Alkitab Karaoke

Loading audio...

Catatan: Perhitungan audio timestamp (ketepatan waktu antara audio dan teks) berdasarkan perhitungan mesin / algoritma.

¹ Saellana paraya’an jareya mare, ra’yat kabbi padha entar ka saneyap kottha e Yehuda, laju maancor gu-tuguna brahala, magujur ca-arca se eatorragi ka Dewi Asyera, sarta mamosna ba-mezba ban saneyap kennengnganna panyemba’anna brahala. Se kantha jareya ejalannagi keya bi’ reng-oreng jareya neng e kennengngan en-laenna e Yehuda, ban e dhaerana Benyamin, Efraim ban Manasye. Saellana jareya kabbi padha mole ka kennengnganna bang-sebang.

² Rato Hizkiya neptebbagi pole gu-regguna para imam ban oreng Lewi menorot pambagiyanna lalakonna. Se tamaso’ lalakonna reng-oreng jareya iya areya: ngatorragi kurban obbaran ban kurban salameddan, aladine opacarana kabakteyan e Padalemman Socce, ban moji sarta asokkor ka PANGERAN e pan-barampan kennengngan e Padalemman Socce.

³ Dhari ebinna dibi’ rato nyombangngagi ban-keban se ekaparlo kaangguy kurban obbaran sabban laggu ban sabban malem, ban kaangguy kurban se eatorragi e are Sabat, e bakto paraya’an Bulan Anyar, sarta e bakto paraya’an en-laenna akantha se la etantowagi e dhalem kom-hokomma PANGERAN.

⁴ Laen dhari jareya rato makon pandhudhu’ Yerusalim ngeba tor-ator se la etantowagi kaangguy para imam ban oreng Lewi, sopaja para imam ban oreng Lewi jareya padha bisa’a masettong pekkeranna ka orosan pangladinan e Padalemman Socce akantha se esebbuttagi e dhalem kom-hokomma PANGERAN.

⁵ Saellana parenta jareya eomommagi, oreng Isra’il ngeba ka Padalemman Socce tor-ator aropa hasel bumena se dha’-adha’, iya areya darigu, anggur, mennya’ jaitun, maddu, ban hasel bume laenna. Reng-oreng jareya ngeba keya saparpolonna dhi’-andhi’na.

⁶ Reng-oreng se abengko e tha-kottha Yehuda ngeba saparpolonna sape ban dumbana, bariya keya tor-ator laenna sabannya’na; jareya kabbi laju eatorragi ka GUSTE Allahna.

⁷ Tor-ator jareya molae dhateng e bulan tello’ ban terros agili sampe’ e bulan petto’.

⁸ Ngoladi sombangan se bannya’na sajareya, Rato Hizkiya ban ba-ponggabana amolja’agi PANGERAN ban ngalem ra’yat Isra’il, ommadda.

⁹ E bakto rato abu-dhabu ban para imam sarta oreng Lewi parkara tor-ator jareya kabbi,

¹⁰ Imam Agung Azarya, toronanna Zadok mator, "Sajjegga ra’yat abakta tor-atorra ka Padalemman Socce, abdidalem sadaja ta’ oneng kakorangan teddha’an, la’-mala’ bi-talebbi, kantos gi’ bannya’ karena se ebadhi parsadhiya’an. Abdidalem sakanca narema ka’dhinto sadajana lantaran PANGERAN aberkadi ommattepon."

¹¹ Kalaban dhabuna rato reng-oreng jareya nyadhiya’agi dhang-gudhang e ma’-semma’na Padalemman Socce,

¹² laju nyempen sakabbinna tor-ator ban saparpolowan jareya e dhalem dhang-gudhang jareya. Badha oreng Lewi se anyama Konanya, se epassrae daddi pangawas, dineng ale’na, Simei, epanolonge.

¹³ Badha pole oreng Lewi kasapolo se epangoros lalakon jareya, epimpin se kadhuwa gella’; reng-oreng jareya iya areya: Yehiyel, Azaziya, Nahat, Asa’el, Yerimot, Yozabad, Eliyel, Yismakhiya, Mahat ban Benanya. Jareya kabbi eteptebbagi menorot petoduna Rato Hizkiya ban Imam Agung Azarya.

¹⁴ Kore ana’na Yimna, oreng Lewi se daddi pangawal kapala e Labang Saketheng Temor e Padalemman Socce, epassrae tanggung jawab narema tor-ator se eatorragi ka PANGERAN, pas gi-magi tor-ator jareya.

¹⁵ E tha-kottha laen se ekennengnge mam-imam, Kore etolonge reng-oreng Lewi laenna, iya areya: Eden, Minyamin, Yesuwa, Semaya, Amarya ban Sekhanya. Han-bahan kakanan jareya ebagi rata e antarana reng-oreng suku Lewi se towa otabana se ngodha, menorot lalakonna.

¹⁶ Lalake’an se aomor tello polo taon ka attas, se olle giliran lalakon sabban are e Padalemman Socce, eberri’i keya bagiyanna bang-sebang menorot lalakonna ban menorot regguna.

¹⁷ Para imam edhaftar menorot kaomma, ban oreng Lewi se aomor dhu polo taon ka attas edhaftar menorot lalakonna ban regguna.

¹⁸ Reng-oreng jareya edhaftar ban ana’ binena, ban reng-oreng laen se badha e bengkona se daddi tanggunganna, sabab to-sabakto reng-oreng jareya kodu asadhiya se ajalannagiya lalakonna se malolo kaangguy PANGERAN.

¹⁹ E antarana mam-imam se neng e tha-kottha se la eteptebbagi menangka andhi’na toronanna Harun, otabana e lon-talon e sabingkerra tha-kottha jareya, epele mam-imam se epassrae lalakon gi-magi bahan kakanan ka sakabbinna lalake’an la-balana imam ban ka saneyap oreng se tamaso’ e dhalem dhaftarra suku Lewi.

²⁰ E saantero Yehuda, Rato Hizkiya alampa’agi sabarang se adil ban jujur sarta se masenneng panggaliyanna GUSTE Allahna.

²¹ Hizkiya ahasel, sabab sabarang se elampa’agi kaangguy kaparlowanna Padalemman Socce otaba kaangguy atoro’ ka kom-hokomma PANGERAN, elampa’agi kalaban gu-onggu ate sarta kalaban kataresna’an ka GUSTE Allahna.

2 Tawarikh

Video 2 Tawarikh 31

Ikuti Kami:

KONTAK | PARTISIPASI | DONASI