Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Ia to mangka jaji jio kota Antiokhia susi bang una to jaji jio kota Ikonium. Malemi Paulus sola Barnabas mentama bola passambajangan to-Yahudi namangngajahhi. Buda to-Yahudi sola to-Yunani memmatappa' lako Puang Isa.

² Apa ia to to-Yahudi to cia' matappa' rrasi tau tangngia to-Yahudi anna kaba'cii to tomatappa' lako Puang Isa.

³ Masainni Paulus sola Barnabas torro jio. Te'da namalaja' mpangpeissenan kameloan penawan-Na Puang. Napabutti tooi Puang kumua tongan to kareba napangpeissenan, nasaba' nabenni kuasa la mpugauk tanda mejangngaran.

⁴ Apa sisala-salai to tau lan joo kota na sisesean. Den to rempe' lako to-Yahudi na den too to rempe' lako joo rasulu' dua.

⁵ Mesa' kadai to to-Yahudi sola to pekaamberanna na ia to bangsa tangngia to-Yahudi la ssessai narura batui joo rasulu'.

⁶ Apa ia tonna issenni joo, malaii lako tana Likaonia, natorro sikandoppi' kota Listra na kota Derbe

⁷ mpangpeissenan Kareba Kasalamatan jio.

⁸ Den mesa' muane jio kota Listra tangnaissen lumingka, sanga kupi'i simula jajinna.

⁹ Cumadokko bangngi mpesa'dingngi Paulus tonna mangngajahhi. Nakaje'jekki Paulus naissenni kumua matappa' joo tau anna wa'ding dipamaleke.

¹⁰ Naandongngi mangkada ngkuanni, "Ke'deh maruruhko!" Ta'pa ke'dehmi, nalumingka.

¹¹ Ia tonna kitai tobuda to apa napugauk Paulus, napetambanni mangbasa Likaonia nakua, "Mellaomi to dewata mangrupa tau lan tangnga-tangngata'."

¹² Nasangaii Zeus to Barnabas na ia to Paulus nasangaii Hermes, sanga ia mangbicara.

¹³ Ia to bolana dewata Zeus salean kota. Ia to imangna mbawa ba'tu pira-pira sapin muane sola bunga lako babangan kota, sanga madoangngi la mangkaroba lako rasulu' sola tobuda.

¹⁴ Nca'ce-ca'cei pakeanna Barnabas sola Paulus tonna issenni to apa la napugauk tobuda, nakinjara' tama tangnga-tangngana nakuanni,

¹⁵ "Ee kamu' sola ngasan ammimangpasusira tuu? Tolino biasa bang unakan tee susi kamu'! Iari kami' kintee la mpangpeissenanrakan Kareba Kasalamatan lako kamu', dikua ammipatorroi tee apa tangmakkeguna, ammipole lako Puang Allataala to tuo, to mpaden langi' sola lino na tasik na sininna to issinna.

¹⁶ Ia to wattu pura diboko', napupangngelohna bang Puang Allataala to sininna bangsa pada nturu' ia pakkaeloranna.

¹⁷ Apa te'dara natangmpangpekitan kalena lan mangrupa-rupa panggaukan melo susinna: naben kamu' uran jao mai langi' sola assele' padang ke wattunna omi. Naben kamu' kande, napemasannangngi tooi to penawammi."

¹⁸ Apa moi namangkada susimo joo tuu lako rasulu', ci'di'mora nate'da nakullei nnanggaii to tobuda la mangkaroba lako kalena.

¹⁹ Apa den to-Yahudi ratu jio mai kota Antiokhia na kota Ikonium narasii to tobuda, narura batui to Paulus, namane' nggararakki lako salean kota, sanga nasangai kumua matemi.

²⁰ Apa ia tonna sirempun to tomatappa' jio ntalimbungngi, mi'cokki namentama pole' kota. Masawanna malei lako kota Derbe sola Barnabas.

²¹ Ia tonna mpangpeissenan Kareba Kasalamatan Paulus sola Barnabas jio kota Derbe, buda tau memmatappa' lako Puang Isa. Mangkai joo polemi lako kota Listra, tarruh lako kota Ikonium, namane' lako kota Antiokhia jio tana Pisidia.

²² Napamawatang ngasan penawanna to tomatappa' lan simesa'-mesa' kota, dikua anna tatta' to kamatapparanna. Nakuanni, "La buda kamaparrisan diolai, tamane' mentama Lino Barun-Na Puang Allataala."

²³ Naangka' tooi Paulus sola Barnabas to pekaamberan lan simesa'-mesa' jamaa. Puasai sola massambajang jolo', namane' mpangbenni joo pekaamberan lako Puang to nakatappa'i.

²⁴ Mangkai joo mpatarruhmi kalingkanna nnola tana Pisidia lako tana Pamfilia.

²⁵ Ia tonna mangka mpangpeissenan kadan-Na Puang jio kota Perga malei lako kota Atalia,

²⁶ namane' mangkappala' pole lako kota Antiokhia jio tana Siria. Iamo joo kota Antiokhia nanii mpamula kalingkanna tonna tee. Ia toomo to jamaa jio mpassambajanganni, dikua naampaii Puang Allataala lan jamanna to puramo najama too.

²⁷ Ia tonna ratumo lako, nasuai nasirempun to jamaa jio kota Antiokhia. Nacuritan ngasanni matumbai Puang Allataala ntulungngi nawa'ding njama jamanna. Nacuritan tooi matumbai Puang Allataala ntulungngi anna ia to bangsa tangngia to-Yahudi memmatappa' lako Puang Isa.

²⁸ Masainni Paulus sola Barnabas torro jio sola to tomatappa'.

Kisah Para Rasul

Video Kisah Para Rasul 14

Ikuti Kami:

KONTAK | PARTISIPASI | DONASI