Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Idi déi' bawang Kaisaria inan selemulun ngadanneh Kornilius, ieh ineh lun rayeh aceh babpat baweh Rum luk titen "Baweh Italia."
2 Ieh ineh selemulun luk sembayang idi luk manu inan Allah dengan amung uang tetek ruma'neh. Ieh megéi' maré kuan lun Yahudi luk masi'. Idi ieh megéi' sembayang inan Allah.
3 Bang seaco kareb nateh tangal musul aco, ieh nenier dengan megala' bang aceh luk sinierneh aceh melaikat Allah nacing neneh idi nepebala neneh, "O Kornilius!"
4 Idi ieh nenier melaikat ineh dengan matot, kebalaneh, "Anun idi, O Tuhan?" Idi kebala melaikat neneh, "Amung sembayangmu idi éi'mu pangeh kali' Allah mangun ku aceh terawé pa kiungNeh.
5 Nekini do' iko ngecuk lemulun amé' Yopa, idi nawar seburur lemulun ngadanneh Simun luk titen Pétrus.
6 Ieh tudo dengan aceh lemulun ngadanneh Simun, lun luk ngakem ratnan kubil pung, idi ruma'neh tangeb abpa' rayeh."
7 Kareb melaikat ineh pangeh nenalan, idi Kornilius nenawar dueh burur demulun luk ngakem bang ruma'neh ineh, idi seburur luk pebunu' luk megéi' sembayang rat arang lemulun luk ngasa' neneh.
8 Ieh nemada' amung bala ineh kuandeh idi nengecuk nedeh amé' Yopa.
9 Kenebpa, kareb lemulun ineh malé macing Yopa, idi Pétrus numak luun buduk ruma' idi nesembayang kareb muned aco.
10 Idi ieh melau idi sikal kuman, iamo' laba' ideh nganau' temina' ieh nenier aceh luk sinierneh.
11 Idi langit mukab, idi inan aceh luk kudeng tarub luk rayeh luk inimet anid lidungneh inurur macing luun tana'.
12 Bang ineh inan puar-puar pung, menipeh, idi suit.
13 Idi inan aceh tang luk pebala neneh, "O Pétrus, mudur iko, keretenmu idi kenenmu pung ineh!"
14 Iamo' Pétrus nepebala, "Ara' ui Tuhan, ngaceku ui nateh nekuman anun-anun luk dat idi melutak."
15 Iamo' tang ineh nepebala sekua' teh, "Luk pangeh biru' Allah aleg iko mala neneh dat."
16 Ini mangun teluh kua', idi pangeh ineh luk inurur ineh ininat amé' déi' langit.
17 Kareb uned Pétrus ngerawé ratnan ilung luk sinierneh ineh, idi lemulun luk icuk Kornilius tuped munung tanga'. Ideh pangeh nengitun ratnan iapeh ruma' Simun,
18 idi ideh nengitun, "Inanké lemulun tungé' luk ngadanneh Simun Pétrus?"
19 Laba' Pétrus ngerawé ratnan luk sinierneh ineh, idi Roh nepebala neneh, "Siruh, inan teluh burur lemulun nakap namu.
20 Do' iko mesaget temurun amé' maya' lemulun ineh; aleg iko matot, ngaceku Ui ini luk nengecuk nedeh."
21 Idi Pétrus netemurun iné' matun lemulun ineh, kebalaneh, "Ui ini luk tekapen muyuh. Anunké punneh muyuh macing tungé'?"
22 Idi keburi'deh, "Ngaceku Kornilius, seburur lun rayeh baweh nengecuk nekai amé'. Ieh ineh seburur lemulun luk matu luk sembayang inan Allah. Idi ieh buren amung lun Yahudi. Melaikat Allah nengecuk neneh neteng namu amé' ruma'neh ninger bala rat namu."
23 Idi Pétrus nenganak nedeh. Idi kenebpa ieh netumui idi nenalan maya' nedeh, idi tuda'-tuda' kinanakneh rat bawang Yopa nemaya' neneh teh.
24 Idi kesoriak ideh nacing bawang Kaisaria. Idi Kornilius nenganét nedeh, idi ieh pangeh nenawar amung uang tetek ruma'neh idi lun rurumneh netebubpun.
25 Kareb Pétrus nesemuet, idi Kornilius nepapu' neneh idi netekeradung iring kukudneh idi nesembayang neneh.
26 Iamo' Pétrus nenaped neneh, keburi'neh, "Tuped iko; ui ini pana' lemulun teh."
27 Kareb uned Pétrus pegayam neneh, idi ieh nesemuet idi nepapu' mula' lemulun luk pangeh netebubpun.
28 Idi kebalaneh nedeh, "Muyuh sebuleng kali' idi lun Yahudi ngelaba ukum kudeng ideh perurum dengan lun pupu baken, idi amé' ngikak pana' nateh miak; iamo' Allah pangeh nemada' negku pad ui na mala seburur lemulun dat idi melutak.
29 Ngaceku ineh ui macing dengan na ara' kareb ui tinawar. Ngaceku ineh ui ngitun, anunké punneh muyuh nenawar negku?"
30 Idi kebala Kornilius, "Teluh aco luk pangeh nepelaba, kareb tangal musul aco kudeng ini, ui nesembayang bang ruma'ku. Denak-denak selemulun netuped pa kiungku dengan ayung luk merasat,
31 idi kebalaneh, 'O Kornilius, sembayangmu pangeh ilap idi éi'mu pana' tirawé Allah.
32 Do' ngecuk lemulun amé' Yopa idi nawar Simun luk titen Pétrus. Ieh tudo bang ruma' Simun luk ngakem ratnan kubil pung, tangeb abpa' rayeh.'
33 Idi ui petacu nengecuk lemulun amé' nawar namu, idi mawang niat iko pangeh nacing. Ngaceku ineh nekini amung kai pangeh netebubpun tungé' pa kiung Allah, pad ninger amung bala luk bila Tuhan kuanmu."
34 Idi Pétrus nepebala, "Dengan matu ui nier, idi Allah na mili' ayu lemulun,
35 iamo' idé-idé luk matot Neneh idi ngakem luk matu, idi ieh luk petulu dengan pinianNeh.
36 Muyuh kali' bala luk icing Allah kuan lun pupu Israil, ieh ineh Bala luk Do' ratnan awang luk lemaba Yésus Keristus, ieh ineh luk Tuhan amung lemulun.
37 Idi teh muyuh kali' luk nangun aput bawang Yudia, ngimun rat Galilia, ieh ineh pangeh rereb luk bida' Yahya ineh.
38 Muyuh pangeh neninger ratnan Yésus lun Nasarét ineh, kudeng apeh Allah pangeh nengumau Neneh ku Roh Meligan idi lalud. Ieh nenalan iné' iapeh-iapeh idi nenganau' kekamen luk do', idi nengedo' amung-amung lemulun luk inimet Iblis; ngaceku Allah nengedengan Neneh.
39 Kai ini lun nekali' ratnan amung-amung luk inau'Neh ineh, do' déi' bawang Yahudi idi déi' Yerusalim teh. Ieh ineh teh luk pinaté idi sinalib.
40 Iamo' aco luk keteluh Allah nenui Neneh, idi Ieh nemaré Neneh nesilagan,
41 baken kuan amung lemulun, iamo' kuan kai luk pinili' Allah mangun ku lun nekali' Neneh. Kai ini pangeh nekuman idi nengirup denganNeh muci ratnan Ieh tinui Allah rat arang lun naté.
42 Idi Ieh nengecuk nekai mada' Bala luk Do' ineh kuan amung pupu, idi mangun ku lun nekali' ratnan Ieh luk inau' Allah mangun ku Lun luk Mutut Besara' amung-amung lemulun luk mulun idi lun pangeh naté pana'.
43 Idi rat neneh ineh amung-amung nabi nemaré kali', idi idé-idé luk manu Neneh kali' rungen ngalap do' ratnan sala' ngaceku ngadanNeh."
44 Kareb uned Pétrus pebala, idi Roh Meligan netemurun luun amung-amung lemulun luk neninger bala ineh.
45 Idi lun Yahudi luk manu luk maya' adat sunat, idi luk nemaya' ni Pétrus mawa, ngaceku Roh Meligan luk biré Allah pangeh inutang kuan lun pupu baken pana'.
46 Ideh neninger nedeh pebala dengan raput-raput buri' idi ideh nengerayeh Allah. Idi keburi' Pétrus nedeh,
47 "Miakké seburur lemulun mebpeng abpa' pad na miak ngerereb lemulun ini luk pangeh nengalap Roh Meligan mepad kudeng kai ini?"
48 Idi ieh nengecuk nedeh rerebpen dengan ngadan Yésus Keristus. Idi pangeh ineh ideh nemutuh Pétrus tudo déi' tuda'-tuda' aco kinioneh.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA