Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Teofilo ni'omasi'õ, Ba mbukugu si fõfõna no u'ombakha'õ fefu zi no Ifalua awõ zi no Ifahaõ Yesu i'otarai wamõbõrõ halõw̃õ-Nia,

² irege tefazaw̃a Ia numalõ ba zorugo. Fatua lõ numalõ Ia ba zorugo, Ibe'e goroisa khõ ndra sinenge-Nia nifili si fao Eheha Lowalangi.

³ Me no mate Ia, õfa wulu ngaluo Iforoma'õ Ia ba ni'ila hõrõ khõ ndra sinenge-Nia wa sindruhundruhu no auri Ia. La'ila Ia, ba fahuhuo Ia khõra sanandrõsa ba wamatõrõ Lowalangi.

⁴ Ba me orudu Ia khõra, Ibe'e goroisa andre, "Bõi mirõi Yeruzalema. Mibaloi ba da'õ irege Ibe'e Ama hadia zi no Ifabu'u, ya'ia zi no U'ombakha'õ khõmi luo no.

⁵ Bõrõ me tebayagõ ami dania faoma Eheha Lowalangi."

⁶ Me owulo ndra sinenge andrõ awõ Yesu, lasofu khõ-Nia lamane, "He So'aya, hadia iada'e Õfasindro mangawuli wamatõrõ ba soi niha Gizera'eli?"

⁷ Itema li Yesu, Imane, "Amagu samõsa zangahonogõi ngaluo ba inõtõnia. Lõ moguna mi'ila, bõrõ me somasi Nama da'õ.

⁸ Ba hiza mitema dania kuaso, na tohare khõmi Geheha Lowalangi. Ba tobali ami samaduhu'õ khõ-Gu ba Yeruzalema, ba zi sagõrõ Yudea, ba Zamaria, ba irugi wondrege danõ."

⁹ Me no aefa Iw̃a'õ da'õ Yesu, ba zanehe ira tefazaw̃a Ia numalõ ba zorugo, ba ibalugõ Ia lawuo, ba i'ohe Ia irege lõ oroma sa'ae khõra.

¹⁰ Fatua lafaigifaigi si yaw̃a mbanua, wamaigi fofanõ Yesu, i'anema'õ tohare darua niha sobaru safusi si zizio ba ngaira.

¹¹ Lamane niha si darua andrõ, "He banua Galilea, hana wa muzizio manõ ami ba da'õ wamaigi si yaw̃a talu mbanua? Yesu, ni'ilami si zaw̃a fõnami numalõ ba zorugo, mangawuli Ia dania si mane ni'ilami andrõ mege."

¹² Aefa da'õ mangawuli ndra sinenge moroi ba Hili Zaitu numalõ ba Yeruzalema. Arakhagõ sakilo wa'arõu Hili andrõ moroi ba Yeruzalema.

¹³ Me larugi Yeruzalema, mõi ira ba nomo si torõi ya'ira, ba ladõlõ ira numalõ ba mbate'e tanõ yaw̃a. Tõi ndra sinenge andrõ, ya'ia Fetero ba Yohane, Yakobo ba Andrea, Filifo ba Toma, Batolomai'o ba Matai'o, Yakobo ono Galifai'o, Simoni bohalima ba Yuda ono Yakobo;

¹⁴ fefu ira ha sara dõdõ ba lõ mamalõ owulo ira wangandrõ. Mangandrõ ira si fao ira alawe awõ Maria ina Yesu ba ira talifusõ Yesu.

¹⁵ Samuza ma'õkhõ, me owulo ira -- so mato otu a dua wulu niha zowulo -- ilau muzizio Fetero wahuhuosa. Imane,

¹⁶ "Ya'ami ira talifusõ! Lõ tola lõ'õ alua zi no musura ba Mbuku Ni'amoni'õ. Ba khõ Dawido mbõrõta, no Ifa'ele'õ Eheha Lowalangi sanandrõsa khõ Yuda, sondrõnia'õ niha wondra'u Yesu andrõ.

¹⁷ Samõsa moroi ba gotaluada Yuda, ba no tefili ia gõi si fao ba halõw̃õ awõda."

¹⁸ (No isõndra danõ lewatõnia Yuda andre si tobali bõli gõlõnia we'amõi si manga mbõli si lõ atulõ andrõ. Atoru ia ba aboto dalu, irege mõi baero fefu nõsi mbetu'ania ba mate ia.

¹⁹ La'ila zalua andrõ fefu niha ba Yeruzalema. Da'õ mbõrõ labe'e tõi danõ andrõ ba lira Akhelidama, eluahania 'Tanõ Ndro'.)

²⁰ "Bõrõ me no musura bakha ba Mbuku Zinunõ, si mane, 'Akha tobali atua nahiania; bõi i'onahia niha.' So gõi nisura bõ'õ si mane, 'Akha itema niha bõ'õ dadaomania.'

²¹ Bõrõ da'õ, lõ tola lõ'õ so samõsa zi fao khõda samaduhu'õ wa no auri mangawuli Yesu So'aya moroi ba wa'amate. Niha andrõ ba samõsa moroi ba gotalua zi lõ aetu faofao khõda me so na Yesu ba gotaluada, i'otarai me ibõrõtaigõ mamayagõ idanõ Yohane irugi ginõtõ tefazaw̃a Yesu numalõ ba zorugo."

²² (1:21)

²³ Latuturu darua niha ya'ira si so ba da'õ, ya'ia Yosefo nifotõi Barasaba (nifotõi Yuso gõi), ba Matia.

²⁴ Lalau mangandrõ. Lamane, "He So'aya, Õ'ila dõdõ niha fefu. No aheta Yuda moroi ba dadaomania fa'asinenge ba no mate ia. Tuturu khõma, haniha ba gotalua zi darua niha andre nifili Zo'aya wame'e halõw̃õ ba wogati Yuda."

²⁵ (1:24)

²⁶ Me no aefa da'õ, lalau fadahõdahõ ba zi darua tõi andrõ, ba aekhu khõ Matia. Ba labali'õ ia sinenge si fao ba zinenge si felezara tanõ bõ'õ andrõ.

Kisah Para Rasul

Video Kisah Para Rasul 1

Ikuti Kami:

KONTAK | PARTISIPASI | DONASI