Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Kareb ineh teh Raca' Herodes nengecuk ngedereh tuda'-tuda' lun sidang.
2 Idi ieh nengecuk ngaté Yakub kinanak Yahya ku pelapet.
3 Idi kareb ieh nenier kekamen ineh nengawang niat lun Yahudi, idi petacu ieh nengakem Pétrus teh. (Ieh ineh kareb aco Rayeh Ruti luk Na Lamud.)
4 Idi kareb ieh pangeh nengakem neneh, idi ieh nenuet neneh bang tutup, idi nemaré neneh bang palad pulu' anem lun pebunu'. Idi apat burur lun pebunu' ineh pelibal-pelibal matar neneh. Herodés pian ngelio neneh pa kiung lun mula' muci ratnan Irau Paska.
5 Ngaceku ineh Pétrus ita bang tutup; iamo' sidang ineh nesembayang kuanneh inan Allah dengan matu-matu.
6 Bang sealem kareb nateh Herodés sikal nguit ni Pétrus pa kiung lun mula', idi Pétrus rudap arang uned dueh burur lun pebunu'. Idi ieh inabet ku kaling. Idi teh inan tuda'-tuda' lemulun luk munung tanga' matar ruma' tutup ineh.
7 Denak-denak aceh melaikat Tuhan netuped déi', idi aceh acang merasat bang takep ineh. Idi melaikat ineh nengegio tudung Pétrus idi nengalat neneh, kebalaneh, "Tumui iko dengan mesaget." Idi kaling ineh pana' netaka ratnan ticu'neh.
8 Idi kebala melaikat ineh teh, "Do' iko ngabet awe'mu, idi muet kasutmu." Idi Pétrus nenganau' kudeng ineh. Idi kebala melaikat neneh, "Do' iko ngayung ku kuyuh'mu idi maya' negku."
9 Pétrus nemaya' neneh remuat rat bang tutup, iamo' na ieh kali' luk inau' melaikat ineh matu; ngaceku bang terawéneh ieh ineh aceh luk sinierneh mo'.
10 Kareb ieh pangeh nelemaba lun matar luk pun-pun, idi luk kedueh, idi didueh nacing inan aceh tanga' belawan luk amé' inan bawang. Tanga' ineh mukab sebuleng kuan didueh, idi didueh neremuat idi nelemaba aceh dalan. Idi petacu melaikat ineh meburo rat ni Pétrus.
11 Idi Pétrus nekali' ratnan luk nangun kuanneh, idi keburi'neh, "Nekini ui kali' dengan matu idi Tuhan pangeh nengecuk melaikatNeh muit negku rat bang palad Herodés idi ratnan pian luk Yahudi ineh."
12 Kareb ieh pangeh nengerawé ratnan ini idi ieh iné' ruma' Mariam luk tinan Yahya, luk titen Markus. Inan tuda'-tuda' lemulun déi' luk pangeh netebubpun idi uned sembayang.
13 Kareb ieh nenateg tanga' ar ineh, idi seburur decur iné' ngukab tanga', ngadanneh Rodé.
14 Idi ieh miti uni tang Pétrus idi na ieh nengukab tanga' ineh ngaceku pelaba awang niatneh. Ieh nupun idi nesemuet bang ruma' idi nemada' ratnan Pétrus tuped déi' munung tanga' ar ineh.
15 Idi keburi'deh neneh, "Iko meruden." Iamo' decur ineh mesaad mala bala luk bilaneh ineh. Idi keburi'deh, "Ada'neh ineh!"
16 Iamo' Pétrus na ugka' nateh tanga' ineh. Idi kareb ideh nengukab tanga', idi ideh nenier neneh idi mawa peh.
17 Idi Pétrus nemebpeng nedeh dengan ticu'neh ngecuk nedeh pirud, idi ieh nemada' nedeh kudeng apeh Tuhan pangeh nenguit neneh remuat rat bang tutup ineh, idi keburi'neh, "Mada' bala ineh kuan Yakub idi kinanak-kinanak teh." Pangeh ineh idi ieh nenalan.
18 Kareb macang aco, idi lun pebunu' mula' ria'. Anunké luk nangun kuan Pétrus.
19 Herodés nengecuk nakap neneh iamo' na Pétrus nekali'deh. Idi Herodés nengelio lun pebunu' ineh, idi nengecuk ngaté nedeh. Idi Herodes nenalan rat Yudia iné' déi' Kaisaria, idi ieh netudo déi'.
20 Herodés pelaba useh nelun Sur idi Sidon. Ngaceku ineh ideh iné' matun neneh. Idi kareb ideh pangeh nengubuk ni Belastus luk lun rayeh bang ruma' raca' ineh, idi ideh nemutuh do' ni Herodés, ngaceku bawangdeh merapet ngalap luk kenen rat bang bawang raca' ineh.
21 Idi kareb seaco, Herodés nengayung ku ayung imetneh, idi netudo luun kerusi besara'neh idi nemada' nelun mula'.
22 Idi lun mula' ineh nengitang, keburi'deh, "Baken ini bala lemulun, iamo' ini aceh bala allah."
23 Idi petacu aceh melaikat Tuhan nenecat neneh, ngaceku na ieh nengerayeh Allah. Idi ieh kinan uled idi petacu niatneh neputut.
24 Idi bala Allah ineh nepiar.
25 Barnabas idi Saul nelemubed rat Yerusalim, kareb didueh pangeh nenganau' kekamen didueh, idi nenguit ni Yahya luk titen Markus maya' nedidueh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA