Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Ratnan iko ini, O anakku, do' iko metueh bang katu luk bang Keristus Yésus.
2 Idi bada' luk pangeh pindengermu rat negku arang lun mula' luk nekali', do' mada' kuan lemulun luk lutep idi luk petulu mada' nelun baken teh.
3 Do' iko pad-pad nalap medereh denganku mepad kudeng seburur lun pebunu' luk do' ratnan Keristus Yésus.
4 Seburur lun pebunu' luk uned pebunu' na ngesabeng niatneh ku anun-anun luk ratnan tana' ini. Iamo' ieh pian ngawang niat lun rayehneh.
5 Idi lemulun luk peribatun, na pimaren pata kudeng ieh na maya' mepad kudeng luk icuk.
6 Idi lun luk merur ngakem bang lati', kali' rungen ngalap bua'neh luk pun-pun.
7 Ngerawé do'-do' balaku ini, ngaceku bang luk amung-amung Tuhan miak maré ileh kuanmu.
8 Ngerawé ratnan Yésus Keristus inul Daud ineh luk tinui rat arang lun naté, mepad kudeng Bala luk Do' luk bida'ku ineh.
9 Ngaceku ui mada' Bala luk Do' ineh ui medereh pad ui kiling, mepad kudeng lun luk dat. Iamo' bala Allah baken ieh kiling.
10 Ineh punneh ui tuman ratnan amung-amung ngaceku pupu Allah luk pinili', pad ideh pana' ngalap ulun bang Keristus Yésus dengan rayeh luk meruked.
11 Idi ini bala luk matu: "Kudeng tau pangeh naté pad-pad denganNeh. tau miak mulun pad-pad denganNeh.
12 Kudeng tau megéi' medereh tau miak ngimet pad-pad denganNeh. Kudeng tau ngalum Neneh, Ieh pana' ngalum netau.
13 Kudeng tau na lutep, ieh megéi' lutep, ngaceku Ieh na miak ngalum bururNeh."
14 Mada' nelun luk badénmu, idi periteteng nedeh pa kiung Tuhan, pad ieh na pekedaluh ratnan bala. Ini na ulek, iamo' ngacing luk dat kuan lemulun luk ninger ineh.
15 Do' iko mekél pad iko buren Allah, mepad kudeng seburur demulun luk na migu' idi luk nginul bala ratnan luk matu dengan mesiri.
16 Iamo' ngado bururmu ratnan bala lun luk ngeraruh luk mo'-mo', ngaceku bala ineh ngado lemulun ratnan Tuhan.
17 Luk badéndeh mepad kudeng kimuh luk kuman uang. Arangdeh inan Himenius idi Pilitus.
18 Didueh pangeh neraruh ratnan luk matu, idi pebala tui tau ini pangeh nepelaba, pad anu lemulun uen ngelaya'.
19 Iamo' diri Allah luk lutep ineh meraben peh, idi kudeng ini etuneh; "idi Tuhan miti amung-amung pupuNeh," idi teh, "Idé-idé luk neten ngadan Tuhan, do' ieh ngado bururneh ratnan luk dat."
20 Idi binaweh luk bang ruma' luk rayeh baken ratnan amas idi pirak mo', iamo' ratnan kayuh idi tana' pana', idi inan teh kuan kekamen luk buren idi inan teh kuan kekamen luk dat.
21 Kudeng idé-idé ngeligan bururneh ratnan luk kudeng ineh, ieh miak mangun ku aceh binaweh luk buren, ngaceku ieh pangeh linigan, idi miak uen Tuhanneh makai, temina' kuan amung-amung kekamen luk do'.
22 Ngado bururmu ratnan amung-amung lili anak adi', idi nakap luk matu, anu, awa, idi pedo', dengan amung-amung lemulun luk nawar ngadan Tuhan dengan niat luk meligan.
23 Iamo' ngado bururmu ratnan saad luk mebacé idi luk na ulekneh, ngaceku iko kali' luk kudeng ineh ngacing kedaluh.
24 Demulun Tuhan na miak pekedaluh. Do' ieh mulai niat kuan amung-amung, mileh mada' lemulun, idi mekadang niat bang dereh,
25 idi do' ieh mada' lemulun luk sikal metueh rat neneh dengan mebeneh niat, merapet idi Allah miak nguit nedeh uren, pad ideh kali' ratnan luk matu.
26 Idi ideh miak mepuit ratnan abpung Iblis, kareb ideh pangeh tiban demulun Tuhan pad nganau' pian Allah.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA