Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Woluwo olo ta lolai ngota ta tanggu-tanggula te Ananiyas. Tiyo wolo dileliyo ti Sapira lopotali lo huta ngopita.

² Otawa lo dileliyo deu ngotayadu haraga lo huta boyito tiluiyo mao wawu ngotayadu yiluduliyo mao ode mongorasul wawu piloleleliyo mao ode mongorasul deu uwito boyito haraga lo huta nga'amila.

³ Bo te Petrus lohintu ode oliyo odiye, ”Ananiyas, yilongola hilamu pilolulimu mao kilawasa lo Ibilisi, tunggulo yio lohimbulo to Roh lo Allahuta'ala wawu loluao ngotayadu haraga lo huta boyito?

⁴ Ngohilayao huta boyito dipo pilotalimu, uwito tatapu uwolemu; wawu tou ma yilapato pilotalimu mao olo, hasililiyo boyito debo tatapu uwolemu. Yilongola yio ma loroncana mongakali to delomo hilamu? Yio dila lohimbulo ode manusiya, bo lohimbulo to Allahuta'ala!”

⁵ Tou lo'odungoheo loiya boyito, te Ananiyas lebanti wawu yilate. Nga'amila tawu ta lo'odungohe pasali boyito dilu-diluyito.

⁶ Lapatao mongobohulotawu ngololota ma lolaputao mayiyeti le Ananiyas boyito wawu hiluliheliyo mota yilobungiyo.

⁷ Tanu tolojamu mola dile le Ananiyas ledungga mayi ode tambati boyito, bo tiyo dila motota lo u ma lowali.

⁸ Te Petrus loloiya mao ode oliyo odiye, ”Poleleya mayi ode olau, huta pilotali limongoli boyito otutu meyalo dila haragaliyo odiye?” Tabuwa boyito lolametao, ”Banari odi-odiyelo haragaliyo.”

⁹ Te Petrus loloiya mao ode oliyo odiye, ”Yilongola timongoli loheluma mohimontala Roh lo Allahuta'ala? Bilohi, mongobohulotawu ta mota lolobunga hiyalumu boheli lohuwalingayi wawu timongoliyo ma mohulihe mota olemu olo ode bulemengiyo.”

¹⁰ Tou boyitolo tabuwa boyito ma lebanti to talu le Petrus wawu yilate. Tou mongobohulotawu boyito lomaso mao, timongoliyo lo'odungga mao oliyo ma yilate, lapatao dilelo limongoliyo ode bulemengiyo wawu yilobungiyo mao to tili lo kuburu lo hiyaliyo.

¹¹ Nga'amila jama'ati wawu nga'amila ta lo'odungohe pasali boyito ma dilu-diluyito.

¹² Wawu ngohuntuwa mujijat wawu tuwota u mo'olinggolabu hepilohutu lo mongorasul to wolota lo tawu ngohuntuwa. Nga'amila ta paracaya ode oli Isa Eya biyasaliyo heambuwa to Surambe li Nabi Sulayiman.

¹³ Openu raiyati hepohurumatiya olimongoliyo, bo diyaluwo ta barani mogabungiya wolimongoliyo.

¹⁴ Wawu ta paracaya ode oli Isa Eya ma lebe heoduhenga jumulaliyo, mongololai wawu mongobuwa.

¹⁵ Sababu mujijat ngohuntuwa hepilohutu lo mongorasul boyito, tawu-tawuwalo helodelo mayi ta hengongota ode diluwari, ode dalala da'a. Wawu ta hengongota boiyto hepopobalatoliyo mao to amongo meyalo bale-bale, alihu wonu bolo te Petrus lumawodeo teto, potala woliluliyo metuhata mao to ta hengongota boyito.

¹⁶ Wawu ngohuntuwa olo ta heuyu-uyuhe lonto kota-kotawala to tili lo kota lo Yerusalem helodelo mayi ta mongongota wawu ta heilotuwanga lo lati. Timongoliyo nga'amila yiloluli lo kawasa li Isa Almasih.

¹⁷ Pulitiyo mao mongoimamu da'a wawu ta hedudua olimongoliyo, deuwitoyito tawu-tawuwala ta o pahamu Saduki, ma loiwaupao mongorasul boyito wawu loiulungao to tutupa to kota sababu timongoliyo moyingo da'a.

¹⁸ (5:17)

¹⁹ Bo to huyiliyo mao malaikati ngota lonto Allahuta'ala lomuo pintu-pintuwala lo tutupa wawu lodelo mao olimongoliyo ode bulemengiyo. Loiya lo malaikati boyito ode olimongoliyo,

²⁰ ”Ponaolo wawu tihulao timongoli to pango bele lo Eya wawu popotunggula mao ode tawu-tawuwalo tomimbihu tutumula kakali boti.”

²¹ Donggo dumodupa da'a timongoliyo ma lomaso mao ode pango bele lo Eya lapatao longajari tawu teto odelo parenta lo malaikati boyito. To wakutu boyito imamu da'a wawu ta hedudua olimongoliyo longambu mayi Mahkama lo agama, deuwitoyito majalisi lo bangusa Israel. Lapatao mongorasul boyito ma piloihamaliyo mayi lonto tutupa to ta hedahawa bele lo Eya.

²² Bo tou ta ilahula boyito lonao mao ode tutupa, timongoliyo dila lo'odungga mao mongorasul teto. Lapatao timongoliyo lohuwalingayi wawu lopotunggulao odiye,

²³ ”Ilodungga mao lamiyatiya pintu-pintuwala lo tutupa heuntiya mopiyohu wawu ta hedahawa woluwo to talu lo pintu. Bo tou amiyatiya lomuo mao pintu boyito, diyaluwo ngota mao ta ilodungga lamiyatiya to delomiyo.”

²⁴ Tou tauwa lo ta hedahawa bele lo Eya wawu mongoimamu da'a lo'odungohe habari boyito, timongoliyo iloheya wawu hepomikirangiya wolo u ma mowali to olimongoliyo lapatiyo mao.

²⁵ Bo woluwo tawu ngota lonao mayi lopolele ode olimongoliyo odiye, ”Ototayi mao: Tawu-tawuwala ta ilulungi mongoli to tutupa, woluwo to pango bele lo Eya wawu timongoliyo hepongajariya to tawu ngohuntuwa!”

²⁶ Lapatao tauwa wawu ta hedahawa bele lo Eya ma lonao mota lohama mayi mongorasul boyito lonto bele lo Eya, bo dila wolo upakusa, sababu timongoliyo mohe bolo paiyo lo tawu ngohuntuwa boyito lo botu.

²⁷ Timongoliyo ma lodelo mongorasul boyito wawu pilopotaluwoliyo mao lo Mahkama lo agama. Lapatao ti imamu da'a ma lomulayi lohintu ode olimongoliyo,

²⁸ uwaliyo mao, ”Wolo utiotutuwa ami hemongentela olimongoli mongajari to delomo Tanggula boyito. Bo masatiya timongoli ma lopo'opolu kota lo Yerusalem boti lo pongajari limongoli wawu timongoli ohila mopotanggungi lo duhu lo Tawu boyito ode olami.”

²⁹ Bo te Petrus wolo mongorasul boyito lolametao odiye, ”Ito musi lebe ta'ati ode Allahuta'ala dila ode manusiya.

³⁰ Timongoli ta lohinggi nyawa li Isa to salipu, bo Allahuta'ala Eya ta hetubo lo mongotiyombunto ma lopobongu mayi o-Liyo lonto kuburu.

³¹ Tiyo ma pilopolanggato Allahuta'ala wolo kawasa-Liyo lowali Tauwa wawu Ta mo'osalamati, alihu bangusa lo Israel motobati wawu ambunguwo lo Allahuta'ala to dusa.

³² Wawu ami sakusi lo u ma lowali botiye, odito olo Roh lo Allahuta'ala u yilohi mayi lo Allahuta'ala ode tawu-tawuwala ta ta'ati o-Liyo.”

³³ Lo'odungoheo loiya boyito, timongoliyo loyingo da'a wawu ma ohila mohinggi nyawa lo mongorasul boyito.

³⁴ Bo tawu ngota ta o pahamu Parisi to delomo Mahkama lo agama boyito, ta tanggu-tanggula te Gamalil, ngotaliyo lo ta ahali lo Tawurat ta hehurumatiyo lo tawu ngohuntuwa, tilimihula mola wawu lohile alihu mongorasul boyito popokaluwariyo mao limongoliyo ngope'e.

³⁵ Lapatao tiyo loloiya ode ta heambuwa boyito odiye, ”Weyi tawu lo Israel, pikirangiya mao mopiyohu, wolo u ma pohutuwo limongoli ode tawu-tawuwala botiye!

³⁶ Sababu omo-omolu ma yiloluwo te Teudas ta hemonganggapu batangaliyo ta leida'a wawu woluwo wopatohetuto ta hedudua oliyo, bo lapatao tiyo pilate lo tawu wawu ta hedudua oliyo ma lopupulepe wawu bolo yiloli lomao.

³⁷ Tou yilapatao tiyo to wakutu podaputariyaliyo raiyati, ma yiloluwo te Yudas tawu lo lipu lo Galileya. Tiyo lotiyanga ta ngohuntuwa modudua oliyo, bo tiyo olo yilate wawu ma lopulepe nga'amila ta hedudua oliyo.

³⁸ Uwitolo sababuliyo poleleu mayi ode olimongoli, dila mao pohutu wolo-wolo ode tawu-tawuwala botiye. Hulimao timongoliyo, sababu wonu huhutu limongoliyo botiye bo lonto manusiya, tantu ngope'e mao ma moli.

³⁹ Bo wonu uwito lonto Allahuta'ala, timongoli dila mowali mo'olahe tawu-tawuwala botiye wawu boma mopatatayi timongoli ta hepolawaniya to Allahuta'ala.” Odito nasehati le Gamalil wawu nasehati boyito tilolimo limongoliyo.

⁴⁰ Lapatao timongoliyo muli lotiyangayi mongorasul boyito, wawu yilumbade mao limongoliyo lo bubo'o wawu ilentela limongoliyo mongajari tawu to delomo tangguliyo li Isa. Lapatao uwito timongoliyo ma bilebasiyaliyo mao.

⁴¹ Mongorasul boyito ma lolola mao ta heambuwa to Mahkama lo agama boyito wolo uhewengahu, sababu timongoliyo ma ilanggapu lo Allahuta'ala patuti modutola uhina lo tawu sababu tangguli Isa.

⁴² Wawu timi'idu dulahu timongoliyo dila o huheliliyo hepongajariya to pango bele lo Eya wawu to bele-beleyala lo tawu wawu hepopotunggula lo habari tomimbihu Ta pilojanjiya lo Allahuta'ala mowali Olongiya wawu mo'osalamati manusiya, deuwitoyito ti Isa Almasih.

Kisah Para Rasul

Video Kisah Para Rasul 05

Ikuti Kami:

KONTAK | PARTISIPASI | DONASI