Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Apa den mesa' muane disanga Ananias na bainena disanga Safira mbaluk toda ia padangna.

² Sesena joo alli padangna napatorro na sesena naben rasulu'. Ia joo nasitujui sola bainena.

³ Nakuanni Petrus, "Ee, Ananias, ammueloran bang ora kalemu nakuasai Ballisi', ammuuragara Roh Allataala, ssarakan buni kalemu sesena alli padangmu?

⁴ Ia joo padang, apammu iko tonna te'dapa mubalukki. Na ia to allinna tommumangka mbalukki, apammu too iko. Jaji anna mase ora penawammu male manggauk susi joo? Tangngia iko tolino muuraga apa Puang Allataala Ia!"

⁵ Ia tonna mangka ssa'dingngi joo kada, ta'pa tipessambakmi Ananias namate. Padami to tossa'dingngi joo, memmalaja' ngasan.

⁶ Siratuanmi to tokallolo nabalunni to batang rabukkuna, nabullei lako salean, natarruh male llamunni.

⁷ Mbai tallung jang mangkanna ratumi to bainena. Te'da naissenni to apa mane' mangka jaji.

⁸ Nakuanni Petrus, "Pauanna' sitonganna, pada tonganmoraka tee allinna to padang mubaluk sola muanemu?" Napebalii bainena nakua, "Tongan, padamo tuu allinna."

⁹ Nakuanni Petrus, "Ciapari musikangkolo'ra muanemu ncoba mpamagalli Roh Allataala? Den tau ke'deh jio ba'ba mane' pole llamun muanemu na ia bang unamo la male pole' o mbulleko lako salean."

¹⁰ Ta'pa tipessambak bang unami joo bainena jio olona Petrus namate. Na ia tonna mentama to tokallolo, nakitai matemo. Nabullemi lako salean to batang rabukkuna, namane' male llamunni napasiandah muanena.

¹¹ Gaja lanjang ngasan to tomatappa' sola to tau laen to ssa'dingngi joo.

¹² Ia to rasulu' mpugauk mangrupa-rupa tanda mejangngaran lan tangnga-tangngana tobuda. Tuli mesa' penawai to tomatappa' sirempun jio rantena Sulaiman jio Bola Puang Allataala.

¹³ Te'da tosalean barani ratu rraui, apa gaja naangga' tobuda to tomatappa'.

¹⁴ Samasai-sainna sakerangngan-rangnganna to tomatappa' lako Puang la muane la baine.

¹⁵ Susimi joo, to tanda mejangngaran napugauk rasulu', arannai ia to tomasaki dikolong lako randan lalan nadipajao katindoan iarika ampah, dikua na moi bajo-bajona bangra Petrus ngkannai ke nnola jioi, wa'ding napumalagah tomasaki.

¹⁶ Buda tau siratuan jio mai mengguririkkina kota Yerusalem mbawa tomasaki sola to natamai setang, nadipamalagah ngasan, nadipasun too to setang jio mai kalena.

¹⁷ Katampakanna magajinawai joo Imang Lompo sola taunna, iamo to torroan to-Saduki,

¹⁸ najokkoi to rasulu', napatamai pangtarungkuan.

¹⁹ Apa ia tonna bonginna, den malaeka'-Na Puang ntimbakanni joo ba'ba pangtarungkuan, napasunni to rasulu'. Nakua joo malaeka' ngkuanni,

²⁰ "Ee, male kamu' tama Bola Puang Allataala ammipangpeissenanni to katuoan baru lako tobuda!"

²¹ Naturu'i joo kadanna, na masawanna melambi' mentamami Bola Puang Allataala mangngajahhi. Ia joo wattu ia to Imang Lompo sola taunna mpangpesuanni nasirempun to Pangbicara Agama, iamo to sininna pekaamberan agama sola pekaamberan to-Israel. Napangpesuanni to rasulu' nadipasun lan mai pangtarungkuan, nadibawa ratu mangngolo.

²² Apa ia tonna ratu lako pangtarungkuan to todisua, te'damo naampa'i to rasulu' lan. Jaji polei mpaui lako to tossuai, nakua,

²³ "Ia tongkiratumo lako pangtarungkuan, tikunci melo to ba'ba na jio bang unai to pangjaga mangngampa. Apa ia tongkitimbakkii to ba'ba, moi mesa' te'damo tau lan kikita."

²⁴ Ia tonna sa'dingngi kapala pangjagana Bola Puang Allataala sola kapala imang joo kadanna, pussakmi ntangngahhi kumua ba'tu la apamo jaji lako to rasulu'.

²⁵ Apa den mesa' tau ratu mpaui nakua, "Oo! Ia to totapatama pangtarungkuan nnajahhi tobuda lan Bola Puang Allataala tee too."

²⁶ Ta'pa malei joo kapala pangjagana Bola Puang Allataala sola taunna njokko pole'i joo rasulu'. Apa te'damo naewa karrahhi, sanga malaja'i lako tobuda, iamo ke nasilekko'i batu.

²⁷ Nasolanni kapala pangjaga sola taunna joo rasulu' lako kasirempunan Pangbicara Agama, naparessai Imang Lompo.

²⁸ Nakuanni, "Ee, kusanga mangkamo kamu' kianggai kumua danggi' lalo mipangpangngajaranni to Puang Isa. Ammipugauk pole' omi joo? Kannori mipatitaleh to pangngajaranmi lan lili'na kota Yerusalem, ammilantanda omokan kumua kami' ntumangngi namate joo tau."

²⁹ Apa napebalii Petrus sola padanna rasulu' nakua, "Kila'biran kami' nturu' Puang Allataala na ia to nturu' tolino!

³⁰ Ia to Puang Allataala nasompa tojolota', Iamo mpatuo pole'i jio mai kamatean to Puang Isa to mangka mipangpepampangan jao kaju sitamben.

³¹ Napamatande napajioi sa'de kanan-Na, namenjaji Raja Mangpasalama', dikua anna den wattunna to bangsa Israel namengkatoba' jio mai dosana na didampangan.

³² Kami'mo tee to mangka ngkitai kipangpeissenanni lako kamu' sola Roh Allataala, to nasua lako to tonturu' parenta-Na."

³³ Gaja pallai tuu lako Pangbicara Agama tonna sa'dingngi joo, namadoang la mbunoi to rasulu'.

³⁴ Apa den mesa' to-Farisi Pangbicara Agama, disanga Gamaliel. Ia tee Gamaliel guru agama nakasiri' ngasan tau. Ke'dehhi ssua tau mbawai joo rasulu' lako salean jolo',

³⁵ namane' mangkada nakua, "Ee, tokupusile'to to-Israel! Tangngah meloi apa to la mipugauk lako tee tau.

³⁶ Nasaba' den tau tonna tee disanga Teudas, ssanga kalena iamo mattujunna, na mbai den pata ratuh tau nturu'i. Apa dibunoi, nasisarak-sarak ngasan to taunna, te'damo najaji to akkattana.

³⁷ Mangkai joo, tonna dipugauk mbilang tau, den omi Yudas to-Galilea. Buda tau nasolan turu'i nnewa tomangparenta. Apa dibuno tooi, nasisarak-sarak too to tonturu'i.

³⁸ Jaji, ianna aku', danggi' lalo mipatumba-tumbai tee tau, la'paran bangmi ia. Sanga ia ke ia to akkattana sola panggaukanna pole jio mai tolino, nang la mangnganggean ia.

³⁹ Apa ia ke pole jioi mai Puang Allataala, te'da mikullei la ntaloii. Wa'ding pajan undinna kumua tonnewara kamu' Puang Allataala." Natarima tuu lako Pangbicara Agama joo pangpangngingaranna Gamaliel.

⁴⁰ Napangpesuanni to rasulu' ratu, napekajui, namane' ngkuanni, "Te'damo miwa'ding mpangpangngajaranni to misanga Puang Isa." Mangkai joo dila'paranmi.

⁴¹ Masannang to rasulu' messun lan mai joo kasirempunan Pangbicara Agama, sanga narekenmo Puang Allataala sipato' dipakario-rio, nasaba' kamatapparanna lako Puang Isa.

⁴² Allo-allo te'da ka'tunna mangngajahhi, la lan Bola Puang Allataala, la lan bolana tau, napangpeissenanni to Kareba Kasalamatan kumua Raja Mangpasalama' to Puang Isa to pura dipau tonna anu'.

Kisah Para Rasul

Video Kisah Para Rasul 05

Ikuti Kami:

KONTAK | PARTISIPASI | DONASI