Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Tapi lit me kalak si deban gelarna Ananias, ndeharana si Sapira. Idayakenna tanehna selambar tapi ibunikenna deba tukur taneh e; sada bagin iberekenna man rasul-rasul. Ndeharana pe meteh kerna si enda.
2 (Kis 5:1)
3 Jenari isungkun Petrus ia nina, "O Ananias ngkai maka ipelepasndu iblis engkuasai ukurndu, seh maka ibualindu Kesah Si Badia alu muniken sada bagin tukur taneh e?
4 Kam kap empu taneh e ope denga idayaken; janah kenca idayaken, duit e pe ate-atendu empergunakenca. Dage ngkai maka turah ukurndu erbahan si enda? Labo manusia si ibualindu, tapi kam nggo erbual man Dibata!"
5 Kenca ibegi Ananias kata e minter ia mbulak dingen mate pe. Mbiar kal kerina kalak si megi kejadin e.
6 Jenari tedis piga-piga anak perana si i je, ibalutina mait e, ibabana ndarat guna ikuburken.
7 Kira-kira telu jam kenca si e, reh ndehara Ananias ku bas, la ietehna kai si nggo jadi nandangi perbulangenna.
8 Nina Petrus man bana, "Kataken man bangku, tuhu kin enda ngenca tukur taneh si ialokenndu ras perbulangenndu?" Erjabap ia nina, "Tuhu, ase me ergana."
9 Emaka nina Petrus man bana, "Ngkai maka ersada arihndu ras perbulangenndu encubai Kesah Tuhan? Nehenlah, kalak si nggo engkuburken perbulangenndu tedis i lebe-lebe pintun. Kam pe ibabana me ku darat."
10 Rempet mbulak Sapira ku nahe Petrus jenari mate. Asum bengket anak perana ndai ku bas idapetina Sapira nggo mate. Emaka ilanjana ndarat jenari ikuburkenna deherken perbulangenna.
11 Mbiar kal kerina perpulungen e, bage pe kerina kalak si deban si megi kejadin enda.
12 Melala tanda-tanda sengget si mbelin ibahan rasul-rasul i tengah-tengah jelma si nterem. Megati pulung kerina kalak si nggo tek e, i Serambi Salomo.
13 Kalak si deban mehangke ndeherisa, amin bage gia ikataken kalak si nterem maka perpulungen e mehuli.
14 Tapi reh dekahna reh teremna kalak si tambah ku perpulungen e, subuk dilaki bage pe diberu si tek man Tuhan.
15 Erdandanken tanda-tanda sengget si nggo ibahan rasul-rasul e, emaka nterem kalak si maba kade-kadena si penakiten ku pasar. Ipepedemna i datas ingan medem ntah amak, gelah adi mentas Petrus, awihna lah gia engkenai kalak si penakiten e.
16 Bage pe nterem kalak si ringan i kuta-kuta sekelewet Jerusalem reh. Ibabana kalak si penakiten ras kalak si iseluki setan; janah kerina ia ipepalem.
17 Imam si Mbelin ras teman-temanna kalak Saduki, mulai erbahan tindaken man rasul-rasul sabap cian kal atena.
18 Itangkapna rasul-rasul e jenari itamakenna ku bas penjara si mbelin.
19 Tapi sanga berngi e reh malekat Tuhan nalangi pintun penjara e. Iteguna rasul-rasul e ndarat, janah nina,
20 "Laweslah, beritaken kerna kegeluhen si mbaru enda man kalak si nterem i bas Rumah Pertoton."
21 Iikutken rasul-rasul kata malekat e. Kenca terang pepagina bengket ia ku bas Rumah Pertoton, jenari ibenakenna ngajar i je. Paksa si e Imam si Mbelin ras teman-temanna mpepulung kerina pertua-pertua kalak Jahudi guna ersidang. Jenari isuruhna kalak ngelegi rasul-rasul e ku penjara.
22 Tapi kenca seh kalak e i penjara lanai idahna rasul-rasul e i je. Emaka mulihken ia jenari iberitakenna.
23 Nina, "Idapeti kami penjara e ikunci janah kerina si erjaga i bas inganna, i lebe-lebe pintun. Tapi kenca italangi kami, la lit sekalak pe idapeti kami i bas."
24 Kenca ibegi pengulu Rumah Pertoton ras imam-imam si mbelin berita e mamang atena janah nungkun ia nina, Kai nge si nggo jadi nandangi rasul-rasul e?
25 Jenari reh sekalak maba berita nina, "Begiken! Kerina kalak si itamakenndu ku bas penjara e genduari paksa ngajari kalak si nterem i Rumah Pertoton."
26 Emaka berkat pengawal Rumah Pertoton ras juak-juakna ngelegi rasul-rasul e. Tapi labo alu cara paksa ibahanna, sabap mbiar ia ibenteri kalak si nterem.
27 Ibabana rasul-rasul e ku bas janah isuruhna tedis i lebe-lebe sidang. Jenari isungkun Imam si Mbelin rasul-rasul e.
28 Nina, "Nggo ilarang kami kam ngajar i bas gelar Jesus. Tapi teridah, maka nggo serser kalak Jerusalem enda megi pengajarenndu. Janah ikatakenndu maka kami erbahanca Ia mate."
29 Ngaloi Petrus ras rasul-rasul si deban nina, "Kami arus ngikutken Dibata, labo manusia.
30 Dibata si isembah nininta nggo mpekeke Jesus i bas si mate nari, kenca Ia nggo ibunuhndu alu makuken Ia ku kayu persilang.
31 Dibata nggo ngangkat Ia dingen mereken kuasa man BaNa jadi Raja dingen Penebus, gelah kalak Israel jera dingen dosa-dosana ialemi Dibata.
32 Kami me saksi i bas si e kerina, kami ras Kesah Si Badia si ibereken Dibata man kalak si ngikutken Ia."
33 Megi kata e merawa kal ate anggota sidang. Ibunuhna pe atena rasul-rasul e.
34 Tapi tedis sekalak anggota sidang e, eme kalak Parisi, gelarna Gamaliel. Ia sekalak guru Undang-undang janah kerina kalak mehamat man bana. Isuruhna gelah ibaba lebe ndarat rasul-rasul e.
35 Jenari nina man anggota sidang, "O kam kalak Israel, ukurkenlah manjar-anjar kai si atendu ibahanndu nandangi rasul-rasul enda.
36 Sabap nai reh si Tudas, ikatakenna maka ia sekalak si mbelin; janah lit pe si ngikutken ia empat ratus kalak. Tapi kenca ia ibunuh kerina pengikut-pengikutna e merap janah pergerakenna ngadi.
37 Kenca si e, sanga ilakoken cacah jiwa reh ka Judas i Galilea nari. Ibabaina kalak si nterem mbrontak. Tapi ia pe ibunuh janah kerina pengikut-pengikutna merap.
38 Perbahan si e kukataken man bandu, ula ugapa pe ibahan ia. Pelepas sajalah, sabap adi i bas manusia nari kin ajarenna e, masap nge pagi.
39 Tapi adi i bas Dibata nari, labo mungkin kam ngasup ngolangisa. Banci jadi kam nge si ngelawan Dibata." Kai si ikataken Gamaliel e ikutken anggota sidang.
40 Emaka idilona rasul-rasul e ku bas. Isuruhna pengawal-pengawal ngeligasi rasul-rasul e janah ilarangna ia kerina ngajar i bas gelar Jesus. Kenca bage ipulahina.
41 Itadingken rasul-rasul sidang e alu ukur meriah sabap metunggung iakap Dibata ia ikut ngenanami penghinan erkiteken gelar Jesus.
42 Janah tep-tep wari iteruskenna ngajar dingen meritaken Berita Si Mehuli kerna Jesus Kristus i Rumah Pertoton bage pe i bas rumah kalak.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA