Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Suro-suro i Pue Yesus bo topomparasaya ri njumangu bagia Yudea nangepe tona ledo noagama Yahudi nomparasaya tesa nu Alatala munimo.

² Tempo i Petrus hau ri ngata Yerusalem, *toYahudi anu nomparasaya i Yesus nompakasala ia.

³ Niulira, "Nakuya komiu hau ri banua ntona ledo toYahudi? Bo nakuya komiu nangande mpasanggani-nggani nte ira? "

⁴ Nangepe tesa haitu, i Petrus notesa ka ira pura-pura anu najadi lako ri pantepuuna. Niulina,

⁵ "Tempo yaku nosambaya ri ngata Yope, naria anu nipopakita ka yaku. Nikitaku eva sabala kae tarapaa nabini niuluraka lako ri langi niloe ri sokina pata-njoki bo nituu ri ngayoku.

⁶ Riara nu kae tarapaa haitu nikitaku mpengaya-ngaya binata nokada pata-nggada, bo binata-binata navura, binata-binata nenjoyo, bo tonji-tonji navura.

⁷ Niepeku suara nanguli ka yaku, 'Anumo, peanggamo, Petrus! Sambalemo binata tutu bo kandemo!'

⁸ Tapi nesana yaku, 'Ledaku, Pue. Dopa sanggani nikandeku anu nipopali bo naruto mpo binata moitu!'

⁹ Tapi naria vaimo suara haitu lako ri langi, 'Anu niuliKu nabelo rakande, nee muuli nipopali!'

¹⁰ Talu-nggani nikitaku anu haitu, pade neore mpanjili kae tarapaa haitu hau ri langi.

¹¹ Eva nisuka tempo haitu muni, tatalu tona lako ri ngata Kaisarea nakava ri banua ponturoku. Ira nitudu i Kornelius hau mangala yaku.

¹² Bo Nosa Gasa nu Alatala nantudu yaku hau nosanggani-nggani ante ira bo nee makaja raraku. Jadi haumo yaku. Aono sampesuvu sampomparasaya lako ri ngata Yope nantuntuni yaku hau ri ngata Kaisarea, bo kami pura-pura nesua rabanua i Kornelius.

¹³ Naupu haitu i Kornelius notesa ka kami nikitana *malaeka neangga riara banuana bo nanguli, 'Tudumo tona hau ri ngata Yope mangala langgai nosanga i Simon Petrus.

¹⁴ Raulina ka iko berimba komiu sambanua mamala rapakasalama.'"

¹⁵ I Petrus nompapola tesana, "Tempo yaku da notesa ka ira, nanaumo Nosa Gasa nte ira nasimbayu mpo panauNa ante kita ri pamulana.

¹⁶ Pade nitoraku tesa i Pue Yesus bara ipia ivei: 'I Yohanes nombadiu tona ante uve, tapi komiu radiu ante Nosa Gasa nu Alatala!'

¹⁷ Sampesuvu-sampesuvuku, nalantomo Alatala nombadekei Nosa GasaNa ka tona ledo noagama Yahudi nasimbayu mpo nidekeiNa ka kita tempo kita nomparasaya i Pue Yesus Kristus. Jadi isema yaku sampe mamala kutagi Alatala ane Ia mboto madota mombadekei Nosa Gasa ka tona ledo noagama Yahudi?"

¹⁸ Tempo tona nasiromu ri sia nangepe tesa i Petrus, domo ira nebali. Ira nosanggani-ngganimo nantoiya Alatala. Niulira, "Ane ivesia tano, todea ledo toYahudi muni nipaloga nu Alatala majea lako ri dosa-dosara bo mantarima katuvua nabelo sampe ri kasae-saena!"

¹⁹ Namatepa i Stefanus nirempe vatu, nadeamo topomparasaya i Yesus nipandasa sampe nadea nalai nosimpogaa-gaa hau ri umba-umba ngata. Naria sanu nalai sampe ri propinsi Fenisia, bo naria muni nalai hau ri levuto Siprus bo ngata Antiokhia. Nipatolelera kareba lako nte Alatala ri ngata-ngata nikalaura, tapi aga ka toYahudi.

²⁰ Tapi naria muni roara lako ri levuto Siprus bo propinsi Kirene hau ri ngata Antiokhia bo nompatolele Kareba Belo i Yesus ka tona ledo noagama Yahudi.

²¹ Kuasa nTupu naria nte ira sampe nadea toAntiokhia nomparasaya bo nombadekei katuvura ka i Pue Yesus.

²² Todea topomparasaya ri ngata Yerusalem nangepe kajadia haitu muni. Jadi nitudura i Barnabas hau ri ngata Antiokhia.

²³ Nakavapa i Barnabas ri Antiokhia, nadamba mpuu rarana nanggita kabelo nu Alatala nte ira. Jadi nipakarosona rarara ala ira bate-batena mangoseaka i Pue Yesus ante mpuu-mpuu rarara.

²⁴ I Barnabas haitu tona nabelo rarana, bo nikeniaka nu Nosa Gasa nu Alatala. Naroso mpuu pomparasayana. Bo nadea tona ri Antiokhia nikenina nomparasaya i Pue Yesus.

²⁵ Naupu haitu i Barnabas hau ri ngata Tarsus mangelo i Saulus.

²⁶ Nosinggavapa ia ante i Saulus, haumo ira randua ri ngata Antiokhia. I Barnabas bo i Saulus nonturo sumai sampae kasaena. Ira nasaro nasiromu nosanggani-nggani nte todea topomparasaya bo nadea mpuu tona nipatudukira. Ri ngata Antiokhia haitumo topangoseaka i Yesus pamula-mulana niuli ntona toKristen.

²⁷ Ri tempo haitu muni naria bara sako-ndua topomparasaya lako ri Yerusalem hau ri ngata Antiokhia. Topomparasaya haitu *nabi apa naria pompakule nidekei nu Alatala ka ira mombasovadaka tesaNa.

²⁸ Saito ira nosanga i Agabus. Ia neangga ri tatangara bo ante pekeniaka Nosa Gasa nu Alatala, niulina kana majadi ara mpai ri njumangu dunia. (Ara mpai haitu mpuu-mpuu najadi tempo i Klaudius najadi Magau Mbaso).

²⁹ Nangepe haitu, pura-pura topangoseaka i Yesus ri Antiokhia, nasintuvu mompakatu petulungi ka sampesuvura sampomparasaya anu nonturo ri bagia Yudea. Ira nombadekei nantuntuni pompakulera saito-saito.

³⁰ Sintuvura haitu nipoviara mpuumo, bo nitudura i Barnabas bo i Saulus manggeni pedekeira haitu ka pakeni-pakeni ntopangoseaka i Yesus ri ngata Yerusalem.

Kisah Para Rasul

Video Kisah Para Rasul 11

Ikuti Kami:

KONTAK | PARTISIPASI | DONASI