Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Wali yako etu re’e tau to mampakarebaka resi tau ri propinsi Yudea manganto’oka sira mangkonong tau to si’a Yahudi etu sira mangaya seja tuntu i mPue Allah. Wali pomakau i mPue Yesu pasi samparia pua’i to samba’a pangayanya to re’e ri propinsi Yudea, sira mangandonge seja kareba etu.
2 Wali yako etu i Petrus pasi yununya to ono mba’a to mangalulu ia yako ri kota Yope seore, sira yau wo’u ndeku Yerusalem yako la’u kota Kaisarea. Pei ojo karata nsira ri Yerusalem, i Petrus naposayar nto Yahudi to mangaya i Yesu.
3 Sira manganto’o, “Gete, maka pei korom masua ri raya banua ntau to si’a to Yahudi, tau to taa rasui, pasi mangkoni sindarandara pei sira? Taa matao korom mangewa ada ngkita ewa wetu!”
4 Wali i Petrus mangansaritaka sira, mampakanasaka kojo sira mangkonong samparia anu to nawali yako ri pamulanya seore, ia manganto’o,
5 “Re’e seore aku tongo mpakai-kaingku nja’u kota Yope. Tempo etu aku re’e pangkitangku, wali aku mangkita anu to ewa kain to bae katawaanya to raloe ponto sunonya opo. Anu etu ratudumaka yako ri yangi tudu ri tangongku.
6 Wali aku mangalo’aka kojo banang nu ngkain etu pei mangkita mpangaya-ngaya binatang to opo witinya, binatang to maila, binatang to mandonggo, pasi tonsi seja kukita. Binatang etu re’e to rapomalika ane ewa ada ngkita to Yahudi.
7 Panewa yako etu aku mangandonge loo manganto’oka aku, ‘Petrus, pambangu! Simbale binatang etu pei koni.’
8 “Pei aku mangansono, to’ongku, ‘O Pue, taa! Aku tawa re’e pasi sangkani mangkoni anu to rapomalika pasi to makarika.’
9 “Wali yako etu aku mangandonge wo’u loo etu magombo kadua ngkaninya yako ndate saruga, loo etu manganto’o, ‘Kesaa to nato’o i mPue Allah matao rakoni, ne’e korom manganto’o rapomalika.’
10 Wali palaong etu togo ngkani nawali, pei ojo kagananya togo ngkani mawali, kain etu tiokotaka muni nto’u yangi.
11 “Ojo katiokotakanya etu, ratamo togo mba’a tau ri banua to kanja’ungku. Tau togo etu rata resi aku napokau ntau ri kota Kaisarea.
12 Wali i Nosa Mapasing manganto’oka aku, ‘Ne’e bata-bata rayamu mangalulu sira.’ Wali aku yau mangalulu sira pasi yunu ngkita to ono si’i sira seja mangalulu aku njo’u Kaisarea. Wali rata nja’u Kaisarea, kami masua ri raya banua ntau to nampokau tau ma’i resi aku etu.
13 Roo see tau etu mangansaritaka kami mangkonong tempo ia mangkita samba’a pomakau i mPue Allah makore ri raya banuanya. Pomakau etu pei manganto’oka ia, ‘Pakau tau njo’u kota Yope damangkeni mai i Simon to rato’oka wo’u i Petrus.
14 Ia damampakarebaka korom kareba to damampalaes korom pasi samparia tau to maroo ri raya banuamu.’ Etu semo to nato’oka mpomakau i mPue Allah tau etu.
15 “Wali yako etu aku mamula mampogomboka sira, pei ojo pagombongku etu, tudumo i Nosa Mapasing resi sira, sewaju ewa kita mangarata Ia ri tempo uyunya seore.
16 Wali aku mangangendo muni gombo i mPue Yesu seore manganto’o, ‘Yohanes to Pombaptis mangabaptisika tau ue, pei i Pue Allah damangabaptisika komi i Nosa Mapasing, batuanginya Ia damampaporoo i Nosa Mapasing ri raya ngkomi.”
17 Wali manasa kojo i Pue Allah taa mampasisala tau. Ia re’e mangansora sira sewaju ewa nikaNya mangansora kita seore tempo kita mangaya i Pue Yesu Kerisitu. Wali ane ewa see, aku taa maya mangewa i Pue Allah.” Etu semo gombo i mPetrus mangansaritaka sira mangkonong palaong to nawali resi ia etu.
18 Wali ojo pangandonge nto Yahudi gombo i mPetrus etu, sira tamo mangewa ia. Sira paka mangabarong i Pue Allah, sira manganto’o, “Ane ewa see, tau to si’a to Yahudi sira nawaika seja i mPue Allah temponya mangandolika tangonya see sira damangarata seja katuwu to singkasaenya.” Etu semo to nato’o nsira.
19 Wali ri tempo i Stepanus napopate yau ntau seore, tempo etu tau to mangaya i Yesu ri kota Yerusalem sira mangarata seja kasesa, see naka boros sira to tiga’as. Tau mangaya etu miyai njo’u tana Penisia sangga’a, njo’u pulo Siprus sangga’a, pasi sangga’a njo’u kota Antiokhia. Wali imba nakanjo’u nsira etu, sira mampakarebaka tau kareba matao, pei ojo to Yahudi semo to sira mampakarebaka etu.
20 Pei ri oyo nsira re’e sawei mba’a tau to yako pulo Siprus pasi kota Kirene. Tau etu rata nja’u Antiokhia panewa nja’u ria sira mampakarebaka seja tau to si’a to Yahudi kareba matao, sira manganto’o, “I Yesu Ia semo i Pue.” Etu semo to nato’o nsira.
21 Wali kuasa i mPue re’e resi tau to mampakarebaka kareba matao etu, wali boros kojo tau to mangaya pasi mangandolika tangonya resi i Pue.
22 Wali kareba mangkonong palaong to mawali ri kota Antiokhia etu natikarebamo resi tau to mangaya i Yesu to siromu nda’a Yerusalem. Wali sira mampokau i Barnabas yau ri Antiokhia.
23 Ojo karata i Barnabas nja’u Antiokhia, ia masanang kojo mangkita kanoto i mPue Allah resi tau etu. Ia mampakaroso raya nsira pasi manganto’oka sira, “Nempo kesaa to mawali resi komi, ne’e rapandooka yau mangaluluka i Pue.”
24 I Barnabas etu, ia tau to matao pasi bae kojo karoso ndaya to nawaika i Nosa Mapasing ia. Pasi ia maroso pangayanya resi i Pue. Wali boros wo’u tau to nja’u ria mangalulu i Pue.
25 Wali yako etu i Barnabas yau wo’u njo’u kota Tarsus yau mangaliwu i Saulus.
26 Ojo pangaratanya i Saulus etu, ia mangansale yau njo’u Antiokhia. Wali sira dua yau panewa rata nja’u Antiokhia etu. Yako etu santo’u kasaenya sira dua maroo-roo nja’u ria. Ri rayanya santo’u etu sira sangkani siromu sindara-ndara pei tau to mangaya i Yesu pasi boros tau to sira dua mampotundeka. Wali nja’u Antiokhia semo anaguru i mPue Yesu uyunya rato’oka tau Kristen.
27 Wali ri tempo etu seja re’e bara sawei mba’a to pantuntu tuntu i mPue Allah yako nda’a Yerusalem rata ri Antiokhia.
28 Samba’a sira sanganya i Agabus. I Agabus etu makore panewa yako kuasa i Nosa Mapasing ia manganto’o yami mangkonong oro to mapari kojo to damawali ri sambawo lino. (Palaong etu nawali tempo i Klaudius mawali makole ri tana Roma.)
29 Wali ojo pangandonge nu anaguru i mPue Yesu kareba etu sira mangansongka damangansawang pua’inya to samba’a pangaya to maroo ri propinsi Yudea. Wali sira mangawaika doi samba’a pei samba’a imba pata mparata nsira.
30 Panewa ojo pampasiromunaka nsira doi etu, sira mansarumakaka i Barnabas sira dua i Saulus mangangkenika ketua-ketua ntau to mangaya i Yesu nja’u Yudea doi to sira mamporomung etu. Wali tau dua etu yau.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA