Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Rasul-rasul sarato jo urang-urang nan ba iman, disadonyo daerah Yudea lah mandanga, baraso urang-urang nan indak ba agamo Yahudi pun lah mayakini firman Allah.

² Kudian, kutiko si Petrus payi ka Yerusalem, urang-urang Yahudi nan lah ba iman tu, inyo bi mampasalahkan si Petrus.

³ Inyo bi mangatokan, "Baa mangko angkau payi ka rumah urang-urang nan alun basunaikkan tu? Kami danga angkau makan bagai samo-samo jo inyo!"

⁴ Dek karano itu, mako ditarangkanlah kasadonyo dek si Petrus kabake urang-urang tu, apo nan lah tajadi sajak dari mulo-mulo. Si Petrus mangatokan,

⁵ "Ambo sadang badowa di kota Yope, mako tibolah kabake ambo suatu pangliyatan. Ambo manampak sasuatu, bakcando sahalai kain nan laweh diturunkan dari langik, ka ampek-ampek suduiknyo bakcando bagantuangkan nampaknyo, kudian kain laweh tu baranti di dakek ambo.

⁶ Kutiko ambo maliyek, mamparatikan ka dalam kain laweh tu, ambo manampak binatang-binatang nan bakaki ampek, binatang-binatang liya, binatang-binatang nan manjala, sarato jo buruang-buruang liya.

⁷ Sudah tu, tadangalah di ambo suwaro nan bakato kabake ambo, 'Oih Petrus, capeklah tagak! Dabiahlah binatang tu, makanlah!'

⁸ Tapi ambo manjawab, 'Indak doh Tuhan! Alun ado lai ambo makan makanan nan haram, sarato jo makanan nan banajih.'

⁹ Tapi suwaro tu bakato sakali lai dari langik, 'Barang sasuatu nan lah dinyatokan ala dek Allah, janlah dikatokan haram.'

¹⁰ Ambo manampak nan bakcando itu sampai tigo kali, akienyo, kasadonyo ta angkek baliak ka sarugo.

¹¹ Tapek dikutiko itu pulo, katigo urang nan di utuih dari Kaisarea tibo kabake ambo, di rumah tampaik ambo bamalam.

¹² Mako Roh Allah manyuruah ambo, jan ragu-ragu payi jo urang-urang tu. Sudaro kito nan baranam ko pun payi pulo jo ambo ka Kaisarea, kasadonyo kami masuak ka rumah Kornelius.

¹³ Kudian Kornelius mancuritokan pulo kabake kami, baa kok sampai inyo manampak surang malekaik, tagak di rumahnyo sambia bakato, 'Suruahlah urang payi ka Yope, untuak manjapuik surang laki-laki nan banamo si Simon Petrus.

¹⁴ Inyo ka mancuritokan kabake angkau, barito nan ka manyalamaikkan angkau jo kaluarga angkau.'

¹⁵ Dikutiko ambo muloi mangecek," bakcando itulah si Petrus manaruihkan curitonyo, "Roh Allah turun kabake urang-urang tu, bakcando nan tajadi di kito dulu.

¹⁶ Mako takanalah di ambo, Tuhan panah mangatokan, 'Nabi Yahya mampamandikan urang jo ayie, tapi angku-angku ka dipamandikan jo Roh Allah.'

¹⁷ Jadi, kiniko lah jaleh dek kito, baraso Allah mambarikan pulo kabake urang-urang nan indak ba agamo Yahudi tu, pambarian nan samo, sarupo jo nan Baliau barikan kabake kito diwakatu kito picayo kapado TUHAN Isa Almasih. Dek karano itu, dima pulo ka mungkin ambo managah Allah!"

¹⁸ Sasudah mandangakan curito tu, mako urang-urang tu indak bi manyolang lai. Malah inyo bi mamuji Allah. Inyo bi mangatokan, "Jikok baitu, urang nan indak urang Yahudi pun, dibari pulo kasampatan dek Allah untuak batobaik dari doso-dosonyo, buliah pulo marasokan iduik nan sajati!"

¹⁹ Sasudah Stefanus dibunuah, mako urang-urang nan ba iman kabake Isa Almasih muloi dikaja-kaja, sainggo urang-urang tu bi baserak-serak kian kumari. Ado nan lari sampai ka Fenisia, ado pulo nan sampai ka Siprus jo ka Antiokhia. Urang-urang tu mambaritokan Injil hanyo kabake urang-urang Yahudi sajo.

²⁰ Tapi di antaro urang-urang nan ba iman tu, ado nan barasa dari Siprus jo Kirene, ado pulo urang-urang nan payi ka Antiokhia, kabake urang-urang nan indak ba agamo Yahudi, untuak mambaritokan Injil tantang Isa Almasih.

²¹ Kuwaso Tuhan manyaratoi urang-urang tu, sainggo sambuah urang nan bi picayo, sarato manyarahkan diri kabake Tuhan.

²² Sagalo curito tantang kajadian-kajadian ko, sampai pulo kabake jamaat di Yerusalem. Mako inyo utuihlah si Barnabas ka Antiokhia.

²³ Kutiko si Barnabas tibo disinan, lah nyo caliak sandiri, Allah iyo sabana mambarakaik-i urang-urang tu, gadang bana atinyo. Inyo mintak kabake urang-urang tu, supayo sabana-bana satiya kapado Tuhan sapanuah ati.

²⁴ Si Barnabas ko adolah urang nan elok ati, inyo nan sapanuahnyo dikuwasoi dek Roh Allah, imannyo kapado Tuhan indak talok di ungkik, malalui palayanannyo sambuah urang nan manjadi pangikuik Tuhan.

²⁵ Kudian payilah si Barnabas ka Tarsus untuak manamui si Saulus.

²⁶ Baru lah batamu jo si Saulus, mako inyo bawoklah si Saulus ka Antiokhia, satawun panuah inyo sapayi jo jamaat nan disinan, sambuah pulo urang nan di ajanyo. Di Antiokhia tu lah, nan partamu-tamu bana urang-urang nan ba iman kabake Isa Almasih tu, dinamokan urang-urang Kristen.

²⁷ Pado maso itu ado babarapo urang nabi, datang dari Yerusalem ka Antiokhia.

²⁸ Salah surang di antaronyo banamo Agabus. Dek karano garakkan dari Roh Allah, mako inyo banubuat, baraso di muko bumi ko ka tajadi musin lapa nan sangaik padiah. (Nubuat tu iyo sabana-bana tajadi dikutiko Kaisar Klaudius mamarentah.)

²⁹ Mako samupakaiklah kasadonyo pangikuik Isa Almasih, untuak mangirin sumbangan kabake sudaro-sudaro nan tingga di Yudea; satiyok-tiyok inyo mangirin sabarapo nan talok dek inyo.

³⁰ Nan lah disupakaik-i tu tatap juwo di antakan, mako di utuihlah si Barnabas jo si Saulus, untuak ma antakan sumbangan tu kabake pamimpin-pamimpin jamaat.

Kisah Para Rasul

Video Kisah Para Rasul 11

Ikuti Kami:

KONTAK | PARTISIPASI | DONASI