Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 I Teofilus makěndagẹ̌, Su ral᷊ungu bukẹ̌ku humotong seng takụ nitualagẹ̌ kěbị apang kinoạ dingangu nitěntirong Yesus dokeng i Sie nanětạ u munaran'E,
2 sarang ěllo ini i Sie nasapuạ sol᷊ong sorga e. Kal᷊amonan i Sie nasapuạ sol᷊ong sorga e, dingangu kawasang Rohkẹ̌ u Ruata e, i Sie nẹ̌gěllịu manga sasal᷊ěntihọ su manga rarolohange apang kinapile.
3 Sarangke i Sie napohong, karěngụeweng ěpạ u pul᷊o su ěllone i Sie masau měngonggọu ral᷊enge mal᷊ahẹ su manga rarolohange u i Sie mamben těngadẹ̌ biahẹ̌. I sire nakasilo si Sie dingangu i Sie nẹ̌bisarang sire mạanụeng kereapa Mawu Ruata e mẹ̌pẹ̌parenta kere sěngkatau Ratu.
4 Kụ su tempo ene i Sie nẹ̌komol᷊ẹ̌ dingang i sire, kụ i Sie nẹ̌parenta kere ini si sire, "Abe pěměnsọ bọu Yerusalem. Pěngampal᷊ẹ̌ sene sarang i Amang měngonggọu kěbị apan seng niriandin'E, apan seng Takụ nihabarẹ̌ si kamene su tempo tamai.
5 Batụ u i Yohanes e něnahani ringangu akẹ, arawe pira ěllo l᷊ai ramahi e, i kamene sarung sahaniang u Rohkẹ̌ u Ruata e."
6 Piạ e manga rarolohange mạkakomol᷊ẹ̌ dingang i Yesus, i sire e nakiwal᷊ọ e si Sie, "Mawu, tempo ini e Mawu mapulu ngae měndarisị kapia Kararatuang u tau Israel?"
7 Mawu Yesus simimbang, "I Amang-Ku sẹ̌sane e němoěngu ěllone ringangu tempone. Tawahal᷊uasu i kamene masingkạ u hal᷊ẹ̌ ene, u ene kai hakẹ̌ i Amang.
8 Arawe i kamene sarung makahombang kawasa, kamagengu Rohkẹ̌ u Ruata e seng diměnta si kamene. Dingangu i kamene sarung makoạ manga sahidiku su Yerusalem, su kaguwạu Yudea, su Samaria, ringangu sarang pondol᷊u dunia."
9 Bọuten Mawu Yesus něhengetang kerene, i Sie nẹ̌těngkasapuạ sol᷊ong sorga e ikẹ̌kasilon sire, kụ piạ e winawa namikung si Sie, hakịu seng ta nikasilong sire.
10 Piạ i sire reng kạdal᷊ingarane langị, su tempong i Yesus nẹ̌těngkasapuạ, sěngkělěndịu piạ duang katau pakeange mawira dụdarisị su sěmběkan sire.
11 "E i kamene tau Galilea," angkuěng i rẹ̌dua ene, "unụe i kamene měngkate mạhundarisị sene rudal᷊ingara l᷊angị e? Mawu Yesus kụ nikasilong kamene nasapuạ sol᷊ong sorga e kụ kinasilo su těngong kamene e, sarungbe mẹ̌sul᷊e kapia ringangu kakakoạ e kerene, kerẹewe wuhu kinasilong kamene."
12 Bọu e manga rarolohang e nẹ̌sul᷊e kapia sol᷊ong Yerusalem bọu Wukid'u Zaitun. Bukide ene, piạ u manga sěngkilo karaune wọu Yerusalem.
13 Su Yerusalem tangu i sire nakoạ sol᷊ong bal᷊e tampạ pạnumpangeng i sire, kụ dimangeng sol᷊ong kamarẹ̌ su wowone. Manga rarolohange, i Petrus dingang i Yohanes, i Yakobus dingang i Andreas, Filipus dingang i Tomas, Bartolomeus dingang'i Matius, Yakobus anạ i Alfeus, Simon mẹ̌tatahutěndạ u wanua, dingangi Yudas anạ i Yakobus;
14 kěbị e mang sěngkanaung mẹ̌tampung mẹ̌kal᷊iomaneng. I sire mẹ̌kal᷊iomaneng sěngkapẹ̌kal᷊iomaneng dingangu manga wawine pirang katau ringang'i Maria i ninang i Yesus dingangu manga anạ u sěmbaụ i Yesus.
15 Piạ su sahěllo, su tempong i sire kạtatampung -- piạ u manga mahasụ duam pul᷊o su kataune nasongo e -- i Petrus dimarisị mẹ̌deạu mẹ̌bisara. Ene i sie nẹ̌berạe,
16 "Manga anạ u sěmbaụ! Apang kụ mạbawohẹ su Bukẹ̌ Susi e mambeng mariadi. Nạung su tempo kal᷊amona wọu i Daud, Rohkẹ̌ u Ruata e seng bọu naněbal᷊u kakakoạ i Yudas, těmbonang u taumata apan němpěnamẹ si Yesus ene.
17 I Yudasẹ̌ e kai sěngkatau wọu i kitẹ, kụ i sie seng nipile mal᷊aing baugu měmunara ringang i kitẹ."
18 (I Yudasẹ̌ ini e seng nakaěbạ ěntana pěndal᷊ěbingange wọu roit'u karakine ral᷊akisẹ̌. I sie nanawo kụ nate ringangu tiange naběse kụ sarang tinaine nasue nasẹ̌bang.
19 Kal᷊awọu taumata apang měmpẹ̌tẹ̌tanạ su Yerusalem e masingkạ u hal᷊ẹ̌ ene. Kụ kai ene hakịu su werang sire ěntana ene isẹ̌sěbạ Akeldama, mangal᷊ene 'Ěntanan Daha'.)
20 "Batụ u su ral᷊ungu bukẹ̌ u Mazmurẹ̌ e piạ mạbawohẹ kere ini, 'Balạe kere pẹ̌tatanakenge kạtatanạ marěmasẹ̌; kumbahang sarang piạu sěngkatau matanạ su ral᷊unge.' Piạ l᷊ai mạbawohẹ kere ini, 'Balạete pangkate pakirol᷊ose su wal᷊ine.'
21 Ual᷊ingu ene, harusẹ̌ piạ sěngkatau tumol᷊e si kitẹ makoạ sahiding Mawu Yesus kụ seng nẹ̌bangung kapia wọu papate. Tau ene harusẹ̌be sěngkatau wọu tal᷊oarang taumata hanesẹ̌ dingangi kitẹ e su tempong i kitẹ tụtol᷊e si Yesus Kristus e walạewe sol᷊ong apa, dokeng i Yohanes nanětạ něnahani sarang tempong Mawu Yesus nasapuạ sol᷊ong sorga wọu tal᷊oarang kitẹ."
22 (1:21)
23 Tangu i sai-sain diměnta sene naněgu ruang katau, si Yusup nisunggahị lai si Barsabas (i sie isẹ̌sěbạ l᷊ai si Yustus), rẹ̌duan Matias.
24 Mase i sire nẹ̌kal᷊iomaneng. Angkuěng i sire, "Mawu, i Kau masingkạ u naungu kěbị taumata. I Yudasẹ̌ e kai nal᷊ohosẹ̌ bọu pangkate sěngkatau rarolohang, kutẹu selaing nate. Kụ lahẹko si kami, i sai wọu i rẹ̌dua ini nipilen Mawu ipẹ̌gěllirangu munara e ipěngaweng si Yudas."
25 (1:24)
26 Bọu e areng i rẹ̌dua pinẹ̌dal᷊ahurị e, mase lahurịe kai nihino si Matias. Tangu i sie nihengkẹ nakoạ darolohang tadeạu i sie sěngkapěmunara ringangu manga rarolohang i sire mapul᷊o ěsa.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA