasi bo mombajagai ira riara pokarajaara anu dako nipakaupura sii-sii.

²⁷ Tempo nakava ri ngata Antiokhia, nipasiromura topomparasaya i Yesus bo nitesakara pura-pura anu nipovia nu Alatala ri polipara. Nitesara muni Alatala nombadekei loga ka tona ledo toYahudi momparasaya i Yesus.

²⁸ Nasae i Paulus bo i Barnabas nesai ri ngata Antiokhia nosanggani-nggani ante topangoseaka i Yesus ri sia.

Kisah Para Rasul

Video Kisah Para Rasul 14

Ikuti Kami:

KONTAK | PARTISIPASI | DONASI