Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Tapi kam, o anakku, lias ate Dibatalah mpegegehi kam, si nggo jadi sikerajangenta erdandanken persadanta ras Kristus Jesus.

² Kai si nggo ibegindu i bas aku nari i lebe-lebe nterem saksi, endeskenlah man kalak si ertanggung jabab, si ngasup ngajarkenca ka man kalak si deban.

³ Ikutlah kam i bas ngenanami kiniseran jadi laskar Kristus Jesus si tutus.

⁴ Sekalak laskar si sangana ertugas la icampurina urusen kegeluhen si deban gelah ngena ate komendanna.

⁵ Sekalak si ikut i bas perlumban labo banci menang adi la kin patuh nandangi peraturen-peraturen si lit i bas perlumban e.

⁶ Sekalak perjuma si nggo latih erdahin arus ndat bagin si pemena i bas ulih jumana nari.

⁷ Ukurkenlah kai si kukataken man bandu, sabap ibereken Tuhan man bandu kengasupen ngangka kerina si enda ndai.

⁸ Ingetlah Jesus Kristus, si nggo ipekeke Dibata i bas si mate nari. Ia kesusuren Daud, bagi ikataken i bas Berita Si Mehuli si ku beritaken e.

⁹ Erdandanken kupembarken Berita Si Mehuli e nge maka aku ngenanami kiniseran, janah igariken pe aku bagi kalak jahat. Tapi kata Dibata labo tergariken,

¹⁰ emaka megenggeng aku i bas kai pe guna kiniulin anak-anak Dibata si terpilih, gelah ia pe banci ngaloken keselamaten si reh arah Kristus Jesus, ras kemulian si rasa lalap.

¹¹ Tuhu me kata enda, "Adi nggo kita mate ras Ia, kita pe pagi nggeluh ka ras Ia.

¹² Adi tetap megenggeng kita, ras Ia ka pe kita pagi erkuasa. Adi si persoken Ia, IpersokenNa pe kita.

¹³ Adi la pe kita setia, Ia tetap nge setia, sabap labo banci IpersokenNa bana."

¹⁴ Ajarkenlah perpulungen janah persingeti i lebe-lebe Dibata gelah ula ia rubati kerna sada-sada cakap.

¹⁵ Usahakenlah gelah dat pujin kam i lebe-lebe Dibata, bagi sekalak si erdahin si la mela kerna dahinna, sekalak si ngajar alu pinter berita si benar i bas Dibata nari.

¹⁶ Sirangilah ranan si la tuhu dingen si sia-sia, si perasatna nirangken kalak ras Dibata.

¹⁷ Si iajarkenna e njajat bagi penakit kanker. Dua kalak i bas guru-guru e gelarna Himeneus ras Piletus.

¹⁸ Duana ia nggo nadingken pengajaren si benar. Genduari nggo kemamangen ibahanna piga-piga kalak si nggo tek man Jesus Kristus alu ngataken maka kekeken kalak si tek nggo jadi.

¹⁹ Tapi palas si nteguh si nggo ipanteki Dibata labo terugur. I babo palas e lit tersurat, "Itandai Tuhan SikerajangenNa," bage pe, "Ise ngakuken maka ia sikerajangen Tuhan arus ItadingkenNa perbahanen-perbahanen si la payo."

²⁰ I bas rumah si mbelin lit erbage-bage pinggan ras mangkuk, lit si ibahan i bas pirak nari bage pe i bas emas nari janah lit ka pe si ibahan i bas kayu nari bage pe i bas taneh dah nari; lit si ipake guna keperlun si mehaga, lit si ipake guna keperlun biasa.

²¹ Adi lit kalak si mbersihken dirina i bas kejahaten-kejahaten enda nari, ipakeken me ia guna si mehuli, sabap nggo iendeskenna dirina dingen erguna man tuanna. Nggo isikapken ia guna ipake i bas dahin si mehuli.

²² Tadingkenlah sura-sura si jahat i bas kalak nguda. Usahakenlah ndalanken kai si tuhu-tuhu ngena ate Dibata, nehken tanggung jababndu selaku kalak si tek, nehken keleng ate dingen nggeluh alu dame raduken kalak si tutus mindo penampat man Tuhan.

²³ Ula campuri percakapen si sia-sia dingen la rorat. Ietehndu maka arah si e turah perubaten.

²⁴ Suruh-suruhen Tuhan la banci rubat. Arus ia mehuli man ise pe, sekalak guru si mehuli dingen saber,

²⁵ janah alu lemah-lembut ngajarken kalak si erlawanen ras kam. Banci jadi ibereken Dibata man kalak enda kesempaten jera i bas dosa-dosana nari dingen meteh si tuhu-tuhu ngena ate Dibata.

²⁶ Alu bage jore ukurna mulihken janah pulah ia i bas siding Iblis nari, si nggo naban dingen maksa ia ngikutken sura-surana.

2 Timotius

Video 2 Timotius 2

Ikuti Kami:

KONTAK | PARTISIPASI | DONASI