Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Nasa'ding rasulu' sola tomatappa' jio tana Yudea kumua ia to bangsa tangngia to-Yahudi ntarima toomo kadan-Na Puang Allataala.

² Ia tonna ratumo Petrus de' kota Yerusalem, den ba'tu pira-pira to-Yahudi ncoccoi. Ia joo to-Yahudi matappa' lako Puang Isa, apa madoangngi kumua moi to bangsa tangngia to-Yahudi la disunna'.

³ Nakuanni to Petrus, "Ammumalera lako bola to totangdisunna'? Ammukumande sola?"

⁴ Iamo joo napamanassan ngasanni Petrus lako, apa to mangka jaji jio mai pamulanna nakua,

⁵ "Ia tongkumassambajang jio kota Yope, den pengkita kukita. Den mesa' apa kukita susi kaen masangka dikapu' a'pa' to tetukkuna didokken jao mai langi' ratu jio oloku'.

⁶ Ia tongkukitai la mpemajappuii, oh, na lan ngasan ia to olok-olok sia'pa' ajena, olok-olok lampung, olok-olok lumeme' na manuk-manuk.

⁷ Na den gamara kusa'ding ngkuanna', 'Ee Petrus, ke'dehko! Gere'i tuu, mukasaraii, mukandei!'

⁸ Apa kupebalii kukua, 'Ie', masussa kita' Puang! Sanga te'da lalopa nabulewanni anga'ku' to apa diharangan ba'tu dipemalian.'

⁹ Apa kusa'ding pole' joo gamara jao mai langi' ngkuanna', 'Apa to nahallalasan Puang Allataala, danggi' muharanganni.'

¹⁰ Pentallun jaji susi joo, namane' diangka' pole' de' langi'.

¹¹ Na ia toomo joo wattu, ia to tau tallu disua jio mai kota Kaisarea mpessitammuina', ratu jio bola to kunii torro.

¹² Nakuanna' Roh Allataala, 'Danggi' mubata male sola tuu mati' tau.' Malemokan sola, na denpa tee annan sile'to jio mai kota Yope, kisolan male lako kota Kaisarea, angkimentama bolana Kornelius.

¹³ Nacuritankan matumbai tonna ngkita mesa' malaeka' ke'deh lan bolana ngkuanni, 'Suai to tau namale lako kota Yope ntambai Simon to disanga too Petrus.

¹⁴ La napauanko kareba to la mpasalama'ko sintong repokkomu.'"

¹⁵ Mpatarruhhi Petrus kadanna nakua, "Ia tongkupamulai mangkada susi joo, ta'pa nakuasaimi Roh Allataala, susi to jaji lako kita' tonna pamulanna.

¹⁶ Kuingaran tooi kumua den nakua Puang Isa, 'Ianna Nabi Yahya mangjio' wai, apa ianna kamu' la dijio' kamu' Roh Allataala.'

¹⁷ Jaji manassa naben too Puang Allataala Roh Allataala to bangsa tangngia to-Yahudi, susi to nabenki' tontamatappa' lako Puang Isa Almaseh. Iamo joo naumbo la kukua hhalangngii to Puang?"

¹⁸ Mangkanna nasa'ding joo, napahangmi. Mpakala'bihmira Puang Allataala nakua, "Ianna susi joo, moi pale' bangsa tangngia to-Yahudi natarima toomi Puang Allataala, ke mengkatoba'i jio mai dosana, anna benni katuoan melo te'da cappa'na."

¹⁹ Ia tonna mangkamo Stefanus dibuno, mangpamulami to tomatappa' lako Puang Isa dipakario-rio, arannai male sisarak-sarak. Den male lako tana Fenisia, lako pulau Siprus na den too to male lako kota Antiokhia. Umbo-umbo nanii tuli mpangpeissenan Kareba Kasalamatan, apa lako manda to-Yahudi.

²⁰ Apa den ba'tu pira-pira to tomatappa' pole jio mai pulau Siprus na kota Kirene ratu lako kota Antiokhia, na mpangpeissenan too Kareba Kasalamatan lako to-Yunani kumua Puangngi to Isa.

²¹ Nabuda tau memmatappa', napangben kalena lako Puang, nasaba' natulungngi kuasan-Na Puang.

²² Ia tonna sa'dingmi jamaa jio kota Yerusalem kumua buda tau matappa', nasuami to Barnabas male lako kota Antiokhia.

²³ Na ia tonna ratumo lako, gaja sannangngi ngkitai, sanga nabarakka'i Puang Allataala to tau jio. Namangngajahhi nakua anna tatta' nturu' Puang.

²⁴ Ia joo Barnabas to melo penawa, nakuasai Roh Allataala, namatappa' tongan too, iamo nabuda tau memmatappa' lako Puang.

²⁵ Mangkai joo malemi Barnabas ntiro Saulus jio kota Tarsus.

²⁶ Ia tonna sitammumo, nasolanmi lako kota Antiokhia. Sangtaunni torro jio sola jamaa na nnajahhi buda tau. Jiomo dinii pamula ssangaii Tosarani to tomatappa' lako Puang Isa.

²⁷ Ia joo wattu den ba'tu pira-pira nabi ratu jao mai kota Yerusalem lako kota Antiokhia.

²⁸ Denni mesa' disanga Agabus nakuasai Roh Allataala anna mangkada nakua, "La jaji to pealloan la'da' lan lili'na lino." (Najaji tongan unamo joo, tonna Tomaraja Roma disanga Klaudius mangparenta.)

²⁹ Mesa' kada ngasanni to tomatappa' lako Puang Isa napada rrempun pangtulunganna situru' pakullena, napangpeawanni to tomatappa' jio tana Yudea.

³⁰ Mangkanna dirempun joo doi', disuai to Barnabas sola Saulus male mbawai lako pekaamberan jamaa jao kota Yerusalem.

Kisah Para Rasul

Video Kisah Para Rasul 11

Ikuti Kami:

KONTAK | PARTISIPASI | DONASI