Loading audio...
Error: Maaf, audio tidak dapat diputar.
(It seems your browser does not support HTMLMediaElement.playbackRate, so you will not be able to change the speech rate.)
Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.
1 Jadi dob marujung haganup ai, bingkat ma ganup halak Israel, na adong ijai marayak huta-huta ni Juda; irosaki ma ganup gana-gana, anjaha iroboh sisombahon Ashera, iparreong ma panumbahan na i buntu-buntu pakon anjapanjap i sab Juda pakon Benjamin, i Efraim ampa i Manasse, bois tumang do ganup ibahen. Dob ai mulak ma halak Israel ganupan hu hutani bei, ganup hu parbagiananni bei.
2 Dob ai iatur si Hiskia ma use horin ni malim ampa halak Levi, mangihutkon parhorinan hinan, ganup romban hubani jabatanni, age malim age halak Levi, ai ma pasal na manggalangkon galangan situtungon ampa galangan pardearan, laho marugas bani horbangan ni alaman ni Rumah ni Jahowa, laho mamuji ampa mangkatahon tarima kasih.
3 Ia tumpak ni raja ai, humbani na adong bani sandiri, ai ma hubani galangan situtungon, galangan situtungon sogod ampa bodari, galangan situtungon ari Sabat, poltak ni bulan ampa panorang pesta, songon na tarsurat ibagas buku titah ni Jahowa.
4 Anjaha iparentahkon raja ai ma hubani bangsa ai, na marianan i Jerusalem, ase ibere bei guguanni hubani malim ampa halak Levi, ase bulat uhur ni sidea mangkorjahon titah ni Jahowa.
5 Jadi sar ma hata ai, ipabuei halak Israel ma mamboan limbuah humbani omei, anggur, minak, manisan ampa humbani haganup atap aha pe gogoh ni tanoh ai; buei tumang do iboan sidea parsapuluhan ni atap aha pe.
6 Anjaha halak Israel ampa Juda, na marianan ibagas huta ni Juda, iboan sidea do parsapuluhan humbani lombu ampa biribiri, sonai homa parsapuluhan humbani sibere-bere na mapansing, na dob pinapansing hubani Jahowa, Naibata ni sidea, pala margugun-gugun.
7 Bani bulan tolu do ipungkah sidea pagugunkon ai, anjaha bani bulan pitu pe ase marpunsa.
8 Jadi dob masuk si Hiskia ampa kopala-kopala ai manonggor gugunan ai, ipuji sidea ma Jahowa ampa bangsa-Ni halak Israel.
9 Dob ai isungkun si Hiskia ma malim ampa halak Levi pasal guguan ai.
10 Nini si Asarya ma, ai ma ginompar ni si Sadok, mambalosi, “Olat ni dob ipungkah sidea mamboan guguan hu Rumah ni Jahowa, mangan do hanami, sungkupan do hanami anjaha buei do teba, ai ipasu-pasu Jahowa do bangsa-Ni, gabe tading bennami guguan on.”
11 Dob ai ihatahon si Hiskia ma sidea paulihon kamar parbohalan ibagas Rumah ni Jahowa; jadi ipauli sidea ma ai.
12 Dob ai ipamasuk sidea ma hujai guguan ai sintong-sintong, parsapuluhan ai ampa sibere-bere na pinapansing ai. Ia kopala haondosan ni ganupan ai, ai ma si Hananya, halak Levi, ampa si Simei, anggini ai, kopala paidua.
13 Anjaha si Jehiel, si Asasya, si Nahat, si Asahel, si Jerimot, si Josabad, si Eliel, si Jismakya, si Mahat ampa si Benaya, ai ma sipamareksa, na mangurupi si Hananya ampa si Simei anggini ai, ai ma na pinabangkit ni Raja Hiskia ampa si Asarya, kopala ni Rumah ni Naibata.
14 Anjaha si Kore, anak ni si Jimna, halak Levi ai do, sijaga horbangan na hampit hapoltakan ai, ia do sipamareksa sibere-bere nionjar ni uhur hubani Naibata, laho mambagihon guguan, na dob tinontuhon bani Jahowa, ampa sibere-bere na mapansing tumang.
15 Anjaha si Eden, si Minyamin, si Jesua, si Semaya, si Amarya pakon si Sekanya do na bujur-bujur mangurupisi i huta ni malim-malim, laho mambagihon parbagianan ai hubani sanina ni sidea ai, romban hubani horinni bei, dos na matua-matua age na etek;
16 pitah humbani dalahi, olat ni na marumur tolu puluh tahun hu atas, ai ma na masuk hubagas Rumah ni Jahowa, romban hubani horja siganup ari sihorjahonon ni sidea bani jabatanni bei, mangihutkon parhorinan ni sidea bei.
17 Ia malim isuratkon ma goran ni sidea, mangihutkon ginompar ni sidea mar sasaompung; ia halak Levi, olat ni na marumur dua puluh tahun hu atas, mangihutkon parbagianan ni sidea bei.
18 Tarsurat do goran ni sidea rap pakon ganup dakdanak ni sidea na etek-etek, parinangon ni sidea, ganup pangku ai, tulimat do idaptarhon.
19 Anjaha bani ginompar ni si Aron, ai ma malim-malim ai, na marianan i sampalan ni huta ni sidea, adong do bani sidea, halak na dob tarsurat goranni, bani ganup huta, na mambagihon parbagianan bani ganup dalahi i tongah-tongah ni malim ampa hubani haganup na tarsurat humbani halak Levi.
20 Sonai ma ibahen si Hiskia i sab Juda; sai ihorjahon do na madear, na pintor ampa na bujur i lobei ni Jahowa, Naibatani.
21 Anjaha sagala horja na pinungkahni ai mandalankon parugason i Rumah ni Jahowa, ai ma romban hubani titah ampa parentah, laho mangindahi Naibatani, ihorjahon do ai humbani gok ni uhurni, gabe manjadi do.
sabda_ylsa
Yayasan Lembaga SABDA
sabda_ylsa
Selengkapnya
SABDA Alkitab
Podcast SABDA
Slideshare SABDA