Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Hapu touk esa nai Kaisarea na'de Kornalius. Touk ia Kaptein nai "Soldadu Italia".
2 Touk ia no basa uma isi nala fe ha'da holomata neu Manetualain. La'iba'u ka ana tulu fali hataholi Yahudi nuu ta-hata ta kala, ma ana hule-haladoi neu Manetualain tataas esa.
3 Faik esa boema, fafa'kama la'e li'u telu lele'do na, boema nita no mangale'dok nai ninitak esa dalek, Manetualain ata nusa so'dan esa mai de nalon nae, "Kornalius!"
4 Kornalius mete ata nusa so'dak ndia no bibiik, boema nae, "Bee ka Tuan?" Boema ata nusa so'dak ndia nae, "O huhule-haladoim ma o dale malole ma, Manetualain sipo kana so, ma nafandele o.
5 Besak ia, madenu hataholi neu nalo Simon, fo na'de matetu na na'de Simon Petrus nai Yope.
6 Ana bei leo lalai nai hataholi mana tao balisi bana louk esa uman, na'de Simon, fo ana leo nai tasi su'u na."
7 Ata nusa so'dak fo mana kokolak no Kornalius ndia ana la'o boema,nalo na malalau-maoonon dua, ma solda'du mana manea kamahehelen esa,
8 de ana tuis manda'dik ndia, boema nadenus leu leo Yope leu.
9 Balahaa te bei lai eno tala'dak, fo ala sanga lae losa Yope nde ndia so. Boema Petrus kae leo uma lai neu fo ana hule-haladoi.
10 Boema namala'a nanseli de ana hii na'a ninu. Tehu ala bei sadia nana'a ninuk fa te nita ninitak esa.
11 Nita lalai natahuka, boema nita hata esa sama leo tema maloa esa, belona nai bu'un has nanalonak leo daebafa ka mai.
12 Nai tema maloa ndia dalek, hapu basa bana ei ha mata-mata kala, basa bana mana lo'do lae kala, ma basa manupui fui kala.
13 Boema halak esa nafa'dan nae, "Petrus, fo'a leona! Do'do bana sila la fo mu'a!"
14 Tehu Petrus nae, "Ta Lamatuak! Au beita u'a ita hata nanakena ka'ik ma manggenggeok fa."
15 Tehu halak ndia nafa'da selu kana nae, "Hata fo Manetualain nafa'da basa nae, ta nanakenaka'ik fa soona, o boso mafa'da mae nanakenaka'ik."
16 Ninitak ndia ana da'di losa la'i telu, de basa boema temak ndia nanaso'u falik leo nusa so'da ka neu.
17 Petrus napangamak no dudu'a-dodoo ninitak ndia sosoa-ndandaan. Ana bei dudu'a-dodoo te Kornalius nadenu hataholi la losa Simon uman de lapadeik lai lelesu a bafa na so.
18 Boema lalo de latane lae, "Ade hapu fui esa na'de Simon Petrus, ana leo nai ia do ta?"
19 Ndia te Petrus bei sanga enok nakandoo, fo ana sanga bubuluk ninitak ndia sosoa-ndandaan, te Manetualain Dula Dale na nafa'dan nae, "Hei Petrus, hataholi telu sanga o.
20 Ayo kona lai-lai leo dae mu fo o dale ma boso naba'e, fo tunga hataholi sila la, nana Au nde adenu hataholi sila la."
21 Boema Petrus kona leo dae neu de nafa'da hataholi sila nae, "Tolanoo kala sanga hataholi a, nde au so. Tolanoo kala mai tao beek?"
22 Boema lae, "Kaptein Kornaliu sa nde nadenu ami mai leo ia mai a. Hataholi ndia dale na malole, ma ana fe ha'da-holomata neu Manetualain, boema basa hataholi Yahudi la fe ha'da-holomata neun. Manetualain ata nusa so'dan esa nadenun fo noke Tuan neu leo uman neu, fo ana da'di neu natataak esa soaneu huhule-haladoin, ma ata nusa so'dak ndia nadenun fo namanene hata fo Tuan sanga nafa'da neun."
23 Boema Petrus nokes leo uma dale leu fo ala sungu lon le'odaek ndia. Balahaa de Petrus fo'a boema ala la'o leona. Hataholi kamahehelek de'ubee lai Yope boeo, ala tunga boe.
24 Ala la'ok faik esa boema, ala losa Kaisarea. Ala losa naa te Kornalius no tolanoo ka'a fa'din, ma tia-lai nanaka'i kala lahani so.
25 Petrus losa boema, Kornalius neu solu kana de ana senek neu mata na.
26 Tehu Petrus hela nafofo'an de nafa'dan nae, "Fo'a! Te au hataholi daebafak boe."
27 Petrus kola-kola no Kornalius ma ana la'ok nakandoo leo uma dale neu. Neu te nita hataholi makadotok lakabubua lai ndia so.
28 Boema Petrus nafa'das nae, "Tolanoo kala bubuluk basa, hataholi Yahudi la agama na, ana ta nau hataholi Yahudi la leu donge-dama do lakabubua lo hataholi leoina fe'ek fa. Tehu Manetualain natu'du basa au nae, au ta bole afa'da hataholi esa boen ae manggenggeok do mangalauk fa.
29 Hu ndia de, lelek fo Tuan noke au mai leo ia mai, boema au ta akalele'ok mamaik fa. Da'di besak ia au nau bubuluk, tao le'e de Tuan noke au mai leo ia mai."
30 Boema Kornalius nae, "Faik telu maneu ka, fafa'ka ma le'do a ba'u leo ia, boema au hule-haladoi nai uma la'e li'u telu le'donoso na. Boema no kaiboboianak, touk esa napadeik nai au mata nga. Bualo'a papake na, nandela-nasa'a.
31 Touk ndia nafa'da au nae, 'Kornalius! Manetualain namanene o huhule-haladoim so, ma nafandendelek o dale malole ma.
32 Da'di, madenu hataholi neu leo Yope neu, fo nalo hataholi esa nai ndia na'de Simon Petrus. Ana bei leo lalai nai hataholi mana tao balisi bana louk esa uman, na'de Simon; uma na nai tasi su'u na.'
33 Hu ndia de no lai-laik, au adenu hataholi neu nalo Tuan. Tuan dale na malole hiik, de Tuan mai so. Besak ia, ami basa-basa mala makabubua nai ia, nai Manetualain matan, fo mamanene basa hata fo Manetualain nadenu Tuan nafa'dan neu ami."
34 Boema Petrus nae, "Besak ia, au ame'dan te'e-te'e, Manetualain tao basa hataholi lala'ena, matak esa.
35 Hataholi mana fe ha'da-holomata neu Manetualain, ma hataholi mana tao ndoo sa, Manetualain sipok hataholi ndia. Ta nafaduli hataholi ndia neme leoina bee ka mai fa.
36 Tolanoo kala bubuluk basa, halak fo Manetualain nanduku-nalosa kana neu leoina Israe la, isi na so. Halak ndia nde Hala Malole la'eneu mole-dame tunga Yesus Kristus, fo nde Lamatuak soaneu hataholi lala'ena.
37 Emi bubuluk hata fo ana da'di nai Yudea lala'ena, fo ana mulai neme Galilea, nai lelek fo Yohanis nafa'da salani hataholi la.
38 Emi bubuluk mae, Manetualain hele basa Yesus fo Hataholi Nazaret ndia, boema Ana fen Dula Dale na, ma koasa na. Emi bubuluk basa boe, Yesus ndia, neu leo mamanak lala'ena, fo Ana tao malole; Ana tao nahai basa hataholi fo Nitu koasa nalas, nana Manetualain no kana.
39 Ami ia nde mita matam basa hata fo Ana taon nai hataholi Yahudi la ma Hataholi Yerusale mala nusa na. Tehu nai naa, ala lona nggangen, ma ala taolisan.
40 Tehu neu fai katelu na boema Manetualain tao naso'da fali kana neme mamate sa mai, ma Manetualain natu'dun neu hataholi daebafa ka.
41 Ta natu'dun neu basa hataholi lala'ena fa, te ka'da neu ami fo Manetualain hele basa nakahulu kala soaneu ami da'di sakasii na. Ami mi'a-minu mon nai lelek fo naso'da falik neme mamate sa mai.
42 Boema nadenu ami tui-benga Hala Malole ndia neu hataholi la, ma ami fe sakasii mae, Ndia nde Manetualain so'un da'di Mana Maketu-Mala'di neu hataholi maso'da kala, ma hataholi mana mate basa kala.
43 Basa nabi la kokolak la'eneun. Lafa'da lae, basa hataholi fo lamahele neu Yesu sa, neukose sala-singon hapu do'o do ampon ninik Yesus koasa na."
44 Lelek fo Petrus bei kola-kola te, Manetualai Dula Dale na kona mai de ana koasa na basa hataholi mana mamanene tutui-bebengak sila la.
45 Hataholi Yope kamahehelek fo mana tunga Petrus ala, nde bee na hataholi Yahudi sila la. Basa-basas dodoo doa kana lita Manetualain fe Dula Dale na neu leoina fe'ek fo ta hataholi Yahudi la fa.
46 Nana lamanene hataholi sila la kokolak linik dede'a mata-mata kala, ma ala koa-kio Manetualain matua-mademan. Boema Petrus nae,
47 "So'ba mete su'dik hataholi ia la hapu Manetualain Dula Dale na, sama leo ita so. Da'di hapu hataholi napanggengges, fo boso salanis ninik oe do?"
48 Boema Petrus nadenu salani hataholi sila la ninik Yesus Kristus na'de na. Basa ndia boema lafa'da Petrus, fo ana leo nos faik de'ubee dale na.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA